भांगरभूंय | प्रतिनिधी
पणजी ः गोंयच्या बेतुल लागसार शुक्रारा दनपारां ‘एमव्ही मार्स्क फ्रँकफर्ट’ ह्या म्हाल येरादारी बोटीक उजो लागलो. बोट येरादारी मंत्रालयाच्या अधिकाऱ्यांच्या म्हणण्या प्रमाण, ह्या उज्यांत एका मनशाक मरण आयलां. तो फिलीपीन्सचो नागरीक आशिल्लो. ह्या तारवांत फिलिपिनो, मॉन्टेनेग्रिन आनी युक्रेनियन नागरिकां सयत 21 क्रू- वांगडी आशिल्ले. ते मुंद्रा बंदरा सावन कोलंबो श्रीलंके वटेन वताले. शॉर्ट सर्किटाक लागून तारवाक उजो लागलो आनी तो पातळ्ळो अशें तटरक्षक दळाच्या अधिकाऱ्यांनी सांगलें.
हे जहाज दर्यावेल्यान धोक्याचो (International Maritime Dangerous Goods) म्हाल घेवन वताले अशी म्हायती मेळ्ळी. म्हाल फुडल्या वाठारांत आशिल्ल्यान थंयच्यान स्फोट जावपाक सुरु जालो. गोंय लागसार कारवारा आशिल्ल्या भारतीय नौदलान ह्या जहाजाक सादूरतायेची शिटकावणी दिल्ली.
सुरवेक तारवाच्या कामगारांनी स्वता उजो पालोवपाचो यत्न केलो, पूण ताचेर नियंत्रण दवरूंक शकले नात. उजो नेटान डेकभर पातळ्ळो आनी ताका लागून कंटेनर फुटले. मुळावे म्हायती प्रमाण, जहाजा वयल्या 160 कंटेनरांतल्या 20 कंटेनरांक उजो लागलो. हें म्हाल येरादारी जहाज भारतीय दर्यादेगे सावन सुमार 80 नॉटिकल मैलांचेर आसा, अशें जहाज मंत्रालयाच्या अधिकाऱ्यांनी सांगलें.
उजो पालोवपी उपकरणां सयत तीन जहाजां थळार धाडल्यात अशें गोंय तटरक्षक दळाचे उपमहानिरीक्षक मनोज भाटिया हांणी सांगलें. तशेंच कोची दळाक मजती खातीर हेलिकॉप्टर धाडपाक सांगलां अशेंय तांणी सांगलें. भारतीय तटरक्षक दळान गरजेची मजत दिल्या. तशेंच डॉर्नियर विमान धाडलां आनी मजत करपा खातीर मुंबय बंदरा वयल्यान आपत्कालीन टोविंग व्हेसेल (ईटीव्ही) धाडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
