भांगरभूंय | प्रतिनिधी
किरू हायड्रोपावर प्रकल्पांत भ्रश्टाचार प्रकरण
नवी दिल्ली, खबरां संस्था: सीबीआयन आयज गोंयचे आदले राज्यपाल सत्यपाल मलिक हांच्या घरा छापो घातलो. तशेंच दिल्लीच्या हेर ३० सुवातांचेरूय छापे घातले. किरू हायड्रोपावर प्रकल्पांतल्या भ्रश्टाचारा विशीं ही कारवाय केल्या. ३ नोव्हेंबर २०१९ ते १८ ऑगस्ट २०२० ह्या काळांत ते गोंयचे राज्यपाल आशिल्ले.
सत्यपाल मलिक हे २३ ऑगस्ट २०१८ ते ३० ऑक्टोबर २०१९ ह्या काळांत जम्मू आनी काश्मीरचे नायब राज्यपाल आशिल्ले. तांणी तेन्ना, एका किश्तवाड हांगच्या हायड्रोपावर प्रकल्पाच्यो दोन फायली निकालांत काडपा खातीर ३०० कोटी रुपयांची लांच दिल्ल्याचो आरोप केल्लो. तांच्या घरा तशेंच हेर ३० सुवातांचे छापे मारल्या उपरांत तांणी ‘एक्स’ (ट्वीटर) वरवीं पोस्ट घालून म्हणलां, ‘‘फाटल्या दोन-तीन दिसां सावन हांव दुयेंत आसा आनी हॉस्पिटलांत भरती आसा. अशें आसून लेगीत हुकुमशाय पद्धतीन म्हज्या घराचेर सरकारी एजन्सी छापे घालतात. म्हजो ड्रायव्हर, वांगड्यांचेरूय छापे घालून तांकां त्रास दितात. हांव शेतकाराचों पूत. ह्या छाप्यांक भियेंवचो ना. हांव शेतकारां वांगडां आसा.’’
मलिक हांणी २०२१ त भ्रश्टचाराचे आरोप केल्ले
मलिक हांणी १७ ऑक्टोबर २०२१ दिसा राजस्थानाच्या झुंझुनू हांगा जाल्ले एके कार्यावळींत सांगिल्लें, जम्मू- काश्मीराचे राज्यपाल असतना तांकां कोट्यांनी रुपयांची लांच दिताले. हे मजगतीं दोन फायली तांचे कडेन आयिल्ल्यो. तांतली एक व्हड उद्देगपती आनी दुसरो मेहबुबा मुफ्ती आनी भाजपांत मंत्री आशिल्ल्या व्यक्तीची आशिल्ली. तातूंत घोटाळो जाल्ल्याचें तांच्या सचिवांनी सांगल्या उपरांत आपूण दोनूय सौदे रद्द केल्ल्याचें मलीक हांणी सांगिल्लें.
दोनूय फायलीं खातीर आपल्याक १५०- १५० कोटी रुपयांची ऑफर दिल्ली, अशेंय मलीक हांणी म्हणलें. सीबीआयन विचारल्या उपरांत आपूण ही ऑफर दिप्यांचीं नांवां सांगतलों.
सीबीआयच्यो दोन एफआयआर
हे विशीं सीबीआयन २ एफआयआर नोंद केल्ल्यो. पयली एफआयआर सुमार ६० कोटी रुपयांचे कंत्राट वाटिल्ल्या कथीत भ्रष्टाचारा कडेन संबंदीत आसा. २०१७-१८ त जम्मू आनी काश्मीर कर्मचारी भलायकी सेवा विमा येवजणेचें कंत्राट दिवपा खातीर विमा कंपनी कडल्यान ही रक्कम लांच म्हणून घेतिल्ली.
दुसरी एफआयआर किरू हायड्रो इलेक्ट्रिक पॉवर प्रोजेक्टच्या नागरी कामा खातीर २०१९ त एके खाजगी कंपनीक २,२०० कोटी रुपयांचें कंत्राट दिला तो भ्रश्टाचारा कडेन संबंदीत आसा. ह्या दोनूय प्रकरणांचो तपास सीबीआय करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
