भांगरभूंय | प्रतिनिधी
गोंयचे सुटके पयलीं फावो त्या प्रमाणांत रोजगाराच्यो संदी नाशिल्ल्यो. ते खातीर गोंयकारांक नोकरे खातीर गोंया भायर वच्चें पडटालें. पूण 1961 वर्सा गोंयचे मुक्ती उपरांत अर्थीक कार्यावळींक नेट आयलो आनी उदरगतीचो परिणाम जिणेच्या दरेका मळार दिसूंक लागलो. फाटल्या स दशकांत गोंयांत अर्थीक आनी समाजीक मळार बरोच बदल दिसूंक लागलो. गोंयांत प्रशिक्षित मनीस बळाचो उणाव भासूंक लागलो. देखून हेर राज्यांतले लोक गोंयांत भरपूर प्रमाणांत येवंक लागले. हेर राज्यांतल्या लोकांचे हें स्थलांतर अखंडपणान आजूय चालू आसा आनी ताका लागून गोंयच्या अस्मितायेक खर धोको निर्माण जाला.
स्थलांतरितांचे तीन प्रकार आसात – वेवसायीक वर्ग, कामगार वर्ग आनी मजूर वर्ग. वेवसायीक वर्गांत गोंयांत येवन आपले वेवसाय, उद्देग, धंदे स्थापन करपी उद्देजकांचो आसपाव जाता. कामगार वर्गांत प्लंबर, माळी, सुतार, इलेक्टीशियन आनी व्हायट कॉलर नोकरी सोदपी लोक आस्पावित जातात. बांदकाम, उद्देगीक आनी शेतकामा खातीर शेजारच्या राज्यांतल्यान कंत्राटदारान हाडिल्ले लोक म्हणल्यार मजूर वर्ग.
फाटल्या धा वर्सांच्या काळांत रियल इस्टेट वेवसायाची उदरगत आनी उद्देगीकीकरणाक लागून कामगारांची गरज वाडल्या आनी हे कामगार महाराष्ट्र ,कर्नाटक, बिहार, ओडीसा आनी झारखंड या राज्यांतल्यान गोंयांत येतात. या कामगारांतलो कांय वांटो गोयांत स्थायीक जाता. गोंय आतां हेर राज्यांतल्या गिरेस्त लोकां खातीर एक ‘सेंकड होम’ जालां. ते गोंयांत जमनी विकत्यो घेवन बंगले बांदतात वा फ्लॅट विकत घेतात. सुटयेंत ते गोंयांत येवन राबितो करतात. सिनेसृश्टीतल्या नट- नटयांनी आनी क्रिकेट खेळगड्यांनी गोंयांत बंगले बांदल्यात, कांय जाणांनी पाॅश फ्लॅटूय विकत घेतल्यात. ताका लागून शारांतल्या मुळाव्या सुविधांचेर तांचो परिणाम जाला. वजें पडलां.
स्थलांतरीतांत कामगार आनी मजूर वर्ग हेच गोंयकारांक खऱ्यांनीच हुस्क्याचें कारण आसा. कायदेशीर नदरेन मजूरांक आलाशिरो आनी मुळाव्यो सुविधा दिवप हें कंत्राटदाराचें कर्तव्य. हे कंत्राटदार आपली जापसालदारकी सांबाळीनाशिल्ल्यान कामगार आनी मजूर वर्ग राजकी फुडाऱ्यांच्या आशिवार्दान कोमुनिदादीच्या वा खाजगी जमनींत खोपी, घरां बांदून रावतात. हे झोपडपट्टींत रावपी लोक कालांतरान राजकी फुडाऱ्यांचे मतदार जातात. अशे तरेच्यो झोपडपट्ट्यो गोंयच्या खुबशा वाठारांनी दिसतात. स्थलांतरीत मजूर राजकी फुडारी, ताचें वावुरपी आनी भ्रश्ट सरकारी कर्मचाऱ्यांच्या मजतीन रेशनकार्डां करतात आनी तांच्या वांगडा गोंयांत रावनाशिल्ल्या तांच्या सोयऱ्यांची नांवां त्या रेशनकार्डांत घालतात. गोंयांत रावनाशिल्ले हे तांचे पांच- स सोयरे वेंचणुके वेळार चुकनासतना गोंयांत येवन त्या राजकी फुडाऱ्यांक मतां दितात. येणाऱ्या काळांत हे ‘बिगर निवासी गोंयकार’ (?) रेशनकार्डांच्या आदारार सरकारी नोकऱ्यो, लाडली लक्ष्मी आनी गृह आदार सारख्या येवजण्यांचो लाव घेवंक लागतले. सध्याच कांय कडेन हें सुरू जालां.
कामगारवर्ग स्थलांतरीत सामाजीक- अर्थीक लँडस्कॅपाचो एक वाटो जाला. आंतरराज्य स्थलांतर हे भारतीय अर्थवेवस्थेचे एक म्हत्वाचें खाशेलेपण. एके व्यक्तीक जेन्ना ताका ताचे राज्यांत रोजगार मेळना तेन्ना तो दुसऱ्या राज्यांत स्थलांतरीत जाता. सादारपणान गोंयकार जातूंत शारिरीक मजुरी चड आसा अशो नोकऱ्यो करपाक तयार नासता, अशें दिसून येता. हाका लागून कंत्राटदारांक गोंया भायले कामगार हाडपाक संद मेळटा. भायले कामगार उणे पगाराचेर सुरवेक नोकरी करपाक तयार आसतात. ताका लागून स्थलांतरीत कामगारांचो आंकडो गोंयांत वाडत चल्ला.
भारतीय संविधानान देशांतल्या दर एक नागरिकाक देशांतल्या खंयच्याय राज्यांत वचून काम करपाचो अधिकार दिल्लो आसा. देखून कायदेशीरपणान स्थलांतरीत कामगांरांचेर गोंय सरकार निर्बंध घालूंक शकना. गोंय हें विकसनशील राज्य आशिल्ल्यान फुडाराक लेगीत स्थलांतरीत कामगार गोंयांत येत रावतले. देखून सरकारान स्थलांतरीत कामगारांच्यो गरजो वळखून तांकां भलायकी, शिक्षण, घरां सारख्यो सुविधांची वेवस्था करूंक जाय. ताचे बगर आतां पर्याय ना, अशे दिसता.
अनिल कामत शंखवाळकार
9763718518
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
