गोंयचेर सिनेमा करपाची संद मेळ्ळ्यार ती घेतलों- ओम राऊत
भांगरभूंय | प्रतिनिधी
सर्गेस्त मनोहर पर्रीकार हांचेर एक सिनेमा करपाक वा पळोवपाक म्हाका खूब आवडटलें. कारण तांच्या जिविताचो संघर्श, यश आनी उत्कृश्टताये वरवीं आमी गोंयचे संस्कृतायेक स्पर्श करूंक शकतात.
आमकां सगळ्यांक सिनेमा पळोवपाक आवडटा. कोणाक आवडचोना? दरेकट्याचो आपलो आवडटो अभिनेतो लेगीत आसतलो. थोड्यांक मोठ्या पड्ड्याचेर दिसपी अभिनेत्याचो जिवीताचो प्रवास लेगीत खबर आसतलो. ताका प्रत्यक्ष मेळपाचेंय सपन लेगीत आसतलें. थोड्यांचे सपन पुराय लेगीत जाला आसतलें. खूबश फावटी सिनेमा म्हणले उपरांत फकत अभिनेत्याची तोखणाय जाता. पूण ताच्या भायर निर्मात्याची, दिग्दर्शकाची आनी पुराय पंगडाची वळख आमकां नासता. घडये तें पड्ड्या फाटल्यान काम करतात म्हणून आसुये, पूण एका बऱ्या सिनेमाचें खरें मोल पड्ड्या फाटल्यान लिपिल्लें आसता, हें आमी विसरूंक फावना. आयज आमी जे बरे सिनेमा पळयतात जाल्यार तें त्या कलाकारांचे मेहनतीचें फळ.
तुमी ‘लोकमान्यः एक युग पुरुष’ (2015), ‘तान्हाजी: द अनसंग वॉरियर’ (2020) हें उत्कृश्ट सिनेमा पळयल्यात आसतले. आजून कोणे पळोवंक ना जाल्यार मुजरत पळोवचे, अशें हांव म्हणीन. ल्हानपणांतल्यान म्हाका सिनेमा पळोवपाची आवड आसली म्हणचे परस आतां म्हाका ताची आवड जावपाक लागल्या अशें म्हणप म्हाका आवडटलें. कारण ल्हानपणान हांव फकत सिनेमा पळोवंक जाय म्हणून पळयतालों. तातूंतले म्हाका कायच कळनासले. पूण आतां सिनेमा खऱ्या अर्थान कितें हाची जाणीव म्हाका थोडे भितर जावंक लागल्या. सिनेमा फाटल्या मोलदीक वेळ आनी कश्टाचें फळ तांकां प्रेक्षकाचे तोखणायेंतल्यान मेळटा. वयर दोन सिनेमाचो उल्लेख केल्लो ताचे फाटले कारण म्हणजे हांवें ताच्या दिग्दर्शकाची घेतिल्ली मुलाखत. हय, ह्या दोनूय सिनेमाचे दिग्दर्शक ओम राउत हांच्या बरोबर संवाद सादपाची संद मेळप म्हणजेंच म्हज्या साबार सपनांतलें एक सपन पुराय जालें, अशें हांव म्हणीन. ओम राऊत हे नामनेचे पत्रकार भरतकुमार राऊत आनी मुंबय दूरदर्शन निर्माती नीना राऊत हांचो चलो.
‘लोकमान्य: एक युग पुरुष’ सिनेमा खातीर फिल्मफेयर पुरस्कार 2016 : उत्कृश्ट पदार्पण दिग्दर्शक, 52वे महाराष्ट्र राज्य पुरस्कार 2015: लोकमान्य खातीर उत्कृश्ट दिग्दर्शक, 66वे फिल्मफेयर पुरस्कार 2021: तान्हाजी: द अनसंग वॉरियर ह्या सिनेमा खातीर उत्कृश्ट दिग्दर्शक, 68व्या राष्ट्रीय चित्रपट पुरस्कार 2022: तान्हाजी: द अनसंग वॉरियर खातीर सगळ्यांत बरो लोकप्रिय चित्रपट अशें पुरस्कार फांवो जाल्यात.
ओमकार राऊत कोंकणींतल्यान उलयले. तांणी सांगलें, जेन्ना चवथेंच्या वर्गान आशिल्लो तेन्नाच हांवे दिग्दर्शक जातलो हें थारायल्ले. हांव कुंकळ्ळी- बाळ्ळी वाठारांतलो. उत्सवा वेळार हांगां जायतीं नाटकां जातालीं आनी तीं पळोवन हांव व्हड जालां. थंयच्यान म्हाका ताची आवड निर्माण जाली आनी आयज हांव म्हजे स्वताचे निवडीन फिल्म निर्मातो जाला.
म्हज्या दिग्दर्शकाच्या प्रवासा विशीं सांगचें जाल्यार, तुमी जेन्ना कितें बरयतात वा फिल्म करतात तेन्ना तुमकां आवडनां अशें कांयच आसना. आपल्याक जे कितें बरें दिसना तें सुदारपा बदला सोडून दिलें तर, तीं बऱ्या दिग्दर्शकाचीं लक्षणां न्हय आनी जो दिग्दर्शक तें सुदारता तो एक खरो, बरो दिग्दर्शक जावंक पावता.
गोंयची संस्कृताय बळिश्ट आसा. गोंय ह्या देशाचें म्होवाळ काळीज. गोंयच्या संस्कृतायेची चर्चा पुराय देशांत चलता. जर म्हाका गोंयचेर एकादे फिल्म करपाची संद मेळ्ळी जाल्यार हांव ती घेतलों. एक प्रेक्षक वा निर्मातो म्हणून आसूं येता, तो म्हणजेच सर्गेस्त मनोहर पर्रीकार हांचेर एक सिनेमा करपाक वा पळोवपाक म्हाका खूब आवडटलें. कारण तांच्या जिविताचो संघर्श, यश आनी उत्कृश्टताये वरवीं आमी गोंयचे संस्कृतायेक स्पर्श करूंक शकतात. मनोहर पर्रीकार हे आंतरराश्ट्रीय पांवड्याचेर विचार करपी, पूण आपल्या राज्याक पयले प्राधान्य दिवपी मनीस. जर म्हाका तांचेर फिल्म करपाक वा पळोवपाक मेळ्ळें जाल्यार हांव स्वताक नशीबवान समजतलों.
संवसार पाडव्या निमतान म्हापश्यां जाल्ले कार्यावळींत ओम राऊत खास आमंत्रीत आशिल्लें. तांणी सांगलें, म्हजें आनी गोंयचे नातें खूब घटमूट आसा. गोंयांत आयले उपरांत वास्को आमचीं सोयरी आशिल्ल्यान हांव थंय वचून ग्रामदेवता श्री दामोदराचें दर्शन मुजरत घेतां.
तांकां फुडले वाटचाली खातीर शुभेत्सा.
विष्णू नार्वेंकार
7709868431
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
