गोंयचें सेगीत दुसरें जैत

भांगरभूंय | प्रतिनिधी

सिद्धेश लाडाच्या जबरदस्त अर्द शेंकड्याचो आनी तिसरे विकेटी खातीर सुयश प्रभुदेसाय (नाबाद 43) वांगडा भागिदारी नेटार गोंयान मुश्तीक अली सिनीयर दादल्यांच्या टी-20 क्रिकेट सर्तींत मणिपूराक 7 विकेटींनी हारयलो.

मॅच जयपूरच्या जयपुरिया विद्यालय मैदानाचेर जाली. गोंयचें हें सेगीत दुसरें जैत थारलें. दोन दिसां पयलीं ताणें त्रिपुराक 5 विकेटींनी हारयिल्लो.

मणिपूरान टॉस जिखून पयलीं बॅटींग करपाचो निर्णय घेतलो. पूण, ताका निर्धारीत 20 ओव्हरींनी 9 विकेटी वगडावन फक्त 134 धांवड्यो करप शक्य जाल्यो.

ताचो ओपनर नितेशानान गोंयच्या बॉलरांचो प्रतिकार करतना 42 बॉलांनी 53 धांवड्यो केल्यो. हातूंत पांच चवक्यांचो आनी दोन सक्यांचो आस्पाव आशिल्लो. गोंया वतीन लक्ष्य गर्ग, अर्जुन तेंडुलकर आनी फॅलिक्स आलेमांव हांणी दरेकी दोन विकेटी घेतल्यो.

प्रत्युत्तर दितना गोंयचे दोनूय ओपनर मुखेली स्नेहल कवठणकार आनी आदित्य कौशिक सवाय भितर बाद जाले. दोगूय बाद जाल्ले त्या वेळार फक्त 19 धांवड्यो जाल्ल्यो. ते उपरांत सिद्धेश आनी सुयश हांणी संयमान बॅटींग करून डाव मुखार व्हेलो. दोगांयनी तिसरे विकेटी खातीर म्हत्वाची 87 धांवड्यांची भागिदारी केली. सिद्धेशान 37 बॉलांनी 59 धांवड्यांची खेळी केली. ताणें स चवके आनी दोन सके मारले. जाल्यार सुयशान 45 बॉलांनी नाबाद 43 धांवड्यो केल्यो. हातूंत चार चवक्यांचो आनी एका सक्याचो आस्पाव आशिल्लो.

सिद्धेश बाद जाल्या उपरांत दर्शन मिशाळ मैदानांत देंवलो. ताणें फक्त 10 बॉलांनी नाबाद 24 धांवड्यांची आक्रमक बॅटींग करून गोंयाक 2.4 ओव्हरी आनी 7 विकेटी बाकी राखून जैत मेळोवन दिवपाक हातभार लायलो.

थोडे भितर धांवतकटोः मणिपूर, 20 ओव्हरींनी 9 बाद 134 धांवड्यो (नितेश 53, रॅक्स 24 धांवड्यो, लक्ष्य गर्ग 2-33, अर्जुन तेंडुलकर 2-20, फॅलिक्स आलेमांव 2-31) हार आड गोंय, 17.2 ओव्हरींनी 3 बाद 138 धांवड्यो (सिद्धेश लाड 59, सुयश प्रभुदेसाय नाबाद 43, दर्शन मिशाळ नाबाद 24).