गोंयचें संस्कृतीक दायज मुखार व्हरपाक तरणाट्यांनी योगदान दिवचें: खासदार तानावडे
भांगरभूंय | प्रतिनिधी
मयें महोत्सवाचें उक्तावण : कमलाकांत तारी हांकां भेटयलो मयें रत्न पुरस्कार
दिवचले: गोंयची संपन्न संस्कृती तिगोवन दवरप गरजेचें. आमची परंपरा, रूढी, लोककला शेणत वतनाच नवे पिळगेन आदले पिळगे कडल्यान हें दायज आत्मसात करून संस्कृती तिगचे खातीर मयें महोत्सवा सारके सांस्कृतीक उत्सव जावप गरजेचें, अशें राज्य सभा खासदार सदानंद तानावडे हांणी सांगलें.
ग्रामीण भागांत संस्कृतीचो खजिनो आसा. तरणाट्यांनी हे कलेंत वांटो घेतल्यार निश्चीतूच आमची परंपरा तिगून उरतली. शिक्षण जरी उच्च आसलें तरी संगीत, नाट्य, अभिनय, किर्तन ह्यो परंपरा जर तिगूंक ना जाल्यार शिक्षण अपूर्ण उरतलें, अशें तानावडे हांणी सांगलें.
हया वेळार तांणी रुपेश ठाणेकार हांकां सेवा समाजीक कार्याचीं परबीं भेटयलीं.
रायझिंग युथ माय कला आनी संस्कृती खातें, श्री विजयानंद ज्ञान प्रसारक संस्था, श्री महामाया हायस्कूल आदले विद्यार्थी संघटना हांच्या हांच्या जोडपालवान तिसर्या मयें महोत्सवाचें आयोजन सिकेरीचे गो शाळेंत केल्लें. माचयेर मुखेल सोयरे ह्या नात्यान खासदार सदानंद तानावडे , आमदार प्रेमेंद्र शेट, अध्यक्ष रुपेश ठाणेकार, सरपंच कृष्णा चोडणकार, दयानंद कारबोटकार, जिल्लो पंचायत अध्यक्ष शंकर चोडणकार, महेश सावंत, सिल्वनो परेरा, सुभाष पार्सेकार, सिद्धेश पार्सेकार, वर्षा गडेकार, शांबा पेडणेंकार, मोहनदास गांवकार हजर आशिल्ले.
आमदार प्रेमेंद्र शेट हांणी सांगलें, तरणाटे पिळगेचेर बरे संस्कार जावप गरजेचें. शिक्षक, समाजीक संस्थांनी तरणाट्यांक योग्य दिका दाखोवची. लिपिल्ल्यो कला, विवीध गीतां, म्हणी, नाच आनी हेर पुरातन कला नवे पिळगेन राखून दवरपाची गरज आसा. गोंय लोकसंस्कृती खातीर संवसारांत फामाद आसा. ते नदरेन सरकार जायत्यो येवजण्यो राबयता, उर्बा दिता. कला सन्मानचो लाव दरेकल्याक मेळटा. अशे महोत्सव नेमान जावचे असो उलो तांणी मारलो.
आयोजन समिती अध्यक्ष रुपेश ठाणेकार हांणी येवकाराचें उलोवप केलें. ह्या वेळार सिकेरी गोशाळेचे कमलाकांत तारी हांचो ‘मयें रत्न’ हो मानाचो पुरस्कार भेटोवन खासदार तानावडे हांचे हस्तुकीं शाल, श्रीफळ, यादस्तीक भेटोवन सन्मान केलो. तशेंच विवीध मळार योगदान दिल्ल्या विजय मांद्रेंकार, सुनील पिळगांवकार, सावळो चोडणकार, रवींद्र धुरी हांचो तांच्या कामा खातीर सत्कार केलो.
सत्कार मुर्तींच्या वतीन कमलाकांत तारी हांणी मनोगत उक्तायलें. सुत्रसंचालन रुपेश लिंगूडकार हांणी केलें. मयूर प्रभुगांवकार हांणी उपकार मानले. उपरांत गोंयचें संस्कृतीक वैभव घडोवपी लोककला कलाकारांनी सादर केली.
आयज आयतारा ह्या महोत्सवाचो समारोप जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
