भांगरभूंय | प्रतिनिधी
मांद्र्यां काल जें कितें जालें, तें गोंयच्या शांत, सुसेगाद सभावाक खत लावपी आसा. पांच गुंडांनी मास्क लावन आदले सरपंच महेश कोनाडकार हांचेर खुनी हल्लो केलो. लोखंडाचे वारांव वापरून केल्ल्या ह्या हल्ल्यांत कोनाडकार वाटावले. कितेंय जावं येतालें. हल्लो करतना हें गुंड ‘तुका मायकल लोबो जाय?’ अशें म्हणटाले. तांची भाशा पळयल्यार ते पेडणेंकारूच अशें कोनाडकार हांणी पुलिसांक सांगलां. ते गोंयकार हें जर खरें आसत, जाल्यार हो प्रकार गंभीर म्हणचो पडटलो. गोंयच्या राजकी मळा खातिरूय हो हल्लो तसो नवोच. हाचे पयलीं आदले आमदार विष्णू वाघ हांचेरूय असो हल्लो जाल्लो. ते गाडयेंत आशिल्ले म्हूण वाटावले. ते गुंड कोण तें कळ्ळें ना. कालच्या प्रकाराकूय राजकी फाटभूंय आसा, अशें जाणवता. घडये पुलिसांची दिशाभूल करपाक गुंडांनी मुद्दाम तशें मुद्दाम म्हणूंक ना मूं? हो हल्लो, तांची गाडी पळोवपी कोण तरी आसतलेच वा सीसीटीव्हीन ही घडणूक कैद जाल्या आसतलीच. तिचे फाटलो सुत्रधार कोण तें कळप गरजेचें.
गोंयांत राजकारणांत एकामेकांचेर आरोप जातात. पूण गाळी संवप, सकयल्या दर्जाची भाशा वापरप अशें सहसा घडना. वेगळ्या वेगळ्या मार्गांनी (निधी आडावन, पयस बदली करून, कदेला वयलो देंवोवन, तिकेट न्हयकारून, बोंगलाट घालून……) गुपीतपणान सूड घेवपाचे प्रकार जातात, अशें लोक ल्हवूच फुतफुतात. पूण दांडे, वारांव घेवन जिवेशीं मारपाचो यत्न करपाचे प्रकार हांगा सहसा जावंक नात. दिसा उजवाडांत दोन तपां वयर राजकी मळाचेर वावुरप्याक असो बडोवप, हें भयंकरूच. हणजूण्यां ग्रामसभेंतूय एका दोतोराक बडयला. गोंय आतां हेर राज्यांच्या मार्गान वचपाक लागलां. मुखेल प्रवाहाक वचून मेळपाक लागलां, अशी भिरांत सगल्यांकूच कालचे घडणुकेन दिसल्या जाल्यार तातूंत अजाप न्हय. हाचे पयलींय खंय कोनाडकार हांकां अशो धमक्यो मेळिल्ल्यो खंय. पूण त्या वेळार तांकां नेमकी कसली धमकी दिल्ली, कोणें दिल्ली, ती राजकी मळा कडेन संबंदीत आशिल्ली काय, तें पुलिसांक सोदचें पडटलें. थळाव्या फुडाऱ्यांच्या मतान, सुपारी घेवन हो हल्लो जाला. आतां थंयच्या पुलीस निरिक्षकाची बदली जाल्या. ती तिडकल्ल्या लोकांक लागून जाल्या काय आनीक कसलें कारण आसा, तें कळपाक मार्ग ना.
एका मतदारसंघाचो आमदार आत्र्या पयऱ्यान पयसुल्ल्या मतदारसंघांत दिसपाक लागलो आनी थंयचे पंच, नगरसेवक ताचे वांगडा दिसपाक लागले जाल्यार राजकी मळार, समाजांत कुजबूज सुरू जातलीच. ताका थंय आपल्या लागींच्या कोणाक तरी उबो करपाचो आसतलो, ताका लागून ताणें हे यत्न चालू केल्यात, असो थंयच्या सत्ताधाऱ्यांक वा राजकारणमोगींक दुबाव येवपाक लागलो जाल्यार तांकां दोश दिवपाक मेळचो ना. लोक उलयतात तें बरेच फावटी खरेंय थारलां. (दुसरे वटेन पळयल्यार, समजा एका आमदारान चार मतदारसंघांनी घरच्यांक तिकेट मेळोवन दिली आनी तीं सगलीं वेंचून आयलीं जाल्यार तातूंत आमदाराची चूक काय मतदारांची? काय कायद्यांत उणाव आसा म्हणपाचो??) कळंगूटचे आमदार मायकल लोबो मांद्रेंच्या सप्तकाक आयिल्ले. तांचे वांगडा कोनाडकार आनी थळावे लोकप्रतिनिधी च्या मारताले. लोबो हे मांद्रें मतदारसंघांत उबे रावपाक सोदतात, अशी चर्चा मांद्रेंच न्हय, तर पेडणें आनी आशिकुशीच्या मतदारसंघांनीय जावपाक लागल्या. कोनाडकार तांचे वांगडा दिशिल्ल्याचे वा घडये तांच्या फावराद बी उलयिल्ल्याचे तिडकीन हो हल्लो केला आसुये, अशेंय कांय जाण उलोवपाक लागल्यात. मांद्रें पंचायतींत सत्तांतरां जावन वेगवेगळ्या आमदारांचे वटेन आशिल्लें पंच सत्तेर आयल्यात. सत्ता भायरेय जाल्यात. विरोधक सत्ताधाऱ्यां वटेन नी सत्ताधारी विरोधकां वटेनूय गेल्यात. कोनाडकार हे थळावे आमदार जीत आरोलकाराच्या विरोधांत आशिल्ले, आतां तांचे वटेन आसात. मजा म्हणल्यार हे घडणुकेचेर थोमणे मारपी, खर प्रतिक्रिया दिवपी, दुबाव उक्तावपी एकाच पक्षाचे वा सरकाराच्या घटक पक्षाचे प्रतिनिधी आसात. पक्ष हिता परस वैयक्तीक हीत लागीचें थारलां काय? भितरल्यान एकमेकांचे पांय ओडप चालू आसा खंय, तशें जाल्यार तें आडावपाक ‘एक सरकार, एक विचार’ ही संकल्पना गंभीरपणान चालीक लावची पडटली.
मांद्रें मतदारसंघांत दर्यादेग आसा. हेर दर्यादेगांचेर चलता, तें थंयूय चलता आसतलेंच. ताकाय पुलीस, राजकारण्यांनी आळाबंद हाडपाक जाय. हांगा हजारांनी पर्यटक येतात. तातूंत असले हल्ले जावपाक लागले तर पर्यटनाक धपको बसूं येता. कोनाडकार हांचेर जाल्ल्या खुनी हल्ल्या फाटल्यान राजकी कारण आसा, अशें सध्या तरी दिसता. पूण पुलिसांक सगल्या कोनांतल्यान तपास करून हल्ल्या फाटलें सत्य सोदचें पडटलें. जमल्यार सुत्रधारूय!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
