गोंयचें पर्यटन वेगळे दिकेन

भांगरभूंय | प्रतिनिधी

गोंयच्या पर्यटनाक थिराय दिवपाक सरकार, पर्यटन मंत्री जैतिवंत जाल्यात, पूण पर्यटन सवकासायेन काय जायना दिका बदलता हें सत.

गोंयच्या पर्यटन मळा वयले नामनेचे उद्देजक राल्फ डिसोझा गोंय पर्यटन मंडळाचेर परतून उंचेल्या पदार आयल्यात. पर्यटनाक नामना मेळोवन दिवपाक राल्फ हांचो व्हड वांटो आसा. वेवसायांत नवें कितें तरी हाडपाचो यत्न करतना वेवसायांतल्या उणेपणाचेर मेकळेपणान विचार मांडपी उद्देजक म्हूण तांकां वळखतात. दर्यादेगो नितळ उरच्यो, दर्यांत बुडटल्यांक वाटावचे हे खातीर यंत्रणा उबी करून घेवपाक ते सरकाराच्या फाटल्यान लागपी. पर्यटन मंडळ तांच्या यत्नान सुरू जाल्लें. पर्यटनांत बदल जावचे, नवीं पर्यटन थळां भोंवडेकारांक दिसचीं म्हूण ते वावुरपी. गोंयच्या पर्यटनाक ते नवी दिका दितले, वेगळी वाट दाखयतले अशी आस्त बाळगुया.
एका तेंपार गोंयच्या दर्यादेगां वयल्या रुप्यावरी चकचकपी रेंवेचेर गितां बरोवपी आमचे मदीं नासत, अजरंवर गीतां आसात. दर्यादेगो पयले वरी उरुंक नात हें त्या वाठारांत राबितो करपी, वाठारांतल्या वेवसाय, उद्देजकांक कळ्ळां. राज्याभायर तांचींय पावलां वचूंक ना, ते करोडपती जावन संवसारांतल्या उद्देगांत पावंक ना अशें न्हय. पर्यटनाचे देश, विदेशांतल्या बदलांचो अभ्यास करून, थळावी संस्कृताय राखून गोंयांत ते आपणावपाक फाटीं कित्याक रावप?
पर्यटन वेवसायांतल्यान मंत्रीपदार पाविल्ले पर्यटन मंत्री रोहन खंवटे हांकां वेवसायांतल्या बदलांची पुराय जाणविकाय आसा. उत्तर प्रदेशांतल्या नव्या राम मंदिरा उपरांत पर्यटन कूस बदलूंक लागलां. देश विदेशांतले पर्यटक केन्ना व्हड प्रमाणांत येतात हें तांकां खबरआसा. झुजांत चिड्डले रशियन भोंवडेक वतले काय जीव, वेवसाय, घरां वाटायतले हें चिंतचें पडटा. भारत आनी पाकिस्ताना मदीं जावपी झुजाचेर उलोवप सोंपें. झूज अचकीत जाल्यार कितें जातलें ? कितलो तेंप उरतलें? 2025 वर्सा पर्यटन वेवसाया पासत बरें वतलें? अदमास बांदप कठीण. प्रस्नाच्यो जापो माॅन्सुनाच्या आरंभाक मेळटल्यो.
विज्ञानिकके कस्तुरीरंगन, देशांतल्या सिने उद्देगाक नामना मेळोवन दिवपी शाजी करुणा वरी दोन विचारवंत. हालींच हीं दोन नामनेचीं व्यक्तींमत्वां सोंपलीं. तांचें कर्तृब उरलां, त्या कर्तृबांतल्यान ते अजरंवर उरतले. पर्यटन वेवसायाचेय ते चिंतपी, पर्यटनाच्या नव्या तासांक वळखुपी, आपणावपी. तांकां वळखुपाची तांक कळंगूटचे आमदार मायकल लोबो हांकां आसा ? गोंय मंत्रीमंडळ बदलतलें तेन्ना आपूण आसपाक जाय नाजाल्यार सरकारा आड उलयत रावतलों अशी शिटकावणी आड वाटेन तांचे कडल्यान मेळटा तेन्ना तांची अस्वस्थताय कळटा.
पर्यटन मळाचेर देश विदेशा बराबर गोंयांतय जाल्ली उदरगत दर्यादेगेर सावन पर्यटकांक पयस व्हरता हें तांकां होल्मलां. गोंयच्या पर्यटनाक थिराय दिवपाक सरकार, पर्यटन मंत्री जैतिवंत जाल्यात, पूण पर्यटन सवकासायेन काय जायना दिका बदलता हें सत.
विदेशी पर्यटकां वांगडाच देशी पर्यटकांची दीसपट्टी, वर्सपटी बदलतना नवें प्लॅनिंग करपाची तयारी सरकार करपाक लागलां. पर्यटनाचे परिणाम हेर वेवसायांचेर जाल्यात, पर्यटना निमतान गोंयांत येवन राज्यांत ल्हान, व्हड वेवसाय, वावरांत घुस्पत उद्देगपतीय जाल्यात. पर्यटन मंत्री, सरकाराक तांकांय सोदून काडचे पडटले, तातूंतय एखाद्रो पाकिस्तानीय आसत, मूळचो भारतीय.
पर्यटन वाडीक लागतना काँक्रिटाच्या रानांनी दर्यादेगां वयलें गोंय बुडिल्ल्यान दर्यादेगांचेर चेपण आयलां. त्या चेपणा खाला, कोटी कोटींच्या पर्यटकां खाला दर्यादेगो ल्हान जायत गेल्यात. दर्यादेगांक आदलें रूप परतून मेळोवन दिवपा पासत येवजण जाय. पावस, काॅन्फरन्सी, फेस्तांची दिसपटी नवें शिक्षणीक धोरण, ल्हारां वाऱ्याचे बदल पर्यटनाक वेगळेच दिकेन व्हरतले. विसव, लग्न, साकरपुडो, वाडदिसाक दर्यादेगोच कित्याक जाय? तें वातावरण, ती खोस देवळां, सैम सांगातांतय मेळटा. अशे विचार करपी गोंयकार, गोंया भायले सेलेब्रेटीय आसात. तें पर्यटन तांकांय भावता, अयोध्या ते कश्मीराक सगल्या धर्माचे समेस्त वतात. कश्मीरांतलें शिंयाळ्या पर्यटनाचें ऋतुमान बदलता, गोंयचें ऋतुमानय बदलाचे वाटेर आसा ताचो अभ्यास सरकार करता, ग्रीन लंग्जांची भास तें सांगता.
मायकलबाब पणजे ते काणकोण मेरेन भोंवल्यार तीन, पांच नखेत्री हाॅटेलां वताच्या रखरखांत पाचवी ताल्ल जातात हें तांकां कळटलें. फुलां, भाजी विकपीयो म्हजीच भाजी, फुलां घे अशें कित्याक सांगना? तांकां व्हड गिरायक आसा? सदच्या बाजारांनी येवपी गिरायका परस बाजारांतल्या वेवसायिकांक हाॅटेलांचे गिरायक चड मेळटा, गोंयचो नाल्लय भाजये वांगडा गोंया भायर वता हें मायकलबाब जाणात. नायट लायफ कसिनोंचेर पावल्या, कसिनोंचो दर्या पाकिस्तानाक पावला ही म्हायती तांकां आसा? मायकलबाबान आपल्या सोयऱ्यांक, इश्टांक वेवसायांत हाडल्यात? पर्यटन मंत्र्यांक म्हत्व मेळटा, म्हायतीच्या जाळांतल्यान पर्यटनाचीं नवीं रुपां, मनरिजवण तांचे मेरेन पावता हें मायकलबाबांक कळ्ळां तेखातीर बोवाळ परतून सुरू जाला व्हय?
देशांतल्या नामनेच्या देवळांच्या ट्रस्टांच्या वळखीन गोंयांत बालाजी ते बाळुमामा, दुर्गामाता आनी साई मंदिरांय जाल्यांत. देवळां, समाजाचीं सभाघरां एका समाजा खातीर नासतात तीं सगल्या समेस्त समाजां पासत आसतात, तांचो, देवळांच्या धर्मशाळांचो उपेग पर्यटकां खातीर जाता? पर्यटन मंत्र्यांच्या अभ्यासांतल्यान पर्यटन खात्याचीं नवी हाॅटेलां, धर्मशाळा उबारप शक्य आसा. इगर्ज, मशिदीचें पर्यटन मंदीर, धबधबे पर्यटना इतलेंच देश विदेशांतल्या भोंवडेकारांक भावचें हेखातीर तजवीज जाय. भौशीक सुविधा, कोयर वेवस्थापन, शिस्त, ताज्जें खाण जेवण, उदक, ल्हानसो बाजार (माॅल) दर एका पर्यटन थळार आसचो.
पर्यटन खात्याच्या आदल्या हाॅटेलांक नवें रूप, रंग दितना तीं चडांत चड पांच नखेत्री, पांच मजली आसतलीं ही जतनाय घेवची.
ग्रीन लंग्ज येवजणेंत दर्यादेगांक म्हत्व दिवन, दोन वर्सां म्हत्वाच्यो दर्यादेगो लाखांच्या गर्दे पसून पयस दवरच्यो. दर्यादेगांची सोबीतकाय माडांचीं वंय वाडोवपी, हेर कसलीं झाडां दर्यादेगांनी लावपाक येतलीं ते मायकलबाब सांगतले.
गाडयो दर्यादेगे पसून पयस कशो दवरच्यो? पार्किंग सुवात आसा व्हय? मायकलबाबान दाखयल्यार दर्यादेगे लागसरच्या वाठारांत भौशीक सुविधा जातल्यो. पणजी स्मार्ट सिटी जातना लखलखपी तिजुल्यांच्यो वण्टी आशिल्ल्या टाॅयलेटांची बांदावळ जाल्या. दिका दाखोवपी तकटे कोंकणी, हिन्दी, इंग्लेजींत लावपाचो वावर म्हापालिका करतली, चित्रां परस अक्षरांचें तकटे बरे.
अध्यात्म पर्यटन गोंयांत श्रावण म्हयन्यांत, उत्सव, जात्रा फेस्तांतल्यान वाडटा. लग्नां खातीर देवळांचीं, इगर्जेचीं सभाघरां आसात, त्या सभाघरांक नवनिर्मणेची वाट देवस्थान, इगर्ज समित्यो दाखयतात, तांकांय सरकाराचो तेंको मेळचो. विशेश फेस्तांक पर्यटन, कला आनी संस्कृती खात्याचो आदार आसता. समाजाक सुदारपाची दिकाय उत्सव, संस्कृतायेंतल्यान मेळची. स्मार्ट सिटींतलो परशुरामाचो पुतळो आयज सेल्फी थळच न्हय देवय जाता. दर्यादेगो वाॅक वे जावच्यो, बेड्स, डेक्स वे न्हय.

सुहासिनी प्रभुगांवकार
9881099260