भांगरभूंय | प्रतिनिधी
धर्मशाळा आसताल्यो. प्रवासाची साधनां नाशिल्ल्यान लोक चलत वा घोड्यार भोंवताले. वाटेर धर्मशाळेंत रावताले. कोण आयला, कोण गेला, तें कोणाक कळनाशिल्लें. कोण चवकशीय करिनाशिल्ले. आमच्या गोंयां सयत, साबार म्हानगरांची अशीच स्थिती जाल्या. आओ, जाओ, घर तुम्हारा. अर्थात हें आडावप अशक्य न्हय. तंत्रज्ञानाच्या युगांत तर कांयशें सोंपें. तरीय येता तो मनीस बरो काय खांपो गुन्यांवकार, हाचो पुलिसांकूय दुबाव येना, हाका कितें म्हणपाचें?
डाॅन दावूद इब्राहीमाचो गुंड दानिश चिकना उर्फ मर्चंटाक ताचे बायले सयत एका रिसोर्टांत अटक जाल्या. ताचे कडेन ड्रग्सूय सांपडलें. मुंबयच्या घुंवळे वखदां विरोधी पंगडान ही कारवाय केली. मागीर गोंय पुलिसांनी तो दर्यादेगे वयल्या ड्रग्स वेव्हारांत आसा काय ना, ताची चवकशी केली. ह्या प्रकरणांत अंडरवर्ल्ड घुस्पल्ल्यान तिचें गांभीर्य वाडलां. दानिश सोडात, फाल्यां आनीक कोणूय सांपडूं शकतात. तेन्ना गोंय पुलिसांनी हें प्रकरण खोलायेन हाताळचें.
सध्या गोमटें गोंय गुन्यांवांनी गाजता. हवाला रॅकेट, पिस्तुलांनी फारपेट, पुलिसा कडल्यानूच मारबडय, मिनी गँगवाॅर, लोकांक मारपेट घुंवळे वखदांचो वेव्हार तर सदांचोच. गोंय भितरल्यान गुन्यांवकारांचें केंद्र जायत चल्लां, अशें म्हणल्यार चुकीचें थारचें ना. गोंयांत विदेशी चलयांचेर बलात्कार, खून जालो काय ती खबर आंतरराष्ट्रीय पांवड्याचेर पावता. स्कार्लेट आनी हेर कांय चलयांच्या बाबतींत हें जालां. 1986 त पर्वरेच्या रेस्टाॅरंण्टांत चार्ल शोभराजाक धरिल्लो. तो ताचे पयलीं कांय म्हयने गोंयांत येवन लिपिल्लो आसूंक जाय. पंजाबांत हत्येचो आरोप आशिल्लो लाॅरेन्स बिश्नोय टोळयेचो वांगडी विष्णू विश्नोयक अंदूं आॅगस्टांत धरिल्लो. इस्रायली अटालाय आसाच. ताचे भायर सरपळ्यो चोरपी इराणी टोळी, फातोड्डेंची दोन गटांतली मारामारी, आयरीश चलयेच्या हत्याकांडांतलो आरोपी भगताक ख्यास्त, हवाला, कॅसिनो मनी लाँडरींग, सायबर फटवणूक. कितलेशेच गुन्यांव. भायले दुबावीत हांगा येतात, रावतात, धंदो करतात, मना सारकें जायना जाल्यार हल्लेय करतात. गोंयांत ड्रग्स विकपाकूय खास भायल्यान लोक येतात आसतले. व्हांवतें उदक वाट मेळत थंय धांवता आनी फोंडकूल मेळ्ळें काय थंय सांठवता, तसली गत आमची जाल्या. सगलेच ल्हान- व्हड गुन्यांवकार गोंयांत लिपपाक, जिवाचें गोंय करूंक येतात. थोड्यांकूच धरल्यात. कितले येवन गेले वा आसात, तें कळना. तांकां तपास यंत्रणांनी सोदपाक नाका?
दानिश आनी हेर कोण गोंयांत घुंवळे वखदांचें रॅकेट चलयता जाल्यार तें सोदून पुराय टोळी उध्वस्त करपाची भांगरा संद तपास यंत्रणां मुखार आसा. गोंयांत पर्यटक म्हूण कांय गुन्यांवकारूय येतात, हें आतां लिपून उरूंक ना. ड्रग्साच्या वेव्हारांत फक्त भायलेच न्हय, तर गोंयकारूय आसतले. नायजेरियन आनी रशियनांचेर बारीकसाणेन लक्ष दवरूंक जाय. काम- धंदो करिनासतना गाडयांनी भोंवपी, पार्ट्यो करपी सगल्यांचेरूच लक्ष आसूंक फावो. गोंयांत लाखांनी न्हय, तर फावटीक करोडांनी रुपयांचें पसून ड्रग्स मेळ्ळां. पुलीस म्हणटात, गोंयांत संघटीत गँगस्टर नात, माफीया नात. नासतूय बीन. पूण, दर्यादेगे वयल्या गांवांनी बसून ते मोबायल फोन, संगणकाचे मजतीन धंदो करपाक शकनात?
राज्यांत येवपी सगल्यांचीच वळखपत्रां, गाडयेची म्हायती तपासपाक जाय. गुन्यांवकार आसल्यार ताची नोंद पुलीस स्टेशनाचेर आसतलीच. आधारकार्ड नंबर मारतकच त्या मनशाची पुराय म्हायती एक बटनाचेर मेळपाक जाय. देखीक दानिशाचें नांव मारतकच, ताचे नोंद जाल्ले सगले गुन्यांव कळपाक जाय. राज्यां मदीं म्हायतीचें दिवप घेवप जाता आसतलेंच?. दुबावीत व्यक्तींच्या हालचालींचेर तांकां रावपाक जागो दिवप्यांनी, पुलिसांनी, जापसालदार नागरिकांनी लक्ष दवरल्यार बरें. अर्थांत सगलेच गुन्यांवकार नासतात, हेंय आमी मतींत घेवचें.
गुन्यांवकारी वाडल्या काय पुलीस तपासांत उणें पडटात, ताचो सोद मात घेवचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
