भांगरभूंय | प्रतिनिधी
मुख्यमंत्री : पणजे दबाज्यान शिगमो उत्सव मिरवणूक
भांगरभूंय । प्रतिनिधी
पणजीः गोंयचो शिगमो राष्ट्रीय आनी आंतरराष्ट्रीय पांवड्यार व्हरून आनी गोंयचें दायज संवसारभर पावोवपा खातीर गोंय सरकार यत्न करता. शिगमो उत्सवाच्या माध्यमांतल्यान सांस्कृतीक पर्यटनाचो प्रचार करतले, अशें मुख्यमंत्री डॉ. प्रमोद सावंत हांणी सांगलें.
शेनवारा सांजे पणजे शिगमो उत्सव मिरवणूक व्हड उमेदीन मनयली. ह्या वेळार मुख्यमंत्री डॉ. सावंत हांणी मिरवणुकेचें उक्तावण केले उपरांत उलयताले. ह्या वेळार पर्यटन मंत्री रोहन खंवटे, पणजीचे महापौर रोहीत मोन्सेरात, गोंय भाजप प्रदेशाध्यक्ष दामू नायक, पर्यटन संचालक केदार नायक आनी पणजी शिगमोत्सव समितीचे पदाधिकारी हजर आसले.
मुख्यमंत्र्यान सांगलें, गोंयच्या वेगवेगळ्या वाठारांत गोंयचें दायज शिगमो उत्सव आमी व्हड उमेदीन मनयतात आनी खेळयतात. पुराय गोंयांतल्यान रोमटामेळ, चित्ररथ, वेशभुशा कलाकार वांटेकार जाल्यात. कार्नवाल आनी शिगमो उत्सवा वरवीं सांस्कृतीक पर्यटनाचो आमी प्रचार करतात. अशे तरेच्या सांस्कृतीक पर्यटनाक गोंय सरकार सेगीत उर्बा दीत रावतलें, अशें मुख्यमंत्र्यान म्हणलें. परंपारीक गोंयची संस्कृती आनी ओस्सय ओस्सयच्या गजरांत पणजी शिगमो उत्सवाच्या तालार नाचली. उर्बेभरीत रोमटामेळ आनी चित्ररथांनी प्रेक्षकांचें मन ओडून घेतलें. पर्यटन खात्याच्या जोडपालवान पणजी शिगमो उत्सव समितीन घडोवन हाडिल्ले शिगमो उत्सव मिरवणुकेंत गोंयच्या विंगड विंगड पंगडांनी परंपारीक रोमटामेळ, परंपारीक गोंयचे लोकनाच, देखीक घोडेमोडणी, कुणबी नाच, तोणयां मेळ, गोफ, मोरुलो, धनगर नाच आनी वेशभुशा सर्तीत वांटेकार जावन सुरबूस मनरिजवणेचो आस्वाद दिलो. तशेंच मिरवणुकेंत पुराणीक कथेचेर आदारीत चित्ररथांनी प्रेक्षकांचें लक्ष ओडून घेतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
