भांगरभूंय | प्रतिनिधी
पणजी, मडगांव, कुंकळ्ळी नगरपालिकांचें काम सुरू
प्रस्तावीत नेमांचो मसुदो अधिसुचीत
सुचोवण्यो, हरकती सादर करपाक 15 दिसांची मुजत
भांगरभूंय । प्रतिनिधी
पणजी : पणजी, मडगांव आनी कुंकळ्ळी नगरपालिकेंत जीओस्पेशियल (डिजिटल थ्री डी) सर्व्हेक्षण सुरू जालां. ह्या तिनूय पालिकांचें सर्व्हेक्षण जाले उपरांत पुराय राज्याचें डिजिटल थ्रीडी सर्व्हेक्षण करपाचो प्रस्ताव आसा. ह्या सर्व्हेक्षणा खातीरच्या प्रस्तावीत नेमांचो मसुदो अधिसुचीत जाला. बेकायदो बांदकामां, अतिक्रमणां तशेंच सगल्या इमारतींची नोंद दवरपी जीओस्पेशियल सर्व्हेक्षणा (थ्रीडी डिजिटल) विशीं लोकांच्या कागाळींचेर निर्णय घेवपा खातीर चवकशी अधिकाऱ्याची नेमणूक जातली. सर्व्हेक्षणाची पद्दत तशेंच कागाळी सुटाव्यो करपा खातीर प्रस्तावीत नेमांची अधिसुचोवणी जारी जाल्या.
लोकांक सुचोवण्यो तशेंच हरकती महसूल सचिवाक 15 दिसां भितर सादर करच्यो पडटल्यो. सुचोवण्यो तशेच हरकतींचो विचार केले उपरांत नेमांक मान्यताय मेळटली.
जीओस्पेशियल सर्व्हेक्षणांत बेकायदो बांदकामां, अतिक्रमणांची नोंद जातली. हाका लागून खूबशे लोक हरकती घेतले आनी कागाळी नोंद करतले. हरकती तशेंच कागाळी नोंद करून तांचेर निर्णय घेवपा खातीर चवकशी अधिकाऱ्याची नेमणूक जातली. चवकशी अधिकारी हो निरिक्षका परस सकयल्या हुद्द्याचो अधिकारी आसचो ना. दरेका जमनीं वयलीं बांदकामां, अतिक्रमणां आनी जमनीची मालकी हे विशींचो मसुदो (अर्बन पेरी – अर्बन लॅण्ड प्रॉपर्टी ओनरशीप रेकॉर्ड) जाहीर करतलो. हो मसुदो दिसाळ्यांनी तशेंच राजपत्रांत उजवाडायतले. मसुद्याचेर हरकती सादर करपा खातीर 30 दिसांचो वेळ आसतलो. लॅण्ड रेवेन्यू कोडा प्रमाण कलम 14 वा 85 खाला चवकशी अधिकारी कागाळींची चवकशी करतलो आनी निर्णय दितलो.
हरकती तशेंच कागाळींचेर निर्णय जाले उपरांत सुदारीत मसुदो 30 दिसां खातीर उक्तो आसतलो. हाचेर कागाळी वा हरकती सर्व्हे इन्स्पेक्टरा कडेन सादर करच्यो पडटल्यो. ह्या हरकतींचो विचार जाले उपरांत निमाणो मसुदो जारी जातलो.
एकाद्या गांवाचो, शाराचो सर्व्हे करपाचो जालो जाल्यार कलम 56 खाला सर्व्हे खात्याचो संचालक नोटीस जारी करतलो. घर धनयांक तशेंच लोकांक सर्व्हे अधिकाऱ्यांक म्हायती दिवची पडटली. महसूल खातें, पंचायत संचालनालय, शार उदरगत खातें हांणी फावो ती मजत सर्व्हे करपी अधिकाऱ्यांक करची पडटली.
सर्व्हे करताना सगली म्हायती जीआयएस पोर्टलाचेर नोंद करची पडटली. उपरांत सगली म्हायती चवकशी अधिकाऱ्याक सादर करची पडटली.
एखाद्याक जमीन वा हेर गजालींचें परतून सर्व्हेक्षण जाय पडलें जाल्यार ताणें शुल्क फारीक करचें पडटलें. नेमा प्रमाण हें शुल्क सर्व्हे इन्स्पेक्टरान थारावचें पडटलें. सर्व्हेचे रेकॉर्ड आनी आराखडे सांबाळपाची जापसालदारी मामलेदार/ जोड मामलेदारांची आसतली. तांणी रेकॉर्ड कार्यालयांत सांबाळून दवरपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
