भांगरभूंय | प्रतिनिधी
समाजांत चलता तें सिनेमांत दिसता… सिनेमांत दिसता ताचें समाज अनुकरण करता. हो मतप्रवाह व्हांवत आसता. तांतीं काय कोंबी पयली तसलींच कांयशीं हीं मतां. काल फांतोडेर मुंगूल, माडेल वाठारांत दोन गटां मदीं आदले दुस्मानकाये वयल्यान (?) जें कितें जालें, तें गोंयचें नांव घाणावपी आशिल्लें. दोन गल्लींतले दादा एकमेकां आड झगडटात. मागीर केस्तांवां. निमणो हिरो जिखता, हें आमी सिनेमांत पळयत आयल्यात. आंगांत दादागिरी रिगिल्ल्या कांय तरणाट्यांक ताचें आकर्शण दिसता. पूण सिनेमातले नट प्रत्यक्षांत सात- आठ सुरक्षा रक्षक घेवन भोंवतात, हाचो तांकां विसर पडटा. मोटार आडावन स- सात जाणांनी दांडे, तरसादी, कोयते घेवन केल्लो हो कालचो हल्लो. दोगूय आरशे बंद करून गाडयेंतूच रावले. तरीय तांकां मार लागलो. हल्लो करप्यांनी फारूय पेटायले. दोगायचेर उपचार चलतात.
गांवांत वा गल्लेंत कोण कितें करता, कोण कोणाचो कार्यकर्तो, बाॅयफ्रेंड, गर्लफ्रेंड… असल्यो गुपीत खबरो थंय रावपी एकान एक कुटुंबाक खबर आसतात. फक्त पुलीस सोडून. माडेलांत हल्लो जालो, ते तरणाटे मध्यानरातीं खंय गेल्ले, घरच्यांक सांगून गेल्ले, हल्लो करपी थंय कितें करताले. रातचो बोवाळ जातकच लोकांक जाग आयली ना…. हाचो तपास पुलिसांनी करपाक जाय. रातच्या वेळार गाडयेंत हाॅकी स्टीक्स, पिस्तुलां, दांडे, वारांव घेवन तरणाटे भोंवतात ते कोणाकूच कशे सांपडनात? पुलिसांचें गुन्यांवकारी वाठारांचेर बारीकसाणेन लक्ष आसपाक नाका? लोकप्रतिनिधी बेजार जातले, पूण ताका कोण कांय करूंक शकना. दांडे, वारांव, हाॅकी स्टीक बोल्सांत वा पोतयेंत लिपोवन व्हरपाक मेळना. खरें म्हणल्यार पुलिसांनी रातीं दोना उपरांत दुबावीत रितीन भोंवपी सगल्यांच्योच गाडयो तपासपाक जाय. नुस्तें हाडपाक वचपी, पेपर घालपी, भाजी, फळांच्या गाडयेची वाट पळोवपी, पाळयांनी काम करपी सोडल्यार हेरांनी मध्यानरातीर भोंवपूच कित्याक? रातीं देड- दोना उपरांत बार्रांचेरुय नदर जाय. कारण, सोरो, ड्रग्सांचे नशेंत चडशे गुन्यांव जातात.
माडेलांत जाल्ल्या ह्या हल्ल्यांत गोंयचें नांव राष्ट्रीय पांवड्यार आयलां. असले प्रकार बिहारांत, उत्तरप्रदेशांत खूब जातात. आतां थंय एक पसून गुन्यांव जायना अशें कांय जाण म्हणटात, तरी सुरे, पिस्तुलां घेवन जिवेशीं मारपाच्या प्रकारांचे उगमस्थान ते वटेनचेंच. आदल्या तेंपार अंडरवर्ल्ड डाॅन सुपारी घेवन असलीं कामां करताले. आयजूय करतात. गोंयांतूय हे खंडणी (प्रोटेक्शन मनी), धमक्यो, मारामारी, हल्ले असले प्रकार पावल्यात. दर्यादेग वाठारांतूय ते जातात. एका गुंडाक दुसरो गुंड सोंपोंवक सोदता. फाटलाव करून फार पेटोवपाचे प्रकार बार्देसांतल्या दर्यावेळांचेर जाल्यात. आतां सरकारान हें खरपणान घेतलें ना जाल्यार गोंयांतले समेस्त ‘सत्या’, ‘गँग्स आॅफ वासेपूर’ सारक्यो टोळयो करून ‘शूटआवट अॅट लोखंडवाला’ करपाक फाटीं सरचे नात. कोण तरी खंयच्यान येता, गोंयांत स्थायीक जावन वेवसाय, धंदो करता आनी कोण मना आड गेल्यार फार पेटयता, कायदो हातांत घेवंक भियेना……खंय व्हरून दवरलां गोंय आमचें?
गोंयांतली गुन्यांवकारी सोंपोवपाक शिक्षणीक, समाजीक, मानसीक पांवड्याचेरुय काम जावपाची गरज आसा. हायस्कूलांनी संयम कसो दवरप, कायद्याचो आदर कसो करप, सहिश्णुताय सारके मुल्यां आशिल्लें शिक्षण दिवंक जाय. तरणाट्यांची उर्जा सकारात्मक कामां कडेन वळोवपाचोय वेळ आयला. तिडकीर नियंत्रण कशें दवरप, तणाव पयस कसो करप, हाचें समुपदेशन जावंक जाय. रोजगाराच्यो संदी जाय. कारण बेकारेक लागून तकली भिरकता. सोशल मिडियाचेर तरणाट्यांक मार्गार हाडपा विशीं मोहीम चालीक लायल्यार बरी. गांवांतल्या जापसालदार तरणाट्यांनी, शिक्षकांनी, पालकांनी बारीकसाणेन कितें चल्लां ताचेर लक्ष दवरप सामकें गरजेचें जालां. तरणाटे हो आमच्या देशाचो फुडार, हें कोणें विसरचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
