गोंयचें अस्तित्व तिगोवपा खातीर कोंकणी भाशेचो चडांच चड वापर जावप गरजेचें सूरज मोरजकारः पेडण्यात पेटूल कार्यावळ उमेदीन

भांगरभूंय | प्रतिनिधी

भांगरभूंय । प्रतिनिधी
कोरगांवः गोंयचे अस्तित्व तिगोवन दवोरपाचें जाल्यार गोंयची निजाची संस्कृती आनी  कोंकणी भाशेचो चडांत चड उपेग जावप सामकें गरजेचें आसा अशें उद्देजक सूरज मोरजकार हांणे कोंकणी भाशा मंडळ आनी पेडणे सरकारी म्हाविद्यालय हांच्या जोड पालवान म्हाविद्यालयाच्या सभाघरांत आयोजीत केल्ले पेटूल हे बालगीत आनी नाच कार्यावळीचो समारोप करतना सांगलें.
गोंयांत फाटल्या कांय वर्सां सावन व्हडा प्रमाणात भायल्या राज्यांतले लोक येवपाक लागल्यात. तांचें प्रमाण दीसपट्टे वाडत आसा. गोंयकार ताचें कडेन हिंदी भाशेंतल्यान उलतात ताका लागून  कोंकणी फकत घरांत उलोवपाची भाश जावपा कडेन पावल्या. सगल्या वेव्हारांत कोंकणीचो चडात चड वापर केलो जाल्यार फुडारांत गोंयच्या अस्तित्वाचो प्रश्न उप्रासतलो अशी भिरात मोजकारान उक्तायली.
ह्या वेळार साहित्यीक समुधा कामत, शिक्षक, चित्रकार राजमोहन शेट्ये, आमी पेडणेकार संघटनेचो अध्यक्ष केशव महाले, कॉलेजाचो प्राचार्य डॉ फिलीप रॉड्रिग्ज  हाजीर आशिल्ले. कोंकणी भाशा मंडळ अध्यक्ष अन्वेषा सिंगबाळान गांवांतली संस्कृती आनी कोंणणी भाशेंतल्या वेगवेगळ्या बोलींची गिरेस्तकाय तिगोवन रावची हे खातीर पेटूल कार्यावळीं वरवीं उर्बों दिवपाचें आयोजन करतता अशें सांगले.
सरकारी प्राथमीक विद्यालय, केरी, तळवाडा, पेडणें, सरकारी प्राथमीक विद्यालय, विर्नोर्डे, पेडणें, सरकारी प्राथमीक विद्यालय, वळपें, पेडणे, सरकारी प्राथमीक विद्यालय, आरोबा, पेडणें, हुतात्मा मनोहर पेडणेकार सरकारी उच्च प्राथमीक विद्यालय, पेडणे, सरकारी प्राथमीक विद्यालय, मुरमूसे, तुयें , पेडणें, सरकारी प्राथमीक विद्यालय, मधलावाडा, पालयें, पेडणें, सरकारी उच्च प्राथमीक विद्यालय, हसापूर, पेडणे, अंकुरम, किडझी, पेडणे, न्यू इंग्लीश हायस्कूल, केरी, पेडणे, सेंट झेवीयर हायस्कूल, कोरगांव, पेडणें आनी संत सोहिरोबानाथ आंबिये, कला आनी वाणिज्य म्हाविद्यालय, विर्नोडा, पेडणें  हांगच्या  विद्यार्थ्यांनी  नाच सादर केलें. कार्यावळींत वांटेकार जाल्ल्या सगल्या विद्यार्थ्यांक सोयऱ्यांचे हस्तुकीं भेटवस्तू आनी यादस्तिकां भेटयलीं.
कार्यावळी खातीर नेस्ले कंपनीन  गिफ्ट हॅम्पर्स पुरस्कृत  केले. आमी पेडणेकर हे संस्थेन कार्यावळ  घडोवन हाडपाक मजत केली. पेडणे तालुक्यांतले सुमार 300 विद्यार्थी पेटूल कार्यावळींत वांटेकार जाल्ले. कार्यावळ येसस्वी करपा खातीर पेडणे सरकारी म्हाविद्यालयाची प्राध्यापिका  प्रियांक परब आनी मानसी धावस्कार हांणी परिश्रम घेतले. सूत्रसंचालन सोनम पिळणकार केलें आनी आमी पेडणेकार संघटनेचो भांडारी वल्लभ बर्वे हांणे उपकार मानले.