भांगरभूंय | प्रतिनिधी
(फिक्स्ड डिपॉझिटांतल्यान शारांतल्या तांच्या जेवणा- खाणाची तजवीज करप जाताली. ही ओडाताण तांकां खबर आशिल्ल्यान शारांत रावुनय तांणीं गरजे भायर खर्च केन्ना केलोना… आतां मुखार….)
आमच्या भुरग्यांची ही समजिकाय आमकां खबर आशिल्ल्यान हे भुरगे प्रकल्पांत रावून आमकां आदार करतले, हाची खात्री आशिल्ली. प्रकल्पाक पंचवीस वर्सां पुराय जाल्ले खातीर जो सुवाळो जालो तातूंत दिगंतान हांगांच रावून काम करपाचें जाहीर केलें. तेन्ना आमकां कोणाक ताचें अजाप बी दिसलेंना. 26 डिसेंबर 1998 क हो मेळावो जालो. योगायोगान त्याच दिसा बाबांचो आनी म्हजो जल्मदीस. भुरग्यांनीं हो मेळावो मोट्या प्रमाणान करपाचो थारायलें. सगळ्यांक पत्रां धाडलीं. त्या वेळार बाबांन सदांच्या पद्दतीन दिगंताक स्पश्ट विचाल्लें,
“तूं हांगांच काम करतलो हें ह्या मेळाव्यांत जाहीर करप मरे ? सारको विचार कर. एकदां थारायलें की फाटीं सरपाक मेळचेंना. आनी नक्की आसा तर तें जाहीर करपाक ह्या मेळाव्याखेरीज बरो दुसरो जागो ना.” दिगंताचो विचार पक्को जाल्लो. ताका लागून तशें ताणें ह्या मेळाव्यांत सांगून उडयलें. अनिकेतालें तेन्ना शिकप चालू आसलें. म्हुणून ताणें जाहीर करूंना इतलेंच. पूण तोय फाटोफाट आमकां येवन मेळ्ळो.
आमी आनी आमच्या कार्यकर्त्यांनीं पंचवीस वर्सां हो प्रकल्प चलयलो. हें काम थांबूंक नाका अशी आमची सभावीक इत्सा आशिल्ली. दिगंत आनी अनिकेत ह्या कामांत आपस्फुर्तेन वांटो घेवपाक लागले. ताका लागून आमकां सगळ्यांकच मनांतल्यान खुशालकाय जाली. फुडें 2003 क दिगंताचें लग्न जालें आनी आमच्या प्रकल्पाक आनीक एक दोतोर मेळ्ळो.
ताच्या लग्नाची गजाल उगडास उरपा सारकी, सांगपा सारकी आसा. लग्ना पयलीं दोन वर्सां सावन आमी जायरात दित आसले. सामकें नांवा सयत.
‘चली दोतोर आसपाक जाय आनी ताची प्रकल्पांत रावपाची तयारी जाय,’ इतल्योच दिगंताच्यो अटी आसल्यो. बरो प्रतिसाद येतलो अशें आमकां दिसतालें. पूण खरेंपणीं तशें घडलेंना. प्रतिसाद इतलो कमी आसलो की निमाणें दोतोर चलयेची अट सोडून दिवची, ह्या विचारा मेरेन आमी पाविल्ले. तितल्यांत गोंयांतल्यान एक फोन आयलो. फोंडेच्या अनघा साधलेन आमची जायरात पळयिल्ली आनी ताच्या आवय- बापायन आमचे कडेन संपर्क केलो. अनघा गायनॅकॉलॉजिस्ट आशिल्लें. आमकां आनंद जालो. उलोवणीं जावचे पयलीं भुरग्यांनीं एक फावट मेळचें अशें थरलें. अनघा गोंयांत आनी दिगंत हेमलकसाक. हीं दोन पोतां आशिल्ल्यान निमाणें ह्या दोगांनीय पुण्यांत मेळपाचें थारयलें. विलासालो भाव अशोक मनोहरागेर ही भेट जाली. ह्या भेटेंत दिगंतान ताका कामाचें रुप स्पश्टपणान सांगलें. हेमलकसा कितलें पयस, कितलो रानवटी वाठार आसा ताची कल्पना दिली. ह्या कामा खातीर कांय रोमँटिक कल्पना बाळगिनाका, अशेंय सांगलें. अनघाचो बापूय, भाव , वयनी आर्किटेक्ट आनी घरदार सांबाळपी आवय. ताच्या बापायन गोंय सुटके झुजांत वांटो घेतिल्लो. गोंयच्पा पर्यावरण राखणे खातीरय वांटेकार जावपी ते एक नामनेचे गोंयकार. हेमलकसाचें आयुश्य वेगळेंच आसतलें म्हुणून सांगलें, पूण अनघान तयारी दाखयली.
तरीकय कसल्या अडचणींच्या परिस्थितींत रावपाक पडटलें हाची सगळ्यांकच कल्पना येवची आनी मागीरच लग्नाचें कितें तें थारावचें, अशें दिसतालें. त्याप्रमाणें अनघा आनी ताच्या आवय-बापायन हेमलकसाक येवपाचें थारायलें. तीं सगळीं नागपूराक आयलीं. थंयच्यान आनंदवनांत. मागीर आनंदवनांतल्यान विकास आनी भारती तांकां हांगां घेवन येवपाक भायर सल्लीं. खरें म्हळ्यार बाबांन तांच्या खातीर बरी गाडी धाडिल्ली, पूण ती इतल्या फावट बंद पडली की तांकां नागेपल्लीक जगनागेर पावपाकच रातचीं बारा जालीं. आनी तांकां हेमलकसाक पावपाक दुसऱ्या दिसाची सकाळ उदेली. हेमलकसा हें प्रकरण कितलें कठीण हाची झलक तांकां पयल्याच दिसाक मेळ्ळी. पूण हांगां पावल्या उपरांत त्या सगळ्यांक हेमलकसा आवडलें. तेन्ना हांगां लायट, टीव्ही, फोन ह्यो सगळ्यो सुविधा पाविल्ल्यो. ह्या सगळ्याची अपेक्षाच नाशिल्ल्यान अनघाक अजापाचो धक्को बसलो.
मागीर लग्न खंय करपाचें, कशें करपाचें, हीच भासाभास जाली. बाबांच्या दोळ्यां सामकार लग्न जावचें अशी म्हजी इत्सा आसली. तांकां खंयय हालोवप शक्य नासलें. ताका लागून आनंदवनांतच लग्न थारायलें. दीस आसलो 28 सप्टेंबर, आयतार. लग्न सामकें साद्या पद्दतीन जालें.
लग्ना पयलीं दिगंतान तपासणेघरांत काम सुरू केल्लेंच. ताच्या सांगाताक आतां ताची दोतोर घरकान्न अनघा येतकच ह्या दोगांनीय मागीर सवका-सवका जापसालदारकी आपणा कडेन घेतली. हांवें आनी मंदान ज्या लागणुकेन तपासणेघरांत काम पळयलें, त्याच लागणुकेन हीं दोगांय प्रकल्पांतलें तपासणेघर सांबाळटात. जायत्यो नव्यो- नव्यो कल्पना लागू करपाचो यत्नय तीं करतात. क्लिनीकांत आर्विल्लीं उपकरणां येवचीं हाचे कडेन जशें तांचें लक्ष आसता, तशेंच कार्यकर्त्यांचो आंकडो कसो वाडटलो हाचे कडेनय तीं लक्ष दवरतात. हांव आनी मंदा जेन्ना पुराय वेळ तपासणेघर पळयतालीं, तेन्ना पेशंटां खातीर बारा म्हयने चोवीस वरां क्लिनिक चालू आसतालें. पूण आतां ह्या सगळ्या कामांत दिगंत शिस्त हाडपाक पळयतालो. सद्दां फांतोडेर पांच वरांचेर तपासणेघर सुरू जाता. दनपारां बारां तें अडेच हो वेळ सोडलो जाल्यार तपासणेघर दीसभर चालू आसता. फांतोडेर पांचाक दिगंत दवाखान्यांत उपस्थित रावता. आनी दरदिसा दनपारां अडेच वरां जशी दवाखान्याक विश्रांती दितात तशेंच आयताराक पुराय दीस सुटी घेतात. पूण इमर्जन्सी पेशंटां खातीर दवाखानो चोवीस वरां सुरू आसताच. ह्या नव्या वेवस्थेची हांगच्या पेशंटांक आतां संवय जावपाक लागल्या. आनी ताका लागून दिगंत- अनघा हांच्या इत्से प्रमाणे वेवस्थेक आकार येवपाक लागला.
आमच्या वाठारांत कुपोशण जाल्ल्या भुरग्यांची समस्या खूब मोटी आसा. भुरग्यां मदलें कुपोशण सोंपयल्या बगर हांगच्यो फुडल्यो पिळग्यो निरोगी जांवक शकनात. हो मुद्दो मतींत दवरून तांणीं भुरग्यांक प्रोटिन्स वखदां दिवपाक सुरवात केली. पूण तीं वखदां परवडना जालीं, म्हुणून मागीर अनघान मांडणी काडली. तांचो चलो- अर्णवाक आमी दाळ-तांदूळ एकठांय करून ताच्या पीठाची पेज दितालीं. होच प्रयोग त्या भुरग्यांचेरय करप, असो विचार तांणीं केलो आनी त्या भशेन तांकां हो आहार दिवपाक सुरवात केली. ह्या प्रयोगाचे बरे रिझल्टस दिसपाक लागल्यात. अशो जायत्यो नव्यो गजाली करपाक नव्या पिळगेन सुरू केल्यात.
आमचे कडेन आइल्लो पेशंट नवो आसत तर ताची एचआयव्ही टेस्ट करपाची रीत ही तातूंतली एक. पेशंट्स तपासतना आनी उपचार करतना आमी केन्नाय ग्लोव्हज बी घाले नात. पूण नवी पिळगी ह्या बाबतींत चड सतर्क आसा. आमच्या तेंपार पावसाळ्यांत पिडेस्ता मेरेन पावप वा पिडेस्ताक आमचे मेरेन पावप खूबच कठीण काम आसतालें. आमचे कडेन पेशंट पळोवंक वचपाक वाहन नाशिल्ल्यान आमी पयस खंयच्या तरी गांवांत आशिल्ल्या पेशंटा मेरेन पावपाक शकनाशिल्ले. ताका लागून न्हंयो- व्हाळ पार करीत पेशंटाक आमचे कडेन येवचें पडटालें. पूण नवे पिळगेन तपासणेघराच्या वेवस्थेंत मोबायल व्हॅनीची भर घाल्ल्यान पयसुल्ल्या गांवांतल्या पिडेस्तांक बरी सुविधा मेळ्ळ्या.
(मुखार चलता)
प्रकाशवाटा (मूळ लेखक : डॉ. प्रकाश आमटे)
देविदास गजानन नायक
98505 35051
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
