भांगरभूंय | प्रतिनिधी
पणजी : राज्यांत पर्यटनाचो हंगाम सप्टेंबराचे निमाणे कडेन सुरू जालो. सुरवातेक उणी दिसपी पर्यटकांची गर्दी नोव्हेंबराचे निमाणे कडेन वाडली. सेंट फ्रान्सीस झेवियर फेस्त, नातलां, सनबर्न, नव्या वर्सा निमतान जायते पर्यटक गोंयांत आयले. आतां कार्निवल तशें शिगमोत्सवाचे फाटभूंयेरूय परदेशी नागरीक गोंयचे दिकेन वळटात. गोंयच्या मनभुलयण्या दर्यादेगां वांगडाच गोंय सरकार आनी पर्यटन खात्या खाला सुरू जाल्लें हिंटरलँड पर्यटनाचे विवीध उपक्रमूय आंतरराष्ट्रीय पर्यटकांक भूल घालता. तशेंच आध्यात्मीक आनी सांस्कृतीक पर्यटना खातीर गोंयांत येवपी पर्यटकांचो आंकडोय वाडला.
अमेरिकेक रावपी आंतरराष्ट्रीय बुकींग पोर्टल एक्सपेडियान हालींच एक अहवाल प्रसिद्ध केलो. २०२४ वर्सा इंचभर प्रमाणांत फाटीं पडले उपरांत गोंयान परत आपली सुवात ‘इंटरनेशनल डेस्टीनेशन्स’ हातूंत बळीश्ट केल्या, अशें तातूंत म्हणलां. गोंय पर्यटनान ह्या वर्साची सुरवात बरी जाल्या अशें दिसता. एक्सपेडियाच्या २०२५ एअर हॅक्सच्या वर्सुकी संशोधन अहवाला प्रमाण, गोंय जानेवारी २०२५ सावन सेगीत ट्रेंडांत आसा. आंकड्यांत सांगपाचें जाल्यार एक्सपेडियाचेर गोंयां खातीर फ्लायट बुकींग करप्यांची फाटल्या दोन वर्सांचे तुळेंत वट्ट १५५ टक्के वाड जाल्या.
हे वळेरेंत गोंयां उपरांत रोमानियाचे बुखारेस्ट (१५० टक्क्यां परस चड), मेक्सिकोचे तिजुआना (८५ टक्क्यां परस चड), इटलीचे पेरुगिया (७० टक्क्यां परस चड) आनी चीनचे चेंगडू (६५ टक्क्यां परस चड) हांचो क्रमांक लागता. ट्रॅव्हल अँड टुरिझम असोसिएशन ऑफ गोवा (टीटीएजी) चे अध्यक्ष जॅक सुखीजा हांणी गोंयच्या आंतरराष्ट्रीय विमान बुकिंगांतल्या घटमूट ट्रेंडाचें श्रेय ताच्या घटमूट टुरिझम ब्रँड आनी भारतांत येवपी परदेशी पर्यटकां मदीं आशिल्ले लोकप्रियतेक दिलें.
२०२४ च्या मजगतीं सोशल मिडियाचेर गोंयची बदनामी करपी जायते व्हिडिओ व्हायरल जाले. तशेंच दर्यादेग वाठारांनी पर्यटकांक मारपेट आनी खुनाच्योय घडणुको घडल्यो. जायत्या जाणांनी पोस्ट करून गोंयचो कायदो, सुवेवस्था आनी पर्यटन मळाचेर टिका केली.
गोंयांत येवपी वट्ट पर्यटकांचो आंकडो २०२३ त ८६.२८ लाख आशिल्लो, तो २०२४ त १.०४ कोटीं परस चड जालो. आमी कॉंटीटी (पर्यटकांचो आंकडो) हाचे कडेन लक्ष दिनासतना कॉलिटी कडेन फोकस केलां. पर्यटकांक मुळावी सुविधा दिवपा खातीर विवीध मार्ग आपणायतात. नव्या गजालींची उदरगत करपाचेरूय भर दितात. तशेंच गोंयच्या पर्यटन मळाविशीं जागृताय करपा खातीर विदेशांत एक्स्पो आनी विवीध प्रदर्शनांनी वांटो नोंद करतात. येवपी काळांत हाचो फायदो नक्की जातलो अशें जानेवारींत जाल्ले एके बसकेंत पर्यटनमंत्री खंवटे हांकां खात्याच्या ऍप्रोचा विशीं विचारलें तेन्ना तांणी सांगिल्लें.
गोंय सरकार आनी पर्यटन खातें गोंयच्या पर्यटनाची आध्यात्मीक आनी सांस्कृतीक बाजू संवसारा मुखार मांडपा खातीर विवीध उपक्रम राबयता आनी ताचें फळीय येवपी काळांत नक्की मेळटलें. आतां एक्सपेडियाच्या ह्या अहवालान गोंयच्या पर्यटन मळाक खोशी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
