गोंयची संस्कृती, कला सोंपोवपाचो यत्न : आरजीपी

भांगरभूंय | प्रतिनिधी

पणजीः गोंयचे अस्मिताये वांगडाच गोंयची संस्कृती आनी कला सोंपोवपाक सोदता हें कला अकादमींत घडिल्ले घडणुके वयल्यान दिसून येता. जर अशेंच चलत उरलें जाल्यार आंतरराष्ट्रीय कलाकार जे कला अकादमींत येतात ते वायट अणभव घेवन वतले आनी कला अकादमीचें नांव संवसारभरांत पेड्डेर जातलें, असो आरोप रिव्ह्युलेशनरी गोवन्स पक्षाचे अध्यक्ष मनोज परब हांणी केलो.

कला अकादमींत लायटीच्या तंत्रीक बिघाडाक लागून नामनेचे अभिनेते शरद पोंक्षे हांकां आपल्या नाटकाचो चालू प्रयोग मदीच कांय वेळा खातीर थांबोवचो पडलो. हे घडणुकेचेर मनोज परब आपली प्रतिक्रिया दिताले.

जें अकादमींत घडलां तें गोंया खातीर लजेक घालपी गजाल. कला अकादमीचें नांव पुराय संवसाराचेर फामाद आसा. हे वास्तू भोंवतणचो वाठार खुबूच सुंदर आसा. अशे तरेच्या वाठारांत आशिल्ल्यो अश्यो वास्तू खूब उण्या सुवातांचेर आसात. हेच खातीर संवसारभरांतल्या कितल्याश्याच कलाकारांनी हे वास्तूंत आपली कला सादर केल्या आनी बरो अणभव घेवन गेल्यात, अशें मनोज परब हांणी म्हणलें.

कला अकादमीच्या दुरूस्तीकामा उपरांत एकेक गजाली पेड्डेर जायत आसात.  हाचीच आनीक एक देख पळोवपाक मेळ्ळी. मराठी नाटकाचो प्रयोग चलतालो तेन्ना माचये वयले लायटींत तंत्रीक बिघाड जालो आनी प्रयोग रंगलो ना. इतलें बरें नाटक तांकां फ्लड लायटीचेर चलोवचे पडलें. नाटकाच्या प्रभावांत उजवाड येवजणेचो व्हड वांटो आसता. तांकां कला अकादमीचे आवाज यंत्रणेचेर विस्वास नासलो हे खातीर तांणी ताची स्वता वेवस्था केल्ली. लायटीची वेवस्था सारकी ना हें जर तांकां कळिल्लें जाल्यार ताची लेगीत ते वेवस्था करपाचे, अशी टिका मनोज परब हांणी केली.

ही परिस्थिती कित्याक जाल्या आनी कशी जाल्या हाचेर फावो ती चवकशी करतले अशी विधानसभेंत कितलेशेच खेपे आस्वासनां दिल्लीं, पूण अजून मेरेन कसलीच हालचाल जावंक. 50-60 कोटी रुपया मोडल्यात ते कोणाच्या बोल्सांत गेल्यात हाची चवकशी जातली अशें दिसना. पूण लोकांनी लक्षांत दवरपाक जाय, भाजपाक गोंयची वळख, गोंयच्या नांवाचें मातूय पडिल्लें ना, असो आरोप मनोज परब हांणी केलो. गोंयचें नांव पर्यटनाक लागून इबाडलांच, आतां राष्ट्रीय – आंतरराष्ट्रीय कलाकार कला अकादमींत आयले जाल्यार वायट अणभव घेवन वतले ते हेरांक कला अकादमींत वचूं नाका, असो सल्लो दितले, असो दावो मनोज परब हांणी केलो.