भांगरभूंय | प्रतिनिधी
गोंय सरकाराची म्हत्वाकांक्षी ‘म्हजी बस’ येवजण अखेरेक चालीक लागता. बरी गजाल. अर्थसंकल्पांत तिची घोशणा जाल्ली. खुद्द कदंब येरादारी म्हामंडळान ते खातीर यत्न केल्लो, पूण कांय बसधनयांक सरकार दिता तें भाडें पसंत नाशिल्लें. ही येवजण मदीं ताका लागून रद्दूय जाल्ली. मात, खाजगी बसधनी घडये आतां तयार जाल्या आसतले. सरकार दिता तें भाडेंय तांकां मान्य आसतलें. प्रवाशां खातीर ही खोशेची गजाल. मात सध्या चलता तशी अनियमित येरादारी चल्ली जाल्यार, ‘बाटली नवी, सोरो पोरणोच’ असो प्रकार जातलो आनी सध्या आसा तेंच चलत रावतलें. अशें जावंक फावना. येवजण सुरू जातली तेन्ना येरादारी सुदारपाक जाय. फक्त फायदो आसा थंय आनी तेन्नाच गाडयो धांवपाक जायना.
सध्या पणजी- फोंडें- सांवड्डें, मडगांव- काणकोण, मडगांव – केपें- सांवड्डें -सांगें ह्या तीन मार्गा वयल्यो सगल्यो खाजगी बशी कदंब म्हामंडळ घेवपाचें आसा. ताचेर स म्हयने अभ्यास जातलो आनी उपरांतूच पुराय राज्यांतल्यो खाजगी बशी सरकार चलोवपाक घेतलें. कोरोनाच्या काळांत आनी उपरांत वेवसायांत मात्त पसून फायदो जायना, अशें पेजाद कारण खाजगी बसधनयांनी बरेच खेप दिलां. म्हणटकच सरकाराक बशी दिवपाक ते अनमनचे नात. फाटीं ड्रायव्हर, डिझेलाचो खर्च दिवन वयर म्हयन्याचें भाडें दिवपाची घोशणा सरकारा वतीन जाल्ली. पूण हे येवजणे खातीर कोणूच मुखार येवंक नाशिल्ल्यान ती बंद जाली. आतां वयल्या तीन मार्गांचेर आनी उपरांत हेर कडेन घडये ‘म्हजी बस’ येवजण चालीक लागतली, अशी आस्त बाळगुया. कारण कोरोना काळांत बऱ्याच मार्गां वयल्यो खाजगी बशी बंद जाल्यात वा पर्यटन, उद्देग मळां कडेन जोडल्यात. बशी नाशिल्ल्यान खाजगी गाडयांचो आंकडो आनी अपघात हिस्पा भायर वाडल्यात. वर्साक 300 जाण अपघातांत मरताले, तो आंकडो अंदूं चारशेंक तेंकपाची भिरांत आसा. कारण अक्षरशा दर दिसा अपघात जातात. भौशीक येरादारी वाडल्यार अपघातांचो आंकडो उणो जावपाक मजत जातली. सुटयो, आयतारा दिसा खाजगी आनी कदंब बशी धांवतल्यो हाची खबरदारी घेवंक जाय. कारण ते दीस सगलेच कडेन कमी गाडयो आसतात. गांवांनी भितर वचपी बशी तर दुरुस्ती खातीर बंद आसतात. कोरना काळांत हजारांनी रुपयांचें लुकसाण जाल्ले बसधनी आतां ‘म्हजी बस’ येवजणेक लागून फायद्यांत येतले. म्हणटकच फुडल्या वर्सा शेंकड्यांनी गाडयो हे येवजणे खाला चलतल्यो, अशें दिसता. सरकारान हे येवजणे खातीर 18 कोटी 19 लाख रुपयांची तजवीज केल्या.
खाजगी बसधनी खाजगी बशी नुकसाणेंत वचपाचीं कारणां सांगतात. सरकारी कर्मचारी खंय खाजगी गाडयांनी आपल्या वांगड्यांक घेवन कामाक वतात. कोरोना काळांत कदंबाच्यो जादा बशी चालू जाल्ल्यो त्यो अजून बंद जावंक नात, खंय. पर्यटन बशीय प्रवाशांक व्हरतात, सरकारान डिझेलाचेर अनुदान दिवपाचें बंद केलां. आतां पांच वर्सां पयलींचे बशीचेर अवलंबून रावपाचे दीस गेले. सगले जाण स्वताच्यो गाडयो घेवन प्रवास करतात. जीव मुठींत घेवन. खाजगी बशी कमी जाल्यात म्हूण तांकां हें करचें पडटा, हें वेगळें सांगपाक नाका. हें अशेंच चलत रावल्यार हाचे आदीं ह्याच स्तंभांत म्हणलां ते प्रमाण, 2030 मेरेन खाजगी बशीच बंद जावपाची शक्यताय आसा वा सगळ्योच बशी सरकाराच्या ताब्यांत वतल्यो.
खाजगी बशी कदंब म्हामंडळ चलयतलें, तरी येरादारीचे बाबतींत एकाधिकारशाही जावन उपेगी पडचीना. वाळपय ते पणजी मार्गा वयल्यो कांय बशी पणजे वचनासतना म्हापशेंच्या परततात. मात, ही गजाल येरादारी खात्याक खबर ना. आसल्यार तांच्या दोळ्यांचेर साय आयिल्ल्यान तांकां ते दिश्टी पडना. कदंब म्हामंडळ कदंब आनी खाजगी बशींच्या प्रवाशांक बशीचें वेळापत्रक दिसचें म्हूण इंटिलिजेंट मॅनेजमेंट सिस्टमीची वेवस्था करपाचें आसा. ताचेर तिकेटीय बूक करपाक मेळटल्यो. हाचे आदीं पेटीयमा वयल्यान तिकेट आनी हेर खूब कितें सुरू केल्लें. ताका कितलो प्रतिसाद मेळटा, तें कोणाक खबर आसचें ना. इलेक्ट्राॅनीक बशी घेवपाची घोशणा परतून जाल्या. पूण व्हडल्या आकाराक लागून ह्यो बशी गांवांनी व्हरपाक मेळनात. कोरोना पयलीं आनी उपरांत राज्यांतल्या मार्गांचेर कितल्यो बशी आशिल्ल्यो/ आसात ताचो आंकडो मेळत जाल्यार राज्यांतल्या येरादारी मळाचेर उजवाड पडटलो.‘म्हजी बस’ येवजण चालू जावची, राज्यभर पातळची आनी तिचे वरवीं प्रवाशांक थाकाय मेळची, अशीच सगल्यांची इत्सा आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
