भांगरभूंय | प्रतिनिधी
पणजीः भौशीक अर्थीक मळार गोंयची कामगिरी प्रभावी थारल्या. अरुण जेटली नॅशनल इन्स्टिट्यूट ऑफ फायनान्शियल मॅनेजमेंटान हालींच जाहीर केल्ल्या अहवाला प्रमाण गोंय 0.68 गूण मेळोवन देशांत तिसरे सुवातेर आसा. गोंयान अचीवर वर्ग साध्य केला. हे क्रमवारींत ओडिशा (0.78) आनी गुजरात (0.70) अनुक्रमान पयल्या आनी दुसरे सुवातेर आसात. राष्ट्रीय सरासरी 0.58 अंक आसा. फाटल्या धा वर्सां सावन सगल्या राज्यांचे ऑडीट केल्ल्या अर्थीक म्हायतीचेर आदारून ही क्रमवारी हे संस्थेन जाहीर केल्या.
क्रमवारी तयार करतना संस्थेन अर्थीक वेवस्थापनाच्या स मुखेल आनी 23 उपवर्गांतल्या दरेका राज्याच्या कामगिरीचो नियाळ घेतलो. राज्यांक स वर्गांत गुण दिले आनी उपरांत वट्ट गूण थारायले. तातूंत संसाधनां, खर्च, तूट, रिण, आकस्मीक देयता (रिण) आनी अतिरिक्त खर्च हांचो आस्पाव जातालो. हाचे भायर राज्याची स्वताची आनी एकूण येणावळ, उदरगत कामां, शिक्षण, भलायकी, अर्थीक तूट, जीएसडीपी, वट्ट दायित्व, महसूल खर्च, अनुदान, पेन्शन खर्च हांचोय विचार केलो.
संसाधन वेवस्थापन विभागांत गोंय 0.86 गूण मेळोवन दुसरे सुवातेर आसा. ह्या वर्गांत तमिळनाडू पयल्या क्रमांकाचेर आसा. खर्च वेवस्थापनांत गोंयाक उणे गूण मेळ्ळे. ह्या वर्गांत गोंय धावे सुवातेर आसा. वित्तीय तूट वेवस्थापन वर्गांत गोंय तिसऱ्या क्रमांकाचेर, रिण वेवस्थापन वर्गांत, धावे सुवातेर, अवलंबन वर्गांत, चवथ्या क्रमांकाचेर आनी अतिरिक्त अपव्यय (खर्च) वर्गांत गोंय 0.71 गूण मेळोवन सातव्या क्रमांकाचेर आसा. ह्या अहवालांत गोंय आनी हेर 17 राज्यांचो सामान्य गटांत आस्पाव केला. जाल्यार ईशान्ये कडल्यान आयिल्ल्या आठ राज्यां वांगडा हिमाचल प्रदेश आनी उत्तराखंड हांचो आस्पाव ह्या खाशेल्या गटांत जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
