भांगरभूंय | प्रतिनिधी
गोंयच्या मातयेंतल्या
गोंयच्या मनशा
गोंयची पावन
भांगरभूंय.
म्हान जाली ल्हान जरीय
नमन करता तिका लोकशायूय…
लोकशायेचो दीस म्हूण आमी 26 जानेवारीक मनयतात. आमच्या भारत भुंयेची आनी भुंयेंतल्या लोकांची ही राष्ट्रीय परब. मनांत आपले भुंये विशीं अभिमान आशिल्ल्या दरेक नागरिकाचो हो उत्सव. श्रीराम जेन्ना वनवास वचपाक अयोध्येंतल्यान भायर सरलो तेन्ना तांणी आपल्या अयोध्येंतली माती आपल्या शेंल्यांत गुठलावन व्हेली. आनी उपरांत आपूण रानांत खोंप करून रावलो. थंय तीं माती ताणें पुजेक लायली. केदी व्हड गजाल ही रामायणांतली? श्रीराम हें पुरूष उत्तम म्हूण तें ‘पुरूषोत्तम’ आशिल्ल्याचे सगलेच जाणां, पूण ताच्याच वांगडा आपले जल्मभूंये विशीं आशिल्ली देवत्वाची तशेंच मातृत्वाची भावना आमकां तांच्या भितर दिसून येता. आपूण खंयूय पावूं, खंयूय वचूं, पूण आपले पांय आपल्या भुंये कडेन वळपाकूच जाय. आपली नाळ आपल्या मातये कडेन जुळिल्ली आसल्यारूच आपली उदरगत खरें तरेन अर्थपुराय थारता. कारण ज्या मातयेंतल्यान किल्लून आपूण व्हड जालो तें मातये बद्दल मनांत अभिमान आनी उमाळी आसप हेंवूंय एक मनीसपणाचें लक्षण.
गोंयच्या मातयेंतलो कावी कलाकार बाब सागर नायक मुळे हेवूय अशीच एक देख घालून दिवपी आनी आपल्या मातयेचेर कलेच्या माध्यमांतल्यान मोग करपी अशें गोंयकार. भारताच्या लोकशायेचो हो उत्सव म्हळ्यार दरेक भुंये पूताचो, भारताच्या सगळ्या लोकांचो, लोकांनी लोकां खातीर चलयल्ल्या लोकसत्तेक असो हो खोशीयेभरीत खीण. कावीकलाकार सागर हांणी ल्हान तरीय म्हान अशा भांगराळ्या मातयेक ताचे कडेन आशिल्ल्या कावी कलेच्या माध्यमांतल्यान राष्ट्रीय सुवातेर कर्तव्यपथार पावोवपाक आपले कलेक माध्यम केलें. एके तरेन तिका मानाच्या पाटार सुवात प्रजासत्ताक दिसाच्या सुवाळ्यांत करून दिली ही एक अभिमानाची गजाल. गोंयकारांचे हड्डें व्हडाभिमान मुखार येतलें असोच हो खीण. तशेंच गोंयचें प्रतिनिधित्व करून गोंयची संस्कृताय आनी गोंयचे दायज प्रजासत्ताक दिसा सुवाळ्याक राष्ट्रीय पांवड्यार परेड सादरीकरणांतल्यान आनी कलाविष्कारांतल्यान संवसारा मुखार दवरपी सगल्या गोंयकार कलाकारांची तोखणाय करीन दिसता. कर्तव्यपथाचेर जेन्ना गोंयची कलाकृती चलता तेन्ना होवूय खीण आमकां खोस देणो थारता.
आयकून खूब्ब धादोसकाय मेळ्ळी की जे भुंयेची माती बाळ रामाचे देवूळ बांदपाक अयोध्ये मेरेन पावलीं आनी मर्यादा पुरूषोत्तमाच्या पांयां कडेन पावन जाली, तशेंच आमच्या लोकशायेचे प्रतिनिधित्व करपी आनी लोकशायेचे घर आसपी आमच्या नव्या संसद भवनाच्या बांदकामाक आमच्या गोंयांतल्या गांवागांवांतली माती व्हेल्ली. तीच म्हजा गोंयच्या भुंयेंतली माती कावी कलेच्या रूपांत व्हडा कलात्मकतायेचो साज चडोवन प्रजासत्ताक दिसाच्या परेडींत सोबून उरली. गोंयची माती हीं गोंयच्या मनशाची अस्मिताय. तिचो परमळ गोंयकाराच्या काळजांत आसा. हांगसरलोलो कलाकार, शेतकामती, तशेंच दरेक नागरीक तिची व्हडविकाय गायता. गांवागांवांनी तिका सांतेर, म्हामाय, भुमिका आदीं मातृ देवतेंच्या रूपांत पुजता. शिगमो, धालो, जागोर आदीं मांडांच्या रूपांत तिका आदर दिवून मोट्या स्रध्दा भावार्तान भोवमानतात. अशीं भांगरभूंय सांबाळपाची जापसालदारकी आमचें देव देवचार, राखणदार, थळेकार, जागेकार हांच्या सयत तांचो आशीर्वाद घेवन आमची सगळ्यांचीय आसा. गोंयची भांगरभूंय, गोंयचो मनीस सासणाचो जैतिवंत थारूं, हेंच मागणें!
गौरांग गोकुळदास नायक
[email protected]
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
