भांगरभूंय | प्रतिनिधी
पणजीः पर्यटनाच्या नकाशाचेर गोंय हें सदांच एक आकर्शणाची भूंय जावन आसा. दर्यावेळ, नायटलायफ आनी पार्टी डेस्टिनेशन अशीच गोंयची प्रतिमा संवसारभर आसा. पूण ह्या चकचकपी प्रतिमे भायर गोंयची एक खरी काणी आसा ती म्हळ्यार परंपरा, दायज, संस्कृती आनी सैमाची. हीच खरी वळख प्रेक्षकां मुखार हाडपा खातीर हेरिटेज फॉर सस्टेनेबिलिटी चित्रपट महोत्सवाचें आयोजन केलां, अशें हेता पंडित हांणी सांगलें.
हेरीटज फॉर सस्टेनेबिलिटी चित्रपट महोत्सव हे कार्यावळी फाटल्यान भोव मोलाचो वांटो आसा. हेरिटेज फर्स्ट गोवाच्यो संचालिका हेता पंडित हांचो. फाटल्या वर्सभरा सावन तांणी वेगवेगळ्यो दायज भोंवड्यो, कार्यशाळा आनी गांवांगांवांनी वचून कथाकथनाच्या उपक्रमांवरवीं गोंयच्या संस्कृतायेचो नियाळ घेतला. आतां हे सगले यत्न एकठांय करून प्रेक्षकां खातीर तांणी ते पड्ड्यार हाडल्यात.
गोंयांत लाखांनी पर्यटक येतात आनी तरीय लेगीत उण्याच कांय लोकांक खर्या गोंयां विशी खबर आसा, ताचे काणये विशीं खबर आसा. ते परततना गोंय हें एक पार्टी डॅस्टीनेशन ह्याच विचारान परत वतात! घडये आमचो हो यत्न लोकांची ही धारणा एके बरे दिकेन व्हरपा शकता! अशें पंडित सांगता.
28 सप्टेंबर दिसा इएसजी ऑडिटोरियम, पणजी हांगा हो महोत्सव आयोजीत केला. जातूंत 13 चित्रपट आनी डॉक्युमेंटरी प्रेक्षकांक दाखयतले. ब्रेड अँड बिलॉंगिंग, आयलंड्स ऑन द आयलंड, खारवन, बर्डमॅन ऑफ चोराव, काझू आनी आय एम नथिंग ह्या सारक्या चित्रपटांतल्यान गोंयची खरी वळख प्रेक्षकांक जातली. ह्या फेस्टिव्हलाची खाशेलकाय म्हळ्यार महोत्सव संवसारीक पर्यटन दिसाच्या गोंय पर्यटन खात्यान कार्यावळीचो समारोप सुवाळो आयोजीत केला. टीटीएजी आनी स्कॉल इंटरनॅशनल गोवा हांचे सारक्या संस्थांचो पालव मेळिल्ल्यान हे कार्यावळीक व्यापक फाटबळ मेळ्ळां.
गोंय ही फकत मजा आनी उमेदीचें थळ न्हय, जाल्यार ती समृद्ध संस्कृती आनी दायजाची भूंय आसा, हो संदेश ह्या महोत्सवातल्यान दिवपाचो यत्न आसा. पर्यटकां मुखार गोंयची खरी वळख करून तांचे अणभव आनीक समृद्ध करप होच या उपक्रमा फाटलो हेत आसा.
गोंयचे प्रतिमेक बदल घडोवपाचो हो प्रवास सिनेमाच्या माध्यमांतल्यान आनीक प्रभावी जावपाक शकता, असो विस्वास पंडित हांणी उक्तायला. तांच्या मता प्रमाण, पर्यटकांनी गोंयच्यान परत वतना फकत मजा केल्ल्यो यादी न्हय, जाल्यार गोंयच्या संस्कृतायेच्यो, दायजाच्यो आनी लोकांचे जिणेंतलो खरो अणभव घेवन वयचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
