भांगरभूंय | प्रतिनिधी
पणजी ः निती आयोगान हालींच जाहीर केल्ल्या अहवाला प्रमाण गोंयची अर्थीक भलायकी बरी आसा. आयोगान पयलेच खेपे राज्यांचो अर्थीक स्थिरताय निर्देशांक (एफएचआय) जाहीर केला. हे क्रमवारींत गोंय 53.6 गूणां सयत तिसऱ्या क्रमांकाचेर आसा. पयल्या क्रमांकाचेर ओडिशा (67.8 गूण) आनी दुसरे सुवातेर छत्तीसगड (55.2 गूण) आसा. हो निर्देशांक 2014 -15 ते 2022 – 23 ह्या अर्थीक वर्साच्या महालेखा परीक्षक (कॅग) अहवालाचेर आदारुन तयार केला.
राज्यांनी केल्लो गुणात्मक खर्च, येणावळ एकठांय करपा खातीर कर प्रणाली, अर्थवेवस्थेचें जबाबदारीन केल्ले वेवस्थापन, रिणाचो निर्देशांक आनी रिणाची स्थिरताय अशा पांच गजालींचेर आदारून ही क्रमवारी तयार केल्या. राज्यांची वैयक्तीक अर्थीक कामगिरी पुराय देशाच्या नदरेन म्हत्वाची आसा. ह्या कारणाक लागून एफएचआयन राज्यांनी देशाचे अर्थवेवस्थेंत केल्ल्या योगदानाचो अभ्यास केला. हातूंत राज्याची लोकसंख्या, वट्ट भौशीक खर्च, येणावळ, अर्थीक स्थिरताय हांचो आस्पाव आसा.
एफएचआय प्रमाण, गोंयान गुणात्मक खर्चांत 45.5 गूण मेळयल्यात. देशभरांतल्या गुणात्मक खर्चाच्या मळार गोंयचो क्रमांक देशांत आठवो आसा. महसूल वसुली खातीर कर वेवस्थेच्या वर्गांत गोंयान 87.1 गूण मेळोवन देशांतलें पयली सुवात मेळयल्या. अर्थीक साधनसंपत्तीच्या जबाबदार वेवस्थापनांत गोंयान 59.4 गूण मेळोवन दुसरो क्रमांक मेळयला. रिणाच्या निर्देशांकांत गोंय 51 गूण मेळोवन देशांत 10वे सुवातेर आसा. रिणाची स्थिरताय वर्गांत गोंय 25.2 गूण मेळोवन सातव्या क्रमांकाचेर आसा.
आयोगाची शिफारस
दीर्घकाळ अर्थीक स्थिरताय तिगोवन दवरपा खातीर गोंय सरकारान रिणाची स्थिरतायेचो फ्रेमवर्क तयार करचो. रिणाचें वेवस्थापन रणनितीचेर लक्ष केंद्रीत करपाक जाय. तशेंच प्रतिबद्ध खर्चाची व्याप्ती उणी करपा खातीर यत्न करचे अशीय सुचोवणी नीती आयोगान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
