भांगरभूंय | प्रतिनिधी
कांय देवळांत देवीची तीन रुपां तर फोंडेंच्या श्री म्हाळशेच्या देवळांत नवरात्रीच्या णवव्या दिसा देवीच्यो पांच मुर्ती बसयतात. मडकयच्या श्री नवदुर्गेच्या देवळांत देवीक मखरांत णव दीस वेगळ्या-वेगळ्या आसनांचेर बसयतात. फकत देवीची न्हय तर श्री शंकराच्या अवतारान सुद्दा तिका मखरांत बसयतात.
चवथ सोंपली काय पुराय गोंयांत वेध लागतात ते नवरात्रांचें. भारतभर नवरात्रां कशींय मनोवं पूण भांगराळ्या गोंयांत नवरात्रांचो वेगळोच थाट. गोंयच्या देवळांनी नवरात्रांचे वेध वीस दीस पयलींच लागतात. गोंयांत जावपी नवरात्रां वेगळींच. फकत देवीचींच न्हय तर सगळ्यांच देवळांनी नवरात्रां व्हडा उमेदीन मनयतात.
हांगां देवळांनी लाकडाचें व्हडलें मखर वा लाकडाचो आटो जाका नवरात्रांच्या कांय दीस पयलींच रंग-बिरंगी फोली, हारशे लावन तर- तरेचीं नक्षीकामां करून सजयतात. ते मखर देवळांत जी मूळ मुर्ती आसता, ताचे फुडें एके लोंखणाच्या साकळेच्या आदारान वयर लोंबकळयतात आनी तें मखर झोपाळ्या भशेंन हालतलें अशें तरेन बांदतात. उपरांत नवरात्रांच्या दिसांनी रातचें किर्तन जातकच मखर आरतीक सुरवात जाता. ते वेळार देवीची जी उत्सव मुर्ती आसता, तिका बरें रंगीत कापड न्हेसोवन मखरांत वेग-वेगळ्या वाहनांचेर बसयतात. हीं वाहनां कांय पुठ्ठ्याचीं, लाकडांची तर कांय धातुचींय आसतात. मखरांत देवीक बसयतकच तिका फुलांच्या हारांनी आनी भांगराच्या अलंकारांनी सजयतात. उपरांत धोल, तासो आनी वेपार वाजोवन तालार देवीक चारूय वटांनी झोपाळ्या भशेंन धोलयतात. तर फुडें रावन भट देवीक आरत दाखयता. हो देखाव पळोवपाक शेंकड्यांनी लोक देवळांत जमतात.
कांय देवळांत देवीची तीन रुपां तर फोंडेंच्या श्री म्हाळशेच्या देवळांत नवरात्रीच्या णवव्या दिसा देवीच्यो पांच मुर्ती बसयतात.
मडकयच्या श्री नवदुर्गेच्या देवळांत देवीक मखरांत णव दीस वेगळ्या-वेगळ्या आसनांचेर बसयतात. फकत देवीची न्हय तर श्री शंकराच्या अवतारान सुद्दा तिका मखरांत बसयतात. मडकयची श्री नवदुर्गा, माड्डोळची श्री म्हाळसा नारायणी, बोरयेची श्री नवदुर्गा, बाळ्ळीची श्री शांतादुर्गा, नागेशीचो श्री नागेशी म्हारूद्र, मंगेशीचो श्री मंगेश, कपिलेश्वरीचो श्री कपिलेश्वर, कवळेची श्री शांतादुर्गा, रामनाथीचो श्री रामनाथ, शिरोडेची श्री कामाक्षी, वेलींगची श्री शांतादुर्गा सांखवाळेश्वरी, कुंकळ्ळीची श्री शांतादुर्गा, बांदोडेंची श्री महालक्ष्मी आनी हेर कांय देवीच्या वा देवाच्या देवळांत मखर- उत्सव मनयतात. अशी ही गोंयचीं नवरात्रां.
रतिक राजेंद्र पागी
7020193476
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
