भांगरभूंय | प्रतिनिधी
पणजी : इझ्रायल, अमेरिका आनी इराण हांचे मदीं चालू आशिल्ल्या संघर्शाक लागून मध्य उदेंतांतलें हवाई क्षेत्र बंद जालां. आखाती देशांनी कामाक गेल्ल्या हजारांनी कामगारांच्या कुटुंबांचेर ह्या झुजाचो प्रत्यक्ष आनी अप्रत्यक्ष परिणाम जाला. विमान सेवा रद्द जाल्ल्यान प्रवास वेळापत्रक खंडीत जालां आनी कामाक लागून आखाती देशांत स्थायीक जाल्ल्या आपल्या नात्यांतल्या लोकांचे सुरक्षे विशीं गोंयांतल्या कुटुंबां मदीं भंय आनी हुस्को पातळ्ळा.
विमान उड्डाणां रद्द
गोंयच्या दाबोळी आनी मनोहर आंतरराष्ट्रीय विमानतळार शेनवारा आनी आयतारा प्रवाशी काचाबूल जाल्ले पळोवपाक मेळ्ळें. कतारांतलो विमानतळ आनी हवाई क्षेत्र बंद जाल्ल्यान विमान उड्डाण जावचे कांय मिनटां पयलींच जायत्या प्रवाशांक विमानांतल्यान देवचें पडलें. अॅर इंडिया एक्सप्रेस कंपनीन शेनवारा रातींच गोंय- दुबय विमान सेवा रद्द केली. हाचे भायर आयतारा 1 मार्चाक दुबय- गोंय आनी गोंय- बहारीन हीं म्हत्वाचीं उड्डाणांय रद्द केल्यांत, अशें दाबोळी विमानतळ प्रशासनान जाहीर केलें.
मजगतीं, मनोहर आंतरराष्ट्रीय विमानतळार प्रवाशां खातीर खाशेले नेम जारी करून मध्य उदेंतांतले राजकी अस्थिरतायेक लागून आंतरराष्ट्रीय विमान वेळापत्रकांत व्हड बदल जावंक शकता अशी शिटकावणी दिल्या. प्रवाशांनी विमानतळार पावचे पयलीं संबंदीत विमान कंपनी कडेन तपासणी करची असोय उलो मारला.
गोंयकार भियेल्यात
हजारांनी गोंयचे तरणाटे कामाक लागून सावदी अरेबिया, कुवेत, कतार, बहरीन आनी संयुक्त अरब अमीरातांत स्थायीक जाल्यात. फाटले तीन दीस थंय चलपी क्षेपणास्त्र हल्ले आनी सायरनाक लागून गोंयकार समाजांत भिरांत पातळ्ळ्या. 1990 त इराकी घुरयेच्यो भिरांकूळ यादी कुवेतांत रावपी जायत्या जाणांच्या मनांत परतून जिव्यो जाल्यात. मुळांत गोंयच्या पणजी आनी सध्या कामाक लागून कुवेतांत स्थायीक जाल्ल्या एका तरणाट्यान सोशल मिडियाचेर व्हिडियो घालून हुस्क्याचें कारण ना अशें स्पश्ट केलां. हांगां फक्त अमेरिकेच्या तळाचेर इराणान क्षेपणास्त्रां फोडल्यांत. बाकी कांय करूंक ना, अशें तांणी म्हणलां.
सायरनाच्या आवाजाक लागून नागरीक गरजेच्या वस्तूंचो सांठो करपा खातीर मॉलांनी धांवतात. सध्या कांय गोंयकार जे सुटये खातीर वा वैजकी उपचारा खातीर गोंयांत आयल्यात आनी आडकून उरल्यात तांकां थंय आशिल्ल्या आपल्या कुटुंबांचो हुस्को जाला. झूज ओडून उरलें जाल्यार जिवा वांगडा व्हडा प्रमाणांत नोकर्योय वचपाचो भंय आसा. विशेश म्हणल्यार अकुशळ कामगारांच्या रोजगाराचेर परिणाम जातलो.
पर्यटनाचेर परिणाम
ह्या झुजाचो परिणाम गोंयच्या पर्यटन उद्देगाचेरूय जावपाक लागला. आखाती देशांतल्यान येवपी सगळी हवाई येरादारी बंद आसा. जायते परकी पर्यटक कतार अॅरवेज वापरतात, पूण सध्या ते थंयच आडकून पडल्यात. गोंयचो पर्यटन हंगाम सोंपपाक अजून 2- 3 म्हयने उरल्यात.
ह्या वेळार जायतीं चार्टर विमानां गोंयांत पावतलीं. ह्या चार्टर विमानांक चड करून इंधन भरपा खातीर गल्फ विमानतळांचो वापर करचो पडटा, जाका लागून फुडाराक चार्टर विमानांत व्हड प्रमाणांत व्यत्यय येवंक शकता. युरोपांतल्या विमान येरादारीचेर अजून व्हडलोसो परिणाम जावंक नासलो तरी विमान कंपन्यो प्रवाशांक खबरदारी घेवपा खातीर संदेश धाडटात. गोंयची अर्थवेवस्था चड करून आखाती देशांतल्यान येवपी परकी चलनाचेर (रेमिटन्स) आदारून आसा. गोंयांतल्या दर सातव्या घरांत उण्यांत उणो एक मनीस आखाती देशांनी काम करता. देखून हें झूज फकत भुगोलीक शिमे पुरतें मर्यादीत उरना, पूण हाचो गोंयच्या समाजीक आनी अर्थीक मुळांचेरूय परिणाम जावपाक लागला. बरोच तेंप झूज चालू उरल्यार गोंयांतल्या जायत्या कुटुंबांची येणावळ बंद जावन व्हड अर्थीक संकश्ट निर्माण जावं येता. सध्या सगळे गोंयकार फकत एकूच गजाल मागतात, ती म्हणल्यार मध्य उदेंतांतलो ताण बेगीन उणो जावचो आनी तांच्या नात्यांतले लोक सुरक्षीत उरचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
