भांगरभूंय | प्रतिनिधी
पणजीः बशींनी परप्रांतीय आनी स्थलांतरीत प्रवाशांचो आंकडो चड आसा. राज्यांत फकत बायलां खातीर अशी एकूय बस ना. हाका लागून बशींत लेगीत गोंयकार बायलां असुरक्षित आसात असो आरोप आरजीचे मुखेल मनोज परब आनी पक्षाच्या बायलां कार्यकर्त्यांनी केलो.
रिवोलुशनरी गोवन्साचे मुखेली मनोज परब आनी बायलां कार्यकर्त्यांनी पत्रकार परिशद घेतली. भाजपा सरकार फकत मतां खातीर बायलांचो वापर करता. सुरक्षा, रोजगार आनी हेर सुविधां दिवपा मात भाजपा सरकार दुर्लक्ष करता. प्रचार सभा आसूं वा कार्यावळ आसूं बायलांक हाजीरी वाडोवपा खातीर हाडटात. पूण तांचे प्रस्न सोडोवपाक सरकार दुर्लक्ष करता अशें परब हांणी सांगलें. रिवोलुशनरी गोवन्स पक्षाची स्त्री क्रांती ही बायलांची आघाडी आसा. बायलांनी स्त्री क्रांती बॅनर खाला एकठांय येवचे. आमी एकठांय आयल्यार सुरक्षा आनी हेर समस्या सोडोवपा खातीर सरकाराचेर चेंपण हाडप शक्य जातलें अशें तांणी सांगलें.
सकाळीं आनी सांजवेळा बशींत बरीच गर्दी आसता. स्थलांतरीत कामगारांचो आंकडो चड आसता. बशींत पॅनीक बटण नासता. हाका लागून कामाक येवपी बायलांक असुरक्षीत दिसता अशें आयडा रॉड्रिग्स (बाणावले) हांणी सांगलें.
प्रणया नायक ही उजगांवां नोकरी करता. कामाच्या सुवातेर थळाव्या लोकां परस स्थलांतरीत कामगार चड आसात. तांचे कडलेयान बायलांक बरी वागणुक मेळना. हाचेर कोणूच लक्ष दिना. उद्देगीक आनी हेर आस्थापनांनी बायलांचे सुरक्षे खातीर खाशेले उपाय आसचे अशें प्रणया नायक हांणी सांगलें.
फकत कांय खाशेल्या बायलांक सरकारी येवजण्यांचो फायदो जाता. सरकारी येवजण्यो आनी सवलतींचो फायदो सगळ्या बायलांक मेळना असो आरोप बायलां कार्यकर्त्यांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
