भांगरभूंय | प्रतिनिधी
तंत्रज्ञानाक लागून पोस्ट खात्याची अवस्था सामकी इबाडल्या हें खरें आसलें तरी अजून सरकारीं खातीं पोस्टाचो वापर आपल्या कामा खातीर करतात. कुरियर सेवा, पार्सल, स्टॅम्प, बचत येवजण्यांनी पोस्टाक जिवें उरपाक मजत केल्या. पत्रां धाडपाचे प्रकार उणें जाल्यात तरी सरकारी, निमसरकारी, खाजगी आस्थापनां पोस्टाचोच आदार घेता. नोकरेच्या मुलाखतीचीं चडशीं पत्रां पोस्टांतल्यानूच येतात. खाजगी कुरियर सेवे परस पोस्टाचे दर सवाय आशिल्ल्यान थोडे नागरिकूय अजून ताचो वापर करतात. सरकारान विविध येवजण्यां वरवीं नागरीक आनी पोस्टाक एकमेकां कडेन जोडून दवरल्यात. गोंयांत पोस्टाक आदले वरीं मोल नासलें तरी देशाच्या कांय राज्यांनी अजून लोक पोस्टाचेर अवलंबून आसात. गोंयांत पोस्ट खातें दरवर्सा 1- 2 फावटीं तरी वादांत सांपडटा. गोंयकारांक काडून भायल्यांक पोस्टमन म्हूण घेतिल्ल्यान कांय म्हयन्यां आदीं बोवाळ जाल्लो. खासदार श्रीपाद नायक हांकां पसून तातूंत हस्तक्षेप करचो पडिल्लो. गोंयकार उमेदवारांक कुशीक दवरून नोकरे खातीर भायल्यांक घेवपाचे प्रकार पयलीं सावन जातात. पोस्ट, राष्ट्रीयिकृत बँकांनी बदली, बडटी जावन दुसऱ्या राज्यांतले कर्मचारी, अधिकारी येतातूच. बँकांनी तर गोंयच्या लोकांक दिल्ली, पंजाब, बिहारांत नोकऱ्यो करच्यो पडल्यात. तातूंत गैर कांय ना. पूण, सरकारी खात्यांनी लोकां कडेन संपर्क येता, तें काम तरी थळाव्यांक दिवपाक जाय. नाजाल्यार भाशा कळनाशिल्ल्यान गोंदळ जाता. गोंयच्या पोस्ट खात्यांत तशेंच जालां. ताचे परिणाम गोंयकारांक भोगचे पडल्यात.
गोंयांत सगलीं खातीं पत्रां, दाखले, नोकरेचें काॅल लेटर, न्यायालयाचीं पत्रां, विवीध बिलां…. अजून पोस्टांतल्यानूच धाडटात. पोस्टान मनार घेतिल्लें जाल्यार अमॅझोन, फ्लिपकार्टाचीं पार्सलां पसून लोकांक पावोवं येतालीं. कसलींय कागदां लोकां मेरेन पावोवपाक जाय जाल्यार पोस्टमनाक गांवांतले खाची, कोनशे जाणां जावंक जाय. पोस्ट खातें थंयच शेणटां. कारण गोंयांतले चडशे पोस्टमन हे थळावे न्हय. थोडे आसात. उरिल्ल्यांक घरा धाडून तांच्या जाग्यार भायले पोस्टमन भरल्यात खंय. ताका लागून पत्रां वेळार पावनात, अश्यो कागाळी जावंक लागल्यात. भायल्यांक गांवांचीं नांवां कळनात. इंग्लिशींत चोडणांचें चोरांव जातकच तें वाचन नाशिल्ल्या गोंयकाराक पसून कळचें ना. हेरांची गजालूच सोडात. पत्रां, कुरियर येतकच तें साॅर्ट करून त्या- त्या तालुक्याच्या बाॅक्सांनी घालतात आनी मागीर तीं संबंदीत पोस्ट कार्यालयाक धाडटात. म्हणटकच अमूक गांव खंयच्या तालुक्यांत आसा, तें साॅर्टिंग करप्याक खबर आसूंक जाय. पत्र भलतेच कडेन गेल्यार मागीर तें योग्य जाग्यार पावपाक आठ दीस तरी वतलेच. गोंयच्या गांवांचे उच्चारूय आगळेच आसात. आरांबोल, अंजुना, हणजूणें, ताळगांव, साळगांव, वळवय, वाळपय, फोंडा, होंडा, सांखळे केरी, पेडणें केरी, चिखली, चिंचोळें, बड्डें, बोर्डें, मार्गांव, मुर्मुगांव… हे वाठार खंय आसात तें कळपाक नाका? मागीर पोस्टमनाक मुखेल पोस्ट कार्यालयांतल्यान आयिल्लें पत्र नेमकें खंयच्या गांवांत, वाड्यार दिवंक जाय, तें खबर आसपाक जाय. गोंयांत पन्नास तरी तारीर, वडा कडेन, देवळा कडेन, देवूळ वाडे, सांवतावाडे आसतले. इंग्लीश बरी कळ्ळी तरी गोंयांत कोंकणी खबर आसप सामकें गरजेचें. भुगोलीक गिन्यानूय आसचें पडटा. नाजाल्यार पत्र खंय वचत ताचो नेम ना. तें मुलाखतीचें पत्र आसल्यार संबंदीत उमेदवाराची जीण त्रासांत पडूंक शकता. बरे नोकरेचे मुलाखतीक हाजीर राव, अशें कळोवपी पत्रां मेळूंक नाशिल्ले कितलेशेच गोंयकार आसात. तांच्या मनस्तापाच्यो सगल्योच खबरो दिसाळ्यांनी येताच अशें ना. उसगांव, धारबांदोडें वाठारांत पत्रां वरवीं आयिल्ले चेकूय लोकांक मेळूंक नात, अशी कागाळ आसा.
मुख्यमंत्री प्रमोद सावंत हांणी हाचे मुखार गोंयांत कोंकणी भाशेचें गिन्यान आशिल्ल्यांचीच पोस्टमन म्हूण नेमणूक जातली, अशें जाहीर केलां. दिल्लीच्या पोस्ट अधिकाऱ्यांनी तशें आस्वासन तांकां दिलां. हाचो अर्थ हाचे मुखार पोस्टमन पदाचेर गोंयकारूच लागतले, अशी आस्त बाळगुपाची? पोस्टाचे वरिश्ठ दिल्लें आस्वासन पाळटले, हाचेर लक्ष दवरचें पडटलें, ह्या विशयाची फाटपुरवण करची पडटली. नाजाल्यार तें फक्त आस्वासन थारूं येता. सध्या गोंयांत कितले पोस्टमन आसात, तातूंतले कितले गोंयकार, फाटल्या 10 वर्सांच्या काळांत कितले गोंयकार पोस्टमन वा हेर पदांचेर पोस्टांत कामाक लागल्यात, ताची म्हायती मेळत जाल्यार ह्या कारभाराचेर उजवाड पडटलो. बंबई से गई पूना, पूना से गई दिल्ली, दिल्ली से गई पटना, फिर भी ना मिला सजना…. अशी गोंयांतल्या पत्रांची सध्या गत जावंक लागल्या. ह्या हायटेक काळांतूय पत्र, कुरियर संबंदीत मनशाक सोदीत गांवांगांवांनी हेडत रावता, ही सामकी लजेची गजाल.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
