भांगरभूंय | प्रतिनिधी
यांतली 2025 तली सगळ्यांत दुखदिणी घडणूक म्हणल्यार कळंगुटे बर्च क्लबान उजो लागून पंचवीस लोकांक आयिल्लें मरण. हे घडणुके उपरांत दर्या देगेच्या वांठारांत हॉटेल आनी रेस्टॉरंट वेवसाय कसो गोंया भायल्या लोकांच्या हातांत गेला ताचेर उजवाड पडलो. पोरूं एप्रिलांत मुंबय स्थायीक जाल्ल्या एका गोंयकार लेखिकेन आपले पयलेच इंग्लीश कादंबरींतल्यान हो संवेदनशील विशय वेगळे पद्दतीन मांडपाचो यत्न केला. “मरायास आर्क – बाँड्स ऑफ डेस्टिनी” ही दिक्षा प्रभू हांची पयलीच कादंबरी. खूब सुंदर बरयल्या. बरोवपाची स्टायल, उतरांची मांडावळ सहज सुंदर. हॉस्पिटॅलिटी बिझनेसाची एक म्हत्वाची परंपरा तशेंच बायलांच्या सशक्तीकरणाचो विशय सहज हांगां सोंपेपणी आयला. कथानक बरें केळयलां. पयलेंच बरोवप अशें निखालस जाणवना.
दिक्षा प्रभू हांचें पुराय नांव शारदा रघुवीर प्रभू चिमुलकार आनी लग्ना पयलींचे नांव दिक्षा शेणवी सावर्डेकार. दोनूय नांवांतलीं उतरां पुंजावन तिणें लेखना खातीर टोपण नांव घेतलां. लेखिका स्वता एक इंजिनियर. लग्न जावन रावता मुंबय. नोकरी वेवसाया निमतान भारतांतल्या वेगवेगळ्या शारांनी भोंवल्य़ा, रावल्या. पूण मूळ गोंयकार. गोंय, गोंयचो सैम, कोंकणीचो अभिमान बाळगुपी. ह्या तिच्या पयल्याच कादंबरीचो विशय लेगीत ह्याच गोंयच्या मोगा भोंवतणी घुटमळटा.
गोंयच्या गांवगिऱ्या वाठारांत मारी आनी पॅट्रीक हांणी चलयल्लो दर्यादेगेर आशिल्लो रिसॉर्ट आनी गोंयांत मालमत्ता घेवपाचें सपन पळोवपी आनी रिसॉर्टाचो ताबो घेवपाचो कट रचपी अब्जाधीश माया भोंवतणी ही कथा केंद्रीत आसा. हालींच मुंबय लेखिकेची आनी म्हजी प्रत्यक्ष गांठ भेट जाली तेन्ना दिक्षा प्रभू हांणी म्हळें की, आपल्या पुस्तकांत आपणें एक पुराय अध्याय गोंयच्यो जमनी हडप करपाच्या प्रस्नाक समर्पित केला, जंय राजकारणी आनी जमनीचे शार्क मेळून दुबळ्या मालमत्तेच्या मालकांचो फायदो घेतात. ह्या पुस्तकांत एक वेगळें गोंय दाखयलां, जें पारंपारीक गोंयकार समाज आनी परस्परांक आदार दिवपाच्या मुल्यांचेर भर दिता. बिगर गोंयकारांनी व्हडा प्रमाणांत गोंयांत जमीन आनी मालमत्ता विकत्यो घेवन वेवसाय सुरू करपाच्या प्रकाराक लागून फुडाराक गोंयच्या संस्कृतायेक आनी लोकजीणेक मारक जावपाचो लेखिका दिक्षा प्रभू हांका खोलायेन हुस्को आसा अशें तांचेकडे उलयतना जाणवलें.
रियल इस्टेटीचे दर मळबाक तेंकल्यात, जाका लागून गोंयकारांक स्वताच्या मायभुंयेंत मालमत्ता आसून लेगीत ती विकून पयसो जोडपाची आस जाता. जायत्या गोंयकारांक अर्थीक संकश्टाक लागून ही इस्टेट सांबाळपाक परवड नाशिल्ल्यान आपलीं पुर्वजांचीं घरां विकचीं पडटात. ह्याच काळजाक तोपपी संघर्शाक पयलेच फावट लेखिकेन हालींच उजवाडाक आयिल्ले आपले हे कादंबरींत हाताळ्ळां. गंभीर विशय. दर एक गोंयकाराच्या हुस्क्याचो विशय.
गोंयकार आपली मालमत्ता कित्याक विकता ताची साबार कारणां आसूं येतात. पुर्वजांनी दवरिल्ले जागे, भाटां, घरां, वा उद्योग विकता तेन्ना विकतल्याचे परिस्थितीचो आमी केन्ना ताचे भुमिकेतल्यान विचार करीनात. हे कादंबरींत मुखेल पात्रां आशिल्ली मारी आनी अनाथाश्रमांतल्यान हाडिल्लो तिचो पोसको भाव पॅट्रीक हांची ही कथा. अचकीत आवय बापूय ह्या संवसारातल्यान ना जातकीर खरें म्हळ्यार मेरी सारक्या वीस वर्सांच्या चलयेचेर तरणे पिरायेचेर आकांत येवपाचो. बापायन मरतना फाटल्यान दवरिल्लो ‘काझा विटोरिया’ बंगलो आनी आंबे, काजी, माड आसलेले भाट बेंस हि इस्टेट विकून खंयूय पयस शारांत रावपाची इत्सा जावपाची. पुण मारी आपलो भाव पॅट्रीकाक सांगाता घेवन आवय बापायची याद म्हणून त्याच भाटांत “मरायास” ह्या नांवान रिसॉर्ट चालू करता आनी आपल्या निजाच्या गोड सभावान गिरायकाक बरी सेवा दिवन नांव मेळयता. पूण वाडटे खर्च आनी ताका लागून वाडत वचपी रिणांक लागून दोगांय भावंडा चिंतेस्त जातात. काणी हांगा सुरू जाता. मुखार काणयेंत जायतीं पात्रां आपलें अस्तित्व दाखयतात. रिसोर्टांत रावंक येवपी माया, फेलिक्स, मिंगेल, ज्युलिया, अमिता, अभिर, पोटलिवाला, जुई, राम, कुशा हांची आनी स्वताची एक जीवनकाणी आसता. पूण सगळ्यांची नाळ ‘मरायास’ कडे जुळिल्ली आसता. आनी गोंयांकडे तांचे भावनीक नातें आसता. एक एक काणी उगती जायत जायत सगळींच पात्रां मूळ कथानकांत समरस जातात आनी निमाणे “मरायास” विकचे पडटा काय कितें हाची उमळशीक वाचकाच्या मनांत हुस्को निर्माण करता.
खरें कितें घडटा हें जाणून घेवपा खातीर तुमकां हें पुस्तक विकतें घेवन वाचचे पडटले. ‘मरायास आर्क – बॉन्ड्स ऑफ डेस्टिनी’ (Mariyah’s Ark – Bonds of destiny) सध्या अमेझॉनाचेर किंडल आनी पेपरबॅक ह्या दोनूय प्रकारांनी मेळटा. तशेंच मडगांवांत कॉन्फिडेन्ट बुक हावस हांगां विकतें घेवंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
