भांगरभूंय | प्रतिनिधी
पुसपती अशोक गजपती राजू : घेतलो राज्यपालपदाचो सोपूत
भांगरभूंय । प्रतिनिधी
पणजी : राज्यघटनेन आपल्याक देशांतल्या आनी चड करून गोंयकारांची सेवा करपाची संद दिल्या. गोंयकारां वांगडा काम करपाक आवडटलें, अशें राज्यपाल पुसपती अशोक गजपती राजू हांणी सांगलें. शेनवारा मुंबय उच्च न्यायालयाचे मुख्य न्यायमुर्ती आलोक आराध्ये हांणी तांकां राज्यपालपदाचो सोपूत दिलो. ह्या वेळार मुख्यमंत्री डॉ. प्रमोद सावंत, मुख्य सचीव व्ही. कांडावेली हांचे सयत केंद्रीय नागरी उड्डाण मंत्री किंजरापू राममोहन नायडू, केंद्रीय उर्जा राज्यमंत्री श्रीपाद नायक, आंद्रप्रदेश विधानसभेचे सभापती चिंताकयाला आय्यान्नापत्राडू, आंद्रप्रदेशच्यो महिला आनी बाल कल्याण मंत्री गुमिदी संध्या रानी, राज्यसभा खासदार सदानंद शेट तानावडे, गोंय मंत्रीमंडळांतले वांगडी, खासदार, आमदार आनी हेर मानेस्त उपस्थीत आशिल्ले.
पुसपती अशोक गजपती राजू हांणी सांगलें, आपूण हाचे आदींय गोंयांत आयलां. आपल्याक हांगाची भास कळना, तरी लेगीत आमी एक संघ म्हूण काम करतले. राजकी नदरेन पळयत जाल्यार हे आदीं आपूण सात खेपे आमदार आशिल्लों. तेन्ना आंध्र प्रदेशाची विभागणी जावंक नाशिल्ली. ते उपरांत आपूण संसदेंत खासदार आनी मंत्री जालों. आपूण राज्यांत मंत्री तशेंच विरोधी पक्ष फुडारी म्हूण काम केलां. खूब वर्सां विवीध पदांचेर काम केल्ल्यान आपल्या अणभवांत भर पडत गेली, अशें तांणी सांगलें.
आपल्याक पयलेच खेपे राज्यपाल म्हूण काम करपाची संद मेळ्ळ्या. ह्या कामाक लागून लेगीत आपल्या अणभवांत भर पडटली, असो विस्वास आसा. आपल्याक गोंयांतल्या लोकां खातीर न्हय जाल्यार लोकां वांगडा रावून काम करपाचें आसा. दुसरे वटेन लोकशायेंत लोकांनी लेगीत सरकारा वांगडा रावून काम करप गरजेचें आसा. आमी सगल्यांनी एकठांय येवन काम करप गरजेचें आसा. आमी सगल्यांनी एकठांय येवन देशाक फुडें व्हरपाचें काम करुंया, अशें राज्यपाल पुसपती अशोक गजपती राजू हांणी सांगलें.
मुख्यमंत्री डॉ. प्रमोद सावंत हांणी सांगलें, नवे राज्यपाल पुसपती अशोक गजपती राजू हांकां आमी गोंयांत येवकार दितात. तांकां प्रशासनाचो खूब व्हड अणभव आसा. हो अणभव गोंयाक निश्चीत फायद्याचो थारतलो. आमकां तांच्या मार्गदर्शना खाला काम करपाक आवडटलें. ते आदीं मुख्य सचीव व्ही कांडवेलू हांणी राष्ट्रपती द्रौपदी मुर्मू हांणी काडिल्ल्या राज्यपालांचे नेमणुकेचो आदेश वाचून दाखयलो. सोपूत सुवाळ्या उपरांत हाजीर राविल्ल्यांनी राज्यपालांक शुभेत्सा दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
