भांगरभूंय | प्रतिनिधी
गोंयभर रिव्हाॅल्युशनरी गोवन्साचे ‘रिव्हाॅल्युशनरी’ गांवांगांवांनी, आपापल्या ग्रामपंचायतींनी तशेंच ग्रामसभांनी लोकहिताचे विशय घेतात, लोकांच्या हक्काक लागून आवाज काडटात, गोंयकारांक राखपा लागून धडपडटात….आनी सरकाराच्या मनमानी कारभारा आड जाबूय विचारता.
सांत आंद्रेच्या लोकांनी विश्वासान आरजीपीच्या विरेश बोरकार हांकां वेंचून हाडलो. जनतेन दाखयिल्ल्या विस्वासाचेर, विरेश तळमळीन लोकां खातीर वावुरतना आमका दिश्टी पडटा. आपल्या मतदारसंघाचेच विशय घेनासतना, सबंद गोंयभराचे ज्वलंत विशय, तशेंच गोंय आनी गोंयकारांच्या अस्तित्वा कडेन संबंदीत, गोंयकारांच्या फुडाराक लागून, तांच्या हक्काक लागून एकटो भर विधानसभेंत वागा सारको, गोंयकारांक काबार करपाचो कट केल्ल्यां कडेन झूज दितना आमी पळयतात.
सातत्यान फाटपुरवण करून आपल्या मतदारसंघांत विकासकामां तर करताच, ताचे भायर, दरेक मतदारसंघांत विरेश बोरकार भेट दिवन जनतेचे प्रश्न जाणून घेवन, तांकां कशे तरेन आदार दिवपाक मेळटलो, कशे तरेन तांच्यो समस्या सोंपयतलो, हाचेरुय ते काम करतात. अशे कितलेशेच रिव्हाॅल्युशनरी भाव- भयणां आज ह्या क्रांतीन वांटेकार जाल्यात, आपापले परीन गोंय, गोंयकारांचे अस्तित्व राखपाक वावुरतात. हांगा कोण कोणाक काय दिना पुण, दर एकलो आपल्या गोंय, गोंयकारांचें अस्तित्व राखपाक धडपडटा.
सगळ्यांक खबर आसा की, काँग्रेस आनी भाजपा हे एकेच माळेचे मणी. कोणाकुय वेंचून काडले तरी ते गोंय विरोधी निर्णय घेतले. आयज मेरेन ह्या पक्षांनी मनमानी कारभार केला. गोंयकारांक नाका त्यो गजाली तांच्या माथ्यार मारल्यात. तांकां लोकशायेंत लोकसहभाग नाका. लोकशाही पद्धतीन सरकार चलोवपाक नाका. आयज पळयता थंय थंय गोंयकार आंदोलनां करपाक लागला. रस्त्यार आयला. फक्त ह्या सरकाराक लागूनच. ह्या सुवार्थी लोकप्रतिनिधींक लागून आयज गोंयकारांक आपलें अस्तित्व तिगोवपा खातारी धडपडचें पडटा. उशीर जाला खरो, पुण वेळ अजून वचूंक ना. ते खातीर आतां सगळ्या गोंयकारानी विचार करपाची गरज आसा. गोंयान गोंयकार उरतलो जाल्यार आतां फक्त आरजी पक्षाक तेंको दिवचो पडतलो. प्रत्यक्ष, अप्रत्यक्ष रितीन तो तेंको दितात, पूण आतां वांगडा रावन हे क्रांतींत वांटेकार जावचें पडटलें. ह्या लढ्याक अर्थीक मदतूय खूप महत्त्वाची. प्रत्येक गोंयकारांनी थारायलें आनी जाता ते परीन मदत केली जाल्यार हे क्रांतीक आनीक बळगें मेळटलें. हें गोंय आमकां आमच्या हातांत घेवपाक चड वेळ लागचो ना…. तर गोंयकारांनो विचार करात… आरजीच्या ह्या लढ्याक योगदान दियात, वांटेकार जायात आनी आमी सगळे मेळून गोंयचें अस्तित्व राखूया…. देव बरें करूं.
गौरीश गावडे
प्रियोळ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
