गोंयकारांच्यो भावना दुखावल्यो?

भांगरभूंय | प्रतिनिधी

वेगन जावप ही सोंपी गजाल न्हय. कसलेच तरेचें मास, दूद, ताचे पसून तयार केल्ले जिनस, तांतयां, ताचे जिनस खावप ना.

गोंयकारांच्या नुस्त्या मोगाची तुस्त, अपुरबाय करुंक नाशिल्लो एकूय साहित्यकार आसचो ना. समेस्त लेखक मंडळींनी रूच काडीत नुस्त्याचेर, ताच्या जिनसांचेर बरयलां. अर्थांत नीज गोंयकार आनी गोंया कडेन संबंद आशिल्ले हे बरोवपी. मागीर ते पु. ल. देशपांडे जांव वा गोपाळकृष्ण भोबे. पुलं म्हणटांत, गोंयकार एका बांगड्याचेच कितलेशेच प्रकार करता. भोबे हांणी तर ‘मासे आणि मी’ हें पुस्तकूच बरयलां. कवीश्रेश्ठ बाकीबाबांची लेखणी अदीं मदीं नुस्त्याची याद काडटालीच. तांणी बरोवनूच दवरलां, ‘नुस्तें आसल्यार गोंयकार वीर, नासल्यार व्हीर’. पर्यटक गोंयांत येतात, ते नुस्तें खावपाक. गोंयकारांकूय नुस्त्या बगर ताळ्या सकयल उंडी देंवना. जळी, थळी म्हणटात, तशें ताका
नुस्तेंच दिसता.
इतलें की ‘तुका म्हणे गर्भवासी, सुखे घालावे आम्हासी’ ही ओळ कानार पडली काय ताच्या दोळ्यां मुखार येतां, तें सुंगटां, बांगड्याचें सुकें. विनोदाचो भाग कुशीक दवरलो, जाल्यार नुस्त्या बगर खरो गोंयकार रावंकूच शकना, हें पूर्णसत्य..…. आनी पेटा म्हणटा, गोंयकारांनी नुस्तें सोडचें!!!! काल तांणी गोंयकारांक ‘गो वेगन’ असो उलो मारलो.
पीपल फॉर एथिकल ट्रीटमेंट फोर एनिमल्स (पेटा) ही मोनजातीच्या कल्याणा खातीर वावुरपी संस्था. गोंयकारांचो नुस्त्याचेर खरो मोग आसा जाल्यार तांणी ताटांतल्यान नुस्तें पयस दवरचें. तें खांवचें न्हय, मनशाचेर करता तसो मोग ताचेर करचो. असो सल्लो तांणी दिला. ताचे फाटल्यान कारणां दिल्यांत, तीं तशीं पटपा सारकीं. दर्या, व्हाळ, न्हंयो प्रदुशीत जाल्ल्यान मायक्रो प्लास्टीक, आर्सेनीक, पारो आनी हेर रसायनां नुस्त्याच्या पोटांत वतात आनी ताका लागून मनशाक दुयेंसां जातात. सैमाची आनी निश्पाप जिवाची जतनाय घेवपाक गोंयकारांनी शिवराक जावचें असो उलो तांणी मारला. ‘वेगन’ अशें उतर वापरलां. वेगन जावप ही सोंपी गजाल न्हय. कसलेच तरेचें मास, दूद, ताचे पसून तयार केल्ले जिनस, तांतयां, ताचे जिनस खावप ना. चामडें, पांखां, दांत, शिंगा पसून केल्लें कितेंच वापरप ना. घडये शेण आनी गोमुत्राचोय हातूंत आस्पाव आसतलो!
पेटा म्हणटा, शिवराक जायात. तातूंतय नुस्त्या भशेन रूच दिवपी पर्याय आसात खंय. पूण वनस्पतींतूय जीव आसता, अशें सर जगदीशचंद्र बोस हांणी सिद्ध करून दाखयलां. म्हणल्यार तीय एक प्रकारची हत्याच जाली ना? नुस्त्या सारकी रूच दिवपी शिवराकांत कितें आसा? तेल, मसालो घाले बगर गोंयकारांक तरी तें रुचीक लागतशें दिसना. हे दोनूय जिनस जिवाक तशे माल. हांव सांगतां तें आयक, ही खऱ्या गोंयकाराची वृत्ती आसली, तर पेटाच्यो कांय गजाली मतींत घेवंक जाय. नुस्त्याची भलायकी इबाडची ना, हें पळोवप आमच्याच हातांत आसा. न्हंयो, दर्या नितळ दवरल्यार नुस्तें तंदुरुस्त उरतलें. फाॅर्मेलीनूय वापरूंक जायना. नुस्तें खावप काय खावपाचें सोडप तो निर्णय घेवपाचो हक्क दरेकल्याचो. कायद्याचें राज्य आशिल्ल्यान हेंच खा, तोच रंग वापर, अमूकच मुस्तायकी घाल…. ही हुकुमशाय वृत्ती चालीक लावंक मेळना. पूण आवाहन करूं येता. तशें आतां गोंयकार चड नुस्तें खातात खंय? आतां बुधवार आनी आयतार पसून पाळपी नवगोंयकार पळोवंक मेळटात. नुस्त्याचें मोल हाता भायर गेलां. थारावीक तरांचेंच नुस्तें मेळटा. नुस्त्याचे जीनस करपी हातूय आतां उरुंक नात. थोड्या कुटुंबांनी तर भायर जेवप सुरू केलां. नाजाल्यार घरांत जेवण हाडून दिवपी कुरियर सेवा आसाच. तातूंत नुस्त्याचो संवसार आटपाक लागिल्ल्यान 2047 मेरेन फक्त बांगडे, लेफो आनी ताल्लेच ताटांत पडटले अशीं चिन्ना दिसतात. सुरवात जाल्या. गोंयकारांची नवी पिळगी केन्नाच चिकन, मटणा कडेन वळ्ळ्या. तशीं हालींचीं चडशी भुरगींय काटे नाशिल्लेंच नुस्तें खातात.
पेटा म्हणटा वेगन जायात. मागीर आनीक भाजी, फळां जाय पडलीं ना. गोंयांत कांय तीं पिकनात. ताचे परस नुस्तें पिकता. सावें आनी दर्याचेंय. नुस्तें विकपी आनी धरपी गोंयकार उणें जाल्यात तरी ताचेर प्रत्यक्ष, अप्रत्यक्ष पोट भरपी लाखांनी गोंयकार आसात. नुस्त्याचेर बहिश्कार घालो जाल्यार बेरोजगारांचो आंकडो वाडचो ना? आदले मुख्यमंत्री मनोहर पर्रीकार संरक्षण मंत्री आसतना अचकीत गोंयांत आयले, ताचे फाटल्यान नुस्तेमोग आशिल्लो अशें म्हणटात. बांगडे खाल्यार बुद्धी वाडटा,अशेंय तांणी एकदां सांगिल्लें. चडश्या गोंयकारांचो आनी नुस्त्याचो जल्मजल्मांचो ऋणानुबंध. तो तुटून पडचो ना. आदले सारकें तरातरांचें नुस्तें बाजारांत येतलें हे खातीर नुस्तेमारी खात्यान यत्न करूंक जाय. अर्थांत तें ताजें आनी सवाय आसचें. नुस्तें खावपूच सोडात?? पेटान फाटीर मारचें, पोटार न्हय! नुस्तें सोडात म्हणप, म्हणजे गोंयकारांच्यो भावना दुखावप. हो गुन्यांव थारूं येता.