गोंयकारांच्या कल्याणा खातीर हांव सदांच समर्पितः मुख्यमंत्री

भांगरभूंय | प्रतिनिधी

म्हजें घर, मुंडकार घर आनी शेतकी संरक्षण कायदो फायद्याचो थारतलो

दिवचलः सांखळेकार आनी गोंयच्या लोकांच्या खूब मोगान, तशेंच भारतीय जनता पक्ष, प्रधानमंत्री नरेंद्र मोदी आनी हेर वरिश्ठ फुडाऱ्यांच्या आशीर्वादान आयज मुख्यमंत्री पदाचेर 7 वर्सां पुराय जातात. गोंयच्या लोकांच्या आशीर्वादान गोंयची सेवा करपाची संद मेळ्ळी. ही सेवा करतना मनशाचें उदरगतींत आनी सुविधांच्या उदरगतींत खूब कितें करपाक येस आयलें. आमी सदांच गोंयच्या लोकां कडेन समर्पण भावनेन वावुरल्यात आनी फुडाराकय तेंच काम आनी समर्पण चालू दवरतले अशें मुख्यमंत्री डॉ. प्रमोद सावंत हांणी सांखळे हांगसर आपली भावना उक्तायतना सांगलें.
मुख्यमंत्री म्हणून काम करतना हांवें अंत्योदय तत्वाचेर काम करपाचें थारायल्लें. समाजाच्या निमाण्या घटकां मेरेन, सरकाराच्या वेगवेगळ्या येवजण्यांच्या ल्हान ल्हान घटकां मेरेन पावपाचो यत्न केलो. हे यत्न आतां मेरेन खूब येसस्वी जाल्यात. केंद्र सरकाराच्या आदारान जीएमसींत गोंयांतल्या दिव्यांग लोकांखातीर दिव्यांशू केंद्र सुरू केलें. बांबोळेच्या केशव सेवा साधनाच्या केंद्रांत स्पायनल रिहेब केंद्र सुरू करपाक मेळ्ळें. हें एक दुर्मिळ केंद्र आनी गोंयांत स्पायनल उपचार फुकट सुरू जाल्यात हें एक व्हड समाधान अशें मुख्यमंत्र्यान सांगलें.
गोंयच्या लोकांच्या तोंडार हांसो दवरपा खातीर वेगवेगळे सकारात्मक बदल हाडल्यात. तातूंत म्हजें घर, मुंडाकारांचें घर आनी शेतकी संरक्षण कायदो ह्यो तीन गजाली म्हजे खातीर खूब म्हत्वाच्यो आसात. ह्या तिनूय गजालींचो गोंयकारांक फायदो जातलो. गोंयकारांचे सुख निर्देशांक वाडोवपाक आनी गोंया खातीर आमी समर्पीत आसात अशें सांखळेच्या घुडी पाडवो कार्यावळींत उलयतना मुख्यमंत्री डॉ. प्रमोद सावंत हांणी सांगलें.
ह्या वेळार हाजीर आशिल्ल्या लोकांनी मुख्यमंत्री डॉ. सावंत हांकां मुख्यमंत्री म्हूण सात वर्सां पूर्ण जाल्ल्यान परबीं दिलीं.