भांगरभूंय | प्रतिनिधी
अॅड. कार्लोस फेरेराः कळंगूटे मनयलो जनमत कौल दीस
भांगरभूंय । प्रतिनिधी
म्हापशें: गोंयकारांची वेगळी वळख तिगोवपा खातीर जॅक सिकेर, पुरुषोत्तम काकोडकार हांच्या सारक्या त्या वेऴा वयल्या फुडाऱ्यांनी दोळ्यांत भरपा सारको वावर केलो. तेन्नाच्या प्रधानमंत्र्यांक लेगीत विस्वासांत घेतले आनी जनमत कौला वरवीं गोंयची वळख तिगोवन दवरली. आमचे वळखीचो प्रस्न आयज परतून निर्माण जाला. हे खातीर गोंयकारांनी क्रांती ज्योत पेटोवची, असो उलो आमदार अॅड. कार्लोस फेरेरा हांणी मारलो.
कळंगूट पंचायती वतीन जॅक सिकेर हांच्या पुतळ्या कडेन आयोजीत जनमत कौल दिसाचे कार्यावळींत आमदार अॅड. फेरेरा उलयताले. ह्या वेळार कळंगूटचे सरपंच जोजेफ सिक्वेरा, पंचायत वांगडी, काँग्रेसीचे जिल्होध्यक्ष विरेंद्र शिरोडकार, विवेक डिसिल्वा, लॉरेन्स सिक्वेरा, विश्वास नागवेंकार आनी हेर पदाधिकारी हाजीर आशिल्ले. सरपंच सिक्वेरा हांणी सांगलें, जॅक सिकेराचो आमकां अभिमान आसा. मात तांकां गोंय सरकारा कडल्यान जाय तसो मान- सन्मान मेळूंक ना. सरकारान एकाद्या तरी व्हड प्रकल्पाक जॅक सिकेराचें नांव दिवचें. तशेंच आमदारांनी विधानसभा संकुलांत जॅक सिकेराचो पुतळो उबारपा संबंदांत येता त्या विधानसभा अधिवेशनांत थाराव घेवन पुतळो उबारपाचो आनी गोंयकारांची मागणी पुराय करची. आयज आमचें गोंयकारपण फाटीं पडटा. गोंय सांबाळपा सयत गोंयकारपण राखपा खातीर गोंयकारांनी मुखार सरपाक जाय, अशें तांणी सांगलें.
रस्ते वेवस्थीत करपाचेर भर दिवचोः अॅड. फेरेरा
गोंयांत मॅट्रो रेल्वे शक्य आसा काय ना, तें उपरांत येता. प्रत्यक्षांत गोंयांतले रस्ते सारके नात. ते आदीं वेवस्थीत करपाक जाय आनी उपरांतूच मॅट्रो रेल्वेचो विचार जावपाक जाय. गोंयांत मॅट्रो धांवप हें सगळ्यांचें सपन आसलें तरीय गोंयांतले खणिल्ले रस्ते वेवस्थीत करपाचेर भर दिवपाची गरज आसा, अशें आमदार अॅड. कार्लोस फेरेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
