भांगरभूंय | प्रतिनिधी
कॅ. विरियातो फर्नांडीस : मास्टर प्लॅनाची मागणी
भांगरभूंय । प्रतिनिधी
पणजीः धरणांचें वेवस्थापन सारकें नाशिल्ल्यान आनी व्हडल्या बांदकाम प्रकल्पांक लागून गोंयकारांक चार वरां उदक मेळप कुस्तार जालां. गोंयांत उदकाची पुरवण सुरळीत करपाक मास्टर प्लॅन तयार करचो, अशी मागणी करपी निवेदन दक्षीण गोंय खासदार कॅ. विरियतो फर्नांडीस हांणी बांदकाम खात्याच्या मुखेल अभियंत्याक भेटयलां.
कॅ. विरियातो फर्नांडीस हांणी गोंयचे उदकाचे समस्ये विशीं कागाळ माडपां खातीर काँग्रेसीच्या फुडाऱ्या वांगडा आल्तीन भौशीक बांदकाम खात्याचे कचेरेंत खात्याचे मुखेल अभियंते उत्तम पार्सेकार हांची भेट घेतली.
फावो इतलें उदक आसा, भियेवपाची गरज ना, अशीं विधानां दोन-दोन दिसांनी मुख्यमंत्री करतात. जर उदक आसा जाल्यार ताची पुरवण कित्याक जायना, असो प्रस्न फर्नांडीस हांणी भेट घेतले उपरांत उपस्थीत केलो.
दर मतदारसंघांत आमी भोंवल्यात. थंय कांय कडेन उदक सोडटात जाल्यार कांय सुवातींनी नळ सुके पडल्यात. एका वाठारांत दोन दीस उदक सोडचें आनी उपरांत फुडले दोन दीस दुसऱ्या वाठारांक उदक दिवचें. पावस ये मेरेन आमकां उदकाचें वेवस्थापन करपाक जाय अशें निर्देश खात्याक आयल्यात. ही परिस्थिती सध्या गोंयांत निर्माण जाल्या, असो आरोप फर्नांडीस हांणी केलो.
पयलीं 24 वरां उदकाची पुरवण जातली म्हणपी मुख्यमंत्र्यान कांय दिसा आदीं 24 मदलो 2 काडून उडयलो आनी 4 वरां उदक दिवपाचें सांगलें. सरकारांक दुरदिश्टी ना, मास्टर प्लॅन ना तशेंच धरण आनी तळ्यांचेर सराकारचें लक्ष ना हीं कारणां ही परिस्थिती जावपा फाटल्यान आसा. पावस खंयच उणो जावंक ना. कितलीं वर्सां जालीं पावस पडपाची साडे चार म्हयन्यांची सरासरी तितलीच उरल्या. खंयतरी सरकार ही समस्या सुटावी करपाक उणें पडलां, असो आरोप फर्नांडीस हांणी केलो.
गोंयांत जमनींचो उणाव आसून लेगीत जमीन विकून थंय बांदकाम प्रकल्प येवपाक लागल्यात. तातूंत चार-पांच हजार फ्लॅट, लक्झरी बंगले बांदून दर बंगल्याक स्विमींग पूल दितात. सरकार हांच्या कडल्यान पयशे घेवन नीज गोंयकारांचो उदकाचो हक्क चोरून गिरेस्तांक दितात आनी दोन-दिसांनी उदक सोडून पायप फुटल्या वा गळटी लागल्या, अश्यो उदकाचे चोरयेच्यो काणयो सांगतात, असो थोमणो फर्नांडीस हांणी सांगलें. फक्त उदकाचो उणाव जाता तेन्ना वाट पळोवचे परस आतां सावन सरकारान उदका पुरवणे विशीं आपल्या धोरणाचेर लक्ष केंद्रीत करचें. उदकाची गरज भागोवपा खातीर हे विशीं मास्टर प्लॅन तयार करचो. जर हें करपाक सरकारांक जमना जल्यार आमी हो तयार करून दिवपाक तयार आसात. जे मेरेन उदक मेळना ते मेरेन आमी चेपण हाडप चालूच दवरतले, अशी शिटकावणी फर्नांडीस हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
