भांगरभूंय | प्रतिनिधी
मुख्यमंत्री प्रमोद सावंत हांणी गोंयकारांक सवाय दरान ‘घर’ (फ्लॅट) बांदून दिवपाची येवजण चालीक लावपाचें उतर दिलां. ही घोशणा येवकार दिवपा सारकी आसा. फक्त ती येवजण खरेपणांत येवं आनी प्रमोदबाब सावंत तोखणायेक पात्र थारूं.
गोंयांत अशे कितलेशेच लोक आसतले जांकां स्वताचें घर ना. अशे लोक आपल्याच गांवांत दुसर्यांगेर बिराडाक लेगीत रावतात. हाचीं वेगळींवेगळीं कारणां आसतात. तातूंतलें एक म्हणल्यार कुटुंबां जशीं व्हडलीं जातात, तशें बापायलें वा आज्यालें घर ल्हान पडपाक लागता, आनी लग्न जातकच ‘घरच्या दिव्यांक’ नवें घर सोदचें पडटा. जांचे कडेन पयसो आसा तांकां हे गजालीचो फरक पडना. पूण कमी पगाराची नोकरी आशिल्ल्यांक जमीन घेवन घर बांदप परवडवपा सारकी परिस्थिती सध्या तरी ना. शारांनी सोडाच, गांवांनी लेगीत जमनीक मोल आयलां आनी जमीन हिसपा भायर म्हारग जाल्या. अशा वेळार प्रमोदबाब सावंत जर घर नाशिल्ल्यांच्या ‘आदारा’क पावतात, जाल्यार खूब बरें जातलें. तांणी उलोवन दाखयलां तें ते खरेपणांत हाडटले अशी आस्त धरुया.
हालीं हालीं गांवांनी लेगीत फ्लॅटांच्यो इमारती येवंक लागल्यात. मात तांचें मोल तशें उणें आसना, घडये मिटरा फाटल्यान दोन ते तीन हजारांचो फरक आसत. सादो 80 चौखण मिटर आकाराचो फ्लॅट विकतो घेवंक गेल्यार सुमार 30 ते 35 लाख रुपयांची गरज लागता. ताचेर तीन टक्के स्टॅम्प ड्युटी आनी तीन टक्के नोंदणी शुल्क धरल्यार आनीक 2.10 लाख रुपयांची गरज आसता. उपरांत फ्लॅट घेतकच तो सजोवपा खातीर आनी घराक लागपी उपकरणांक आनीक खर्च. दिसान दीस म्हारगाय वाडत आसा. हे खातीर सवाय दरान फ्लॅट मेळत जाल्यार गरिबांक थाकाय मेळटली. आनीक तांकां ती दिवप सरकाराचें कर्तव्य आसा.
गोंयांतल्या लोकसंख्येंतले चडांत चड लोक उद्देगीक वसणुकांनी, खाजगी कामाक वतात. तांकां 20 ते 30 हजार रुपया पगार आसता. कंत्राटाचेर वचप्यांक तर सामकोच कमी पगार मेळटा. बशीची तिकेट वा पॅत्रॉलाचो खर्च धरलो जाल्यार तांकां पगारांतले कितले पयशे उरतले हाचो अदमास काडूं येता. अशे लोक म्हारग फ्लॅट घेवंक शकनात. हे खातीर ‘हावजींग बोर्डान’ आमच्या गोंयकारां खातीर एक बरी येवजण चालीक लावन तांकां आदार केल्यार खूब बरें जातलें. पूण फ्लॅटाचें मोल 15 ते 20 लाखां मजगतीं आसचें पडटलें. मडगांवां आनी हेर कडेन हावजींग बोर्डा खाला जीं घरां आदल्या सरकारांनी बांदिल्लीं तीं लोकांक खूब बर्याक पडिल्लीं.
फ्लॅटांच्यो ह्यो इमारती बांदतना सरकारान दर्ज्याचेर लक्ष दवरचें पडटलें. कित्याक तर लोक थंय रावतले. रस्त्याचेर डांबर घालतना जशी आडनदर जाता तशी हांगां जावन उपकारची ना. जाली जाल्यार पयल्याच पावसांत फ्लॅटांनी उदक येतलें आनी हे फ्लॅट रोखडेच ‘कावलाक’ काडचे पडटले. हे खातीर मुख्यमंत्र्यान हें बरें पावल मारतना, जो इमारतीचो सुपरवायझर आसतलो ताका जबाबदार धरप गरजेचें. ही अट पयलींच घाल्यार बरी, नाजाल्यार पयल्याच पावसांत रस्ते व्हांवून वचून लेगीत कंत्राटदाराक ताचें सोयर-सुतक कांयच आसना, तशी गत जावंक उपकारना. अशें घडून उपकारचें ना. जे मेरेन कारवाय जायना, ते मेरेन अशें काम करतल्यां मदीं भंय निर्माण जावचो ना आनी तें जाले बगर बरें काम जावचें ना हें मुखेलमंत्र्यान मतींत धरप गरजेचें. घडणूक घडले उपरांत कंत्राटदारांक काळे वळेरेंत घालप हातूंत कांयच अर्थ ना.
दुसरें म्हणल्यार, जे पद्दतीन बिगर गोंयकार येवन जमनी विकत घेवंक लागल्यात, तें पळयल्यार फुडें गोंयकारां खातीर जमीन उरची ना अशी लोकांची खंत आसा आनी लोकांक हुस्कोय आसा. ह्या हुस्क्यांत तथ्य आसा. कित्याक तर हालीं हालीं दोंगरांचेर लेगीत व्हडले व्हडले प्रकल्प येतना दिसतात. अशें जालें जाल्यार गोंयकारांक जमीन उरची ना आनी उरलीय जाल्यार ती खूब म्हारग आसतली. हाचें भान दवरून सरकारान बेगोबेग पावलां उबारपाची गरज आसा.
ही येवजण चालीक लायतना सरकारा मुखार खूब आव्हानां येतलीं. खरो गोंयकार कोण? आनी बिगर गोंयकार कोण? हें थारावचें पडटलें. त्या वेळार घडये रिव्होल्युशनरी गोवन्स पार्टीच्या ‘पोगो’ विधेयकाचीय लोकांक याद येत. गोंयकार वंचीत उरलो जाल्यार लोकां मदीं राग तयार जातलो आनी तो तयार जावचो ना न्हय म्हूण सरकाराक एक वळेरी तयार करची पडटली आनी हे फ्लॅट दितना बारीकसाण दवरची पडटली.
अशे घर प्रकल्प तयार जातात तेन्ना राजकारण्यांच्या सोयर्या दायर्यांक प्राधान्य मेळटा. कांय जाण दुसर्यांच्या नांवार आपल्याकय सुवात मेळयतात. अशे घोटाळे जावचे न्हय म्हूण सरकाराक कसरत करची पडटली. तशें जालें जाल्यार त्या त्या सरकाराचें नांव पेड्डेर जाता. हाचें भान आमच्या मुख्यमंत्र्यांक आसतलें हातूंत दुबाव ना.
सगळ्यांत म्हत्वाचें म्हणल्यार सरकारान हे फ्लॅट दितना लोकांक रीण मेळोवन दिवपाचीय तजवीज करची पडटली. नाजाल्यार सामान्य व्यक्तीक रीण मेळप तशें सोंपें ना. रीण जाय जाल्यार सरकारी नोकरी आशिल्ल्या व्यक्तीची श्युअरीटी (हमी) दी आनी ‘हीं-तीं’ कागदपत्रां मागलीं जाल्यार कोणूच फ्लॅट घेवंक शकचो ना. बँकेंतली ही आडखळ पयस करून तांचे खातीर कळंतर कमी थारावप बरें जातलें.
सरकारान तालुको पांवड्यार ह्यो इमारती उबारल्यो जाल्यार लोकांक आपल्या मुळा कडल्यान पयस वच्चें पडचें ना. सरकारान हाचो विचार करून लोकांक आनीक एक थाकाय दिवं येता. अशें जालें जाल्यार लोक आपली परंपरा, उत्सव आनी धर्मीक कार्यावळीं कडल्यान पयस जावचे नात. हातूंतल्यान आमचें गोंयकारपण आनी घराबे तिगून उरपाची गरज आसा. सरकारान हाचोय विचार करचो आनी लोकांक मजतीचो हात दिवचो.
संजय बोरकार
9921343430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
