भांगरभूंय | प्रतिनिधी
4 टक्के दर वाडीक मंजुरी, 2029-30 मेरेन दर वाडत वतले
पणजी : पयलींच म्हारगायेक लागून चिंतेस्त आशिल्ल्या नागरिकांक आतां वीज दरवाडीचो झटको बसपाचो आसा.
संयुक्त वीज नियामक आयोगान (जेईआरसी) 2025-26 ते 2029-30 ह्या पांच वर्सां खातीर सरासरी 4 टक्क्यांची दरवाड मंजूर केल्या. नवें दर 1 ऑक्टोबर सावन लागू जाल्यात. हे विशीं आयोगान हालींच आदेश जारी केल्यात. हाचे पयलीं वीज खात्यान 2025-26 ते 2027-28 खातीर 4.8 ते 5.9 टक्क्यांची दरवाढ करपाचो प्रस्ताव दिल्लो.
दरवाडीचो घरगुती, वेवसायीक, उद्देगीक, कृषी मळार गिरायकांक शॉक बसतलो. पयलीं उणो दाब आशिल्ल्या घरगुती गिरायकांक 0 ते 100 युनिट मेरेन दर युनीट 1.90 रुपया दिवचे पडटाले. 2025-26 वर्सा तातूंत वाड जावन 1.95 रुपया दिवचे पडटले. 101 ते 200 युनिटा खातीरचें दर प्रती युनीट 2.80 रुपयां वेल्यान 2.90 रुपया, 201 ते 300 युनिटा खातीरचें दर प्रती युनीट 3.70 रुपयां वेल्यान 3.90 रुपया, 301 ते 400 युनिटा खातीरचें दर प्रती युनीट 4.90 रुपयां वेल्यान 5.15 रुपया, जाल्यार 400 युनिटच्या वयर 5.80 रुपयांवेल्यान 6.20 रुपया प्रती युनीट इतलें वाडयलां. अर्थीक वर्स 2029-30 मेरेन हें दर वाडत वतले.
उणें दाब आशिल्ल्या उद्देगीक गिरायकां खातीर 0 ते 500 युनीट मेरेन प्रती युनीट 4 रुपया दिवचे पडटाले. आतां तातूंत वाड जावन प्रती युनीट 4.20 रुपया दिवचे पडटले. जाल्यार 500 ते 100 युनीट मेरेन प्रती युनीट 4.65 रुपयांच्या जाग्यार 4.70 रुपया भरचे पडटले.
जाल्यार 500 परस चड वापरपी गिरायकांक प्रती युनीक 5 रुपया भरचे पडटले. उणो दाब आशिल्ल्या कृषी गिरायकांक प्रती युनीट 1.55 जाग्यार 1.60 रुपया दिवचे पडटले. जाल्यार उण्या दाबाच्या 10 ते 80 किलो वॉट मेरेन दर म्हयन्याक वीज वापरप्यांक 1.65 जाग्यार 1.70 दिवचे पडटले. जाल्यार 85 किलो वॉट दर म्हयन्याक वीज वापरप्यांक 1.90 रुपया दिवचे पडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
