गोंयकारांक रोजगार दिवपाक कोंकणी सक्तीची केल्या : मुख्यमंत्री
भांगरभूंय | प्रतिनिधी
गोवा मराठी अकादेमीच्या सृजन संगम युवा महोत्सवाचें उक्तावण
दिवचल ः गोंयांत स्थलांतरितांचो आंकडो वाडत आसा. ताका लागून मूळ गोंयकारांक रोजगारांत संद मेळची म्हूण सरकारान कांय निर्णय घेतल्यात. सरकारी नोकऱ्यांनी लिखीत कोंकणी सक्तीची केल्ल्यान गोंयकारांक नोकरी मेळप सोंपें जातलें. पूण गोंयांत मराठीची व्हड परंपरा आसा आनी मराठींतल्यान शिकपी लोकांचेर कसलोच अन्याय जावंक दिवचों ना अशें आश्वासन मुख्यमंत्री डॉ. प्रमोद सावंत हांणी दिलें. काल रवींद्र भवन साखळे आयोजीत गोवा मराठी अकादेमीच्या सृजन संगम युवा महोत्सवाच्या उक्तावण सुवाळ्यांत ते उलयताले. ह्या वेळार परेश वासुदेव प्रभु हांणी बरयल्लें ‘’गोमंतकाचा आत्मस्वर- मराठी’ ह्या पुस्तकाचें प्रकाशन जालें. कोंकणी राजभास आनी मराठी गोंयची सहभास आसा. तेन्ना मराठीचेर कसलोच अन्याय जावचों ना अशें आश्वासनूय डॉ. सावंत हांणी दिलें.
ह्या वेळार परेश प्रभु हांणी सांगलें, गोंयचे मराठी परंपरेचो इतिहास शिलालेख, ताम्रपट, ग्रांथिक पुरावो आनी त्या काळांतल्या पुर्तुगेज प्रशासनांत आनी शिक्षणांत मराठी भाशेचो वापर करपा विशींचे पुरावे ह्या पुस्तका वरवीं नवे पिळगे मुखार दवरल्यात. कोंकणी आनी मराठी ह्यो दोनूय भासो भारतीय भास आशिल्ल्यान इंग्लीश भाशेचेर आक्रमण आडावपा खातीर दोनूय भाशां मदीं समन्वय आनी सहकार्याची गरज आसा.
गोवा मराठी अकादेमीचे अध्यक्ष अनिल सामंत हांणी येवकार दिलो. गोंयचे तरणाटे पिळगेन मराठीची जतनाय आनी प्रचारांत योगदान दिवचें असो उलो तांणी मारलो.
सरकारान गोंय सरकाराच्या कर्मचारी भरती आयोगाचे परिक्षे खातीर कोंकणी विशय सक्तीचो केला आनी मराठी भाशे कडेन आडनदर केल्या. हो निर्णय बेगोबेग स्थगीत करचो अशें गोवा मराठी अकादेमी सरकाराक आवाहन करता. तशेंच गोंय घटक राज्य जाले उपरांत आयज मेरेनच्या सरकारांनी राजभास कायद्या खाला कोंकणी आनी मराठीक समान दर्जो दिला. गोंय मराठी अकादेमीचे कार्यकारी समितीन कोंकणी आनी मराठीक आदले भशेन समान दर्जो दिवचो, असो थाराव पास केल्लो. तें निवेदन ह्या वेळार मुख्यमंत्री सावंत हांकां सादर केलें.
डॉ. सावंत हांचे हस्तुकीं सृजन संगम युवा महोत्सवाचें उक्तावण केलें. ह्या वेळार परेश प्रभु, गोवा मराठी अकादेमीचे अध्यक्ष प्राचार्य अनिल सामंत, उपाध्यक्ष चंद्रकांत कृष्ण गावस, इन्स्टिट्यूट मिनेझिस ब्रागांझाचे अध्यक्ष दशरथ परब, सृजन संगमाची संयोजक पौर्णिमा केरकार आनी रवींद्र भवनाचे उपाध्यक्ष दत्ताराम चिमुलकार हाजीर आशिल्ले.
विठ्ठल शेळके आनी शुभदा च्यारी हांणी सूत्रसंचालन केलें. ह्या वेळार वेगवेगळ्यो सर्तीं आयोजीत केल्ल्यो, जांकां तरणाट्यांचो व्हड प्रतिसाद मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
