भांगरभूंय | प्रतिनिधी
होमगार्डांच्या 143 जाग्यां खातीर आठ हजारां परस चड अर्ज आयल्यात. आंकडे पळयल्यार गोंयांत बेरोजगार तरणाट्यांचो आंकडो व्हडलो आसा, अशें दिसतलें. पूण तशें ना. कारण मध्यमवर्गांतले चडशे गोंयकार तरणाटे उण्या पगाराची तरी नोकरी करताच. कोणूच बेकार रावनात. अर्थांत हाका आडवादूय आसात. आपणाक चड पगाराची नोकरी मेळची हे इत्सेन सगले आपले परीन सदांच यत्न करतात. तातूंत सरकारी नोकरी आसल्यार ताचेर उडयोच पडटात. होमगार्डाच्या देड हजार जाग्यांक मान्यताय मेळ्ळ्या. सध्या 1230 आसात. 270 नवे घेतले. भितरल्या 143 जाग्यां खातीर भरती प्रक्रिया सुरू जाल्या. सरकारान तांकां सरकारी नोकऱ्यांनी 10 टक्के आरक्षण दिवपाचें थारायलां. म्हणटकच बरें काम करपी होमगार्डांक फुडाराक पुलीस, बंदखण- अबकारी गार्ड जावं येता, उजो पालोवपी दळ, रानां खात्यांनीय काम मेळूं येता.
गोंय कर्मचारी निवड आयोगा वतीन हाचे मुखार नोकऱ्यो दितले. ते खातीर संगणकाचेर परिक्षा घेतले. नोकरे खातीर लांच, कोणाचो वशिलो लावचो पडचो ना, अशें फाटीं सरकारा वतीन जाहीर केल्लें. उपरांत कॅश फाॅर जाॅब भानगड भायर सरली. पूण तातूंत घुस्पल्ल्या दुबावितांनी एकल्याक पसून सरकारी नोकरी दिवंक ना आनी हे पुराय भानगडींत एकलोय लोकप्रतिनिधी घुस्पूंक ना, अशें पुलीस खात्यान जाहीर केलें. निवड आयोगाक लागून हाचे मुखार गुणवत्तेचेरूच सरकारी नोकरी मेळटली हे आशेन तरणाट्यांनी सुसकार सोडला खंय. होमगार्डांक नोकरेक आस्पावन घेतना गुणेस्त कामगार, कर्मचाऱ्यांक पयलीं सरकारी नोकरेंत आस्पावन घेवचे पडटले. कांय होमगार्डांक फावसो पगार मेळना. सुटयो, भत्ते, सुविधा मेळनात, डबल ड्युटी करची पडटा….. अश्यो कागाळी कांय वर्सां पयलीं येताल्यो. आतांय हेंच जायना मूं हाची तपासणी अधिकाऱ्यांक करची पडटली. कांय कामसू कर्मचाऱ्यांच्या जिवार प्रशासनाची बैलगाडी चलता. ती आपल्याक लागूनच मुखार वता, अशें कामचुकारांक दिसता, जाल्यार ताचीय चवकशी जावंक जाय. आतां वेंचून काडिल्ल्या होमगार्डांची लेखी परिक्षा पारदर्शक पद्दतीन जावची आनी चडांत चड गोंयकारांची निवड जावची, अशी आस्त सगलेच बाळगून आसात.
गोंयकार सरकारी नोकरे खातीर तळमळटात आनी गोंय पोस्ट विभागांत महाराष्ट्रांतल्या 71 तरणाट्यांक नोकरी मेळ्ळ्या, अशी म्हायती सरकारान खासदार कॅप्टन विरियातो फर्नांडीस हांच्या प्रस्नाक दिल्या. गोंय विभाग महाराष्ट्र सर्कलांत येता. पदां खातीर कोंकणी सक्तीची आनी मराठी ऐच्छीक आसा, म्हणटकच महाराष्ट्रांतल्या उमेदवारांक संद मेळ्ळ्या. हें गुणवत्तेच्या आदाराचेर जालां कांय हांगाच्या कोणा वरिश्ठान तांकां दसयल्यात, ताचो तपास जावपाची गरज आसा. कांय वर्सां पयलीं अशेंच जाल्लें. कांय गोंयकार पोस्टमनांक काडून थंय मागीर महाराष्ट्रांतले उमेदवार भरिल्ले. मुरगांवचे एके व्हडले कंपनींत भायल्यांक घेतिल्ले तेन्ना केंद्रीय मंत्री श्रीपाद नायक हांणी तिडक उक्तायिल्ली. फाटीं गोंयच्या फार्मास्युटिकल्स कंपनींनी महाराष्ट्र, गुजरातांतल्या दिसाळ्यांनी जायराती दिल्ल्यो, त्या वेळारूय बोवाळ जाल्लो. ताचें मुखार कितें जालें, तें कोणाकूच कळ्ळें ना. गोंय पोस्ट विभाग महाराष्ट्र सर्कलांतल्यान भायर काडपाक मेळना?? गोंयच्या खासदारांनी यत्न करचो. गोंयच्या राबितो दाखल्याची अट आसा. ती केंद्र सरकारा खाला येवपी खात्यांक, विभागांक लागना. पूण त्या कर्मचाऱ्यांक, खास करून भायर भोंवून काम करपी आसल्यार कोंकणी येवपाक नाका? गांवांचीं नांवां, वाटो पाठ नाकात? नोकरेचे मुलाखतीचें वळवय वचपाचें पत्र वाळपय गेलें वा बादें वचपाचें कुरीयर बांद्यां गेलें जाल्यार गोंदळ जावचो ना? तेन्ना पोस्ट जावं नाजाल्यार हांगाचें आनीक खंयचेय केंद्रीय खातें, तातूंत गोंयकारांक पयलीं संद दिवपाक जाय.
गोंय प्रशिक्षणार्थी येवजणे खाला सध्या 13,000 तरणाटे प्रशिक्षणार्थी (अप्रेंटिस) काम करतात. तांकां पांच हजार सरकारी पदां राखीव दवरल्यांत. खाजगी कंपनींनी काम करपी अप्रेंटिसांक पसून ताचो लाव जातलो, अशें गोंय कुशळटाय उदरगत संचालक एस एस गांवकार हांणी सांगलां. ही येवजण तरणाट्यांची कुशळटाय विकसीत करपाक सुरू केल्या. अप्रेंटिसशीप करतकच तांकां अणभव मेळटलो. कांय सरकारी जायरातींनी अप्रेंटिसशीप केल्ल्यांक प्राधान्य दितले अशें म्हणलां. तशें आसल्यार दरवर्सा हे येवजणे खाला चडांत चड तरणाट्यांक संद दिल्यार आनी देड- दोन वर्सां उपरांत तांकां सरकारी नोकरेंत घेतल्यार बरे. पांच ते पंदरा वर्सां मेरेन टेंपररी नोकरी करपीय बरेच सरकारी कर्मचारी आसात, तांकांय पयलीं कायम करपाक जाय. हांगांय नीज गोंयकारांक प्राधान्य मेळूंक फावो. जांचे कडेन दुयेंस, आळस आनी हेर कारणांक लागून कामां जायनात, तांचे खातीर व्हीआरएस येवजण काडिल्ली, ताचे खाला कितले अर्ज आयले? प्रशासन कार्यक्षम जातलें जाल्यार बरे- बरे कर्मचारी, कामगार वेंचून काडून तांकां पयलीं ‘कायम’ नोकरी दिवची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
