गोंदळांत गोंदळ

भांगरभूंय | प्रतिनिधी

फुडाराक तंत्रज्ञान, विज्ञान जिविताच्या सगल्याच मळांचेर आनीक खोल मेरेन घुसपाचें आसा. म्हणटकच गणीत आनी विज्ञान विशयाक हिस्पा भायर म्हत्व येतलें.

धावेची परिक्षा ही विद्यार्थ्यांच्या जिवितांत व्हडलो बदल घडयता. सगलेच तशें म्हणटात. म्हणून भुरग्यांच्या मनांत एक भिरांत निर्माण केल्या. ताका लागून विद्यार्थी हे परिक्षेक भियेतात. आमी सदचे परिक्षे भशेन हिवूय एक अशें समजुपाक जाय, असो युक्तीवाद कांय जाण करतात. ही परिक्षा म्हत्वाची थारपा फाटलें कारण म्हणल्यार हे यत्तेंत करियर थारता. विद्यार्थी विज्ञान फांट्यांत गेल्यार बारावेंत बऱ्या गुणांनी पास जावन दोतोर जातलो. काॅमर्स शिकल्यार वेवसाया कडेन संबंदीत करियर आपणायतलो. आर्ट्स शिकून वकील, शिक्षक बी जातलो. अर्थांत अमूक शिकून तमूकच जावचे बदला भलतेंच करियर आपणायिल्ले आनी तातूंत यशस्वीय जाल्ले आसात. पूण धावेची परिक्षा ही दार कशी. तें उक्तें जालें काय मुखार साबार वांटो दिसतात, तुमचें गूण मतींत घेवन आवड आसा ते वाटे वयल्यान चलपाचें. बारावे उपरांतूय ती वेंचूंक मेळटा.
धावेचे परिक्षेंत विद्यार्थी नापास जातात, ते विशय म्हणल्यार गणीत आनी विज्ञान. गणितांत 100 टक्के गूण घेवपी विद्यार्थी आसात. महाराष्ट्र सरकारान दोन दिसां पयलीं एक निर्णय घेतला. तो म्हणल्यार धावेचे परिक्षेंत गणितांत आनी विज्ञानांत पास जावपाक नवें अभ्यास धोरण चालीक लागलें काय 20 गूण पुरो जातले. पयलीं 35 आशिल्ले. नव्या शिक्षणीक धोरणा प्रमाण गणीत 80 तर विज्ञान 70 गुणांचो पेपर आसतलो. आदल्या परिक्षांतली, खेळांतली कामगिरी पळोवन 20 जादा गूण मेळटात. आतां कलाकार विद्यार्थ्यांकूय ते दिवपाची कल्पना कांय जाणांचे तकलेंत घोळपाक लागल्या.
महाराष्ट्रांत नवें शिक्षण धोरण चालीक लागतकच गणीत, विज्ञानांत 20 वा ताचे परस चड गूण घेवप्यांक इकरावेंत प्रवेश दितले. आतां एटीकेटी वरवीं तो मेळटा. जांकां हे विशय आवडनात वा तकलेंत वचनात ते विद्यार्थी नापास जातात. ते मुखार शिकपाक वचनात. थोडे निरशेतात. देखून ही भिरांतूच काडपाक महाराष्ट्र सरकारान खंय हो उपाय काडला. कांय जाणांक हो निर्णय मतदारांक आकर्शीत करपाचो राजकी डावपेच दिसता. कारण 20 नोव्हेंबराक थंय विधानसभा वेंचणूक आसा. उणेच 20 गूण घेवपी विद्यार्थ्यांक इकरावेक प्रवेश दितले, पूण तांच्या प्रमाणपत्राचेर एक शेरो मारतले. ताचे सयत तांकां प्रवेश घेवचो पडटलो. हें जर पसंत ना जाल्यार तांकां परत त्या विशयांची परिक्षा दिवची पडटली. मागीर नवें प्रमाणपत्र मेळटलें. जांकां गणीत वा विज्ञान ह्या दोनूय विशयांचेर आदारीत करियर करपाचें ना, तांचे खातीर हो निर्णय बरो. पूण तांकां पयलींच करियर थारावचें पडलें. तशें करपी विद्यार्थी खूब उणे. धावेचे चडशे विद्यार्थी ह्याच दोन विशयांत नापास जातात, ही गजाल खरी. पूण हो ताचे वयलो उपाय न्हय. तोय बी गोंदळांत घालपी. महाराष्ट्र सध्या वेंचणूक प्रचाराचे होळयेंत गुल्ल आशिल्ल्यान ह्या निर्णयाचेर व्हडलीशी भासाभास जावंक ना. मात, सोशल मिडियाचेर कांय जाणांनी प्रतिक्रिया दिल्यात. चडश्यो ह्या निर्णयाच्या विरोधांत!
कांय जाणांच्या मतान, हाचे पयलीं विद्यार्थी रात दीस अभ्यास करून, खाशेले क्लास घेवन गणीत, विज्ञानांत पास जाले, तांची मेहनत, पयसो फुकट गेलो. ट्युशनाचो धंदो करप्यांक हो निर्णय मारक थारूं येता. थोड्यांक विद्यार्थ्यांचो फुडार सुदारतलो अशें दिसता. चडशे शिक्षणतज्ञ ह्या निर्णयाचेर बेजार आसात. जग बदलत आसा. फुडाराक तंत्रज्ञान, विज्ञान जिविताच्या सगल्यांच मळांचेर आनीक खोल घुसपाचें आसा. म्हणटकच गणीत आनी विज्ञान विशयाक चड म्हत्व येतलें, अशें तांचें मत. खरें तें. संगणक वॅबसायटी, आयटी, एआय मळांचेर तर गणिता बगर पर्याय ना. म्हणटकच चडांत चड विद्यार्थ्यांक हे विशय शिकचेच पडटले. ताची विद्यार्थ्यांक गोडी कशी लावची, ते सोंपेपणी पास कशे जातले, ताचेर विचार करचो पडटलो. विद्यार्थ्यांक पास जावपा खातीर गूण उणें दवरप हो उपाय न्हय. शिक्षणाचो पांवडोय सुदारपाची गरज आसा. आयच्या पदवी घेतिल्ल्या आनी पयल्या वर्गांत पास जाल्ल्या विद्यार्थ्यांक चार ओळी शुद्ध बरोवपाक कळनात. नोकरे खातीर अर्ज बरोवंक येना. कांय उतरांचो सादो अर्थ कळना. कोण दिसाळीं, पुस्तकां वाचनात. भोवतेकांक सामान्य ज्ञान आसना. गुगल सर्चच्या जमान्यांत हें जावप, हाचे सारकी लजेची गजाल ना. पास जावपाचे गूण उणें करप म्हणल्यार शिक्षणाचो दर्जोच उणो करप अशें तुमकां दिसना?