भांगरभूंय | प्रतिनिधी
मुख्यमंत्री : गरज पडल्यार आडनांव बदल कायद्यांत बदल
भांगरभूंय । प्रतिनिधी
पणजी : नांव, आडनांव बदलांच्या सगल्या प्रकरणांची चवकशी करून ताचो अहवाल करतले. गैरवापर करचे खातीर नांवांत बदल केला, अशें दिसल्यार दोशींक बंदखणींत धाडटले. ह्या अहवालाचो अभ्यास करून गरज पडल्यार नांव बदल कायद्यांत सुदारणा करतले, अशें मुख्यमंत्री डॉ. प्रमोद सावंत हांणी सांगलें. सोमारा विधानसभेंत आमदार विरेश बोरकार आनी हेर आमदारांनी मांडिल्ले लक्षवेधी सुचोवणेचेर ते उलयताले.
मुख्यमंत्र्यान सांगलें, हे खातीर सरकारान 1990 च्या कायद्यांत 2019 आनी 2022 त बदल केल्यात. 2019 त नांव बदला खातीर अटी खर केल्ल्यो. 2022 त नांव बदलांचे सगले अर्ज हाताळणीचें काम दिवाणी न्यायालयाक दिलां. तशेंच गोंयांत जल्मल्ल्या, जल्माची नोंद गोंयांत आशिल्ल्या आनी जांचें पालक तशेंच आजो- आजी गोंयांत जल्मल्या, त्याच व्यक्तींक नांव बदलपाचो अधिकार दिला.
सध्या कांय प्रकरणां चर्चेंत आयल्यात. हे विशीं आमी चवकशी केली तेन्ना कांय कांय प्रकरणांत नांव आनी आडनांव कायदेशीर तरेन बदल्लां, अशें मुखार आयलां. एके मुस्लीन व्यक्तीन आपलें नांव क्रिस्तांव धर्मांतलें केल्लें. हाची चवकशी केले उपरांत कळ्ळें, ते व्यक्तीचो बापूय मुस्लीम आनी आवय क्रिस्तांव आशिल्ली. दोगांचो घटस्फोट जाले उपरांत ते व्यक्तीन आपले आवयच्या धर्मा प्रमाण नांव घेतिल्लें. गोंयांत जावपी नांव, आडनांव बदला संबंदांत सरकार गंभीर आसा. गरजे प्रमाण ह्या कायद्यांत बदल करपाचो आमी विचार करतले, अशें मुख्यमंत्र्यान सांगलें.
ते आदीं आमदार विरेश बोरकार हांणी सांगलें, गोंया भायले लोक नांव, आडनांव बदलून गैरफायदो घेतात. अशे लोक गोंयांतल्या सरकारी येवजण्यांचो लाव घेतातूच ते भायर ते आडनांव बदलून त्या विशिश्ट समाजांतल्या लोकांकूय फटयतात. हालींच अलीसाब हालगुंडी नांवाचे व्यक्तीन आपलें नांव सुजल गांवकार अशें केलां. आरजी पक्षान मांडिल्ल्या पोगो विधेयकांत नांव बदला संबंदांत स्पश्ट तजवीज आसा. असले प्रकार आडावचे खातीर सरकारी ती तडवीज आपणावपाची गरज आसा.
मूळ जल्म दाखल्यांत बदल ना
आमदार कार्लोस फेरेरा हांणी सांगलें, कांय लोक कायद्यांतल्या 2022 तल्या बदला प्रमाण मूळ जल्म दाखल्यांत बदल करतात. ह्या वेळार मुख्यमंत्र्यान स्पश्ट करतना सांगलें, मूळ जल्म दाखल्यांत कसलोच बदल करिनात.
जातीच्या दाखल्या खातीर समाज प्रमाणपत्र गरजेचें
मानवाधिकार आयोगान जात दाखल्या बगर समाज प्रमाणपत्र सक्तीचें आसचें न्हय अशी शिफारस केल्या, अशें आमदार गोविंद गावडे हांणी सांगलें. हाचेर मुख्यमंत्र्यान सांगलें, आयोगाची शिफार, तपासतले. हाचेर गावडे हांणी सांगलें, समाजाचें प्रमाणपत्र आसले बगर आरक्षण मेळपाक शकना.
नांव बदलपाक वर्सांक 183 अर्ज
मेळिल्ले म्हायती प्रमाण फाटल्या पांच वर्सांत नांव बदलचे खातीर 915 अर्ज आयल्यात. हाचोच अर्थ वर्साक सरासरी 183 अर्ज येतात. सगल्यांत चड अर्ज तिसवाडी आनी फोंडें म्हालांतल्यान येतात. जाल्यार धारबांदोडें आनी सांगें म्हालांतल्यान तुळेंत उणें अर्ज येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
