गेविंद गावडे, जीत आरोलकार हांणी घेतलो नुस्तें मारपाचो अणभव

भांगरभूंय | प्रतिनिधी

रापणकारांच्या फेस्ताचो समारोप;  दरवर्सा महोत्सव आयोजीत करपाचें आमदाराचें आस्वासन

भांगरभूंय । प्रतिनिधी

पेडणें: पर्यटन खातें आनी आमदार जीत आरोलकार हांच्या पालवान पयलेच खेपे हरमल दर्यादेगेर रापणकारांचें फेस्त (अन्न महोत्सव) आयोजन केल्लें. 15 डिसेंबराक ताचो समारोप जालो. ते निमतान कला आनी संस्कृती मंत्री गोविंद गावडे, तांची घरकान्न तशेंच आमदार जीत आरोलकार हांणी व्हड्यांतल्यान दर्यांत वचून नुस्तें कशें मारतात ताचो अणभव घेतलो. ह्या वेळार व्हड संख्येन पर्यटक आनी लोक हाजीर आशिल्ले.

मंत्री गावडे हांणी आपलो अणभव सांगतना म्हणलें, आपणे पयलेच खेपे दर्यांत नुस्तें कशे मारतात ताचो अणभव घेतलो. ही संस्कृती आसा. ही परंपरा तिगोवन दवरचे खातीर दरेक सरकार थळाव्या कलाकारांक, थळाव्या वेवसायिकांक आदार करता. रापणकारांचें जे प्रस्न आसात, ते मुख्यमंत्री डॉ. प्रमोद सावंत सोडयतलोच, तशेंच थळावे आमदार आरोलकार हे लेगीत रापणकारांचे प्रस्न सरकारा कडेन मांडीत आसता.

कला संस्कृती खात्या वरवीं भारतीय संस्कृती, भारतीय सण, त्या सणांक उर्बा दिवचे खातीर अशा अन्न महोत्सव आनी रापणकारांचें फेस्त दर वर्सा जावप गरजेचें आसा. तातूंतल्यान पर्यटनाक लेगीत संद मेळटली, असो विस्वास मंत्री गावडे हांणी उक्तायलो.

हे आदीं दर्यांत, न्हंयेंत खूब खेपे व्हड्यांतल्यान गेला. पूण रापण कशी मारतात, नुस्तें कशें मारतात हाचो अणभव आपणें पयलेच खेपे घेतलो. हो अणभव आपले जिणेंतलो व्हड खीण आसा. अशें महोत्सव सरकार खूब खेपे मनयता. लोकांच्या आदारांतल्यान अशे कार्यावळींचें आयोजन आमदार आरोलकार हांणी फुडाकार घेवन केलां. अश्या कार्यावळींची खऱ्यानीच गरज आसा, अशें मंत्री गावडे हांणी सांगलें.

मंत्री गावडे हांचे घरकान्नीन आपलो अणभव सांगतना म्हणलें, रापण कशी मारतात हाचो अणभव घेवचे खातीर आपूण व्हड्यांत बसून दर्यांत गेल्ली. रापणी वरवीं नुस्तें मारता तें पळोवन आपल्याक खुबूच खोस भोगली. आमदार आरोलकार हांणी सांगलें, रापणकारांचें फेस्त आनी अन्न महोत्सवाचें आयोजन पर्यटन खात्या वरवीं मुख्यमंत्री डॉ. सावंत आनी पर्यटन मंत्री रोहन खंवटे हांच्या आदारांतल्यान आयोजीत केल्लो. हो दर्जेदार उत्सव मनोवपा खातीर थळावी पंचायत मंडळ लेगीत वांगडा आशिल्लें. ते भायर मांद्रें मतदारसंघांतले हेर सरपंच, उपसरपंच, पंच हांचोय व्हड आदार मेळ्ळो. असो उत्सव दर वर्सा मांद्रें मतदारसंघांतल्या दर्यादेग वाठारांत आयोजीत करतले. नुस्तेकार भावांचे जे कांय प्रस्न आसासत ते सरकार दरबारांत मांडून सोडोवपाचो आपलो यत्न आसा, अशेंय तांणी सांगलें.