भांगरभूंय | प्रतिनिधी
अस्तुरी आयज राजकारणांतली गेमचेंजर जाल्या. अस्तुरेक अर्थीक बळगें दिवन तिका मतदार केंद्रा मेरेन व्हडा संख्येन व्हरपाचो वावर वाडत आसा. तातूंतल्यान तिचो राजकारणांत येवपाचो हांवेस वाडटा, ती राजकारण, राजकारण्यांक लागीं येता. अर्थीक घुस्पागोंदळांत घुस्पावन तिका समाजा पासून पयस दवरपाचे हे यत्न तिणें समजून घेवपाक जाय. राजकारण्यांनीय एक लक्षांत दवरचें तें म्हळ्ळ्यार लाडली लक्ष्मी आसूं वा गृह आधार, गृहलक्ष्मी, लाडकी बहीण हें तात्पुरतें साधन. तोच पयसो अस्तुरेच्या उच्च शिक्षण, आरोग्य सुदारपा पासत उपेगाक हाडचो. थंयच तिची मानसिकता बदलून ती मुखेल प्रवाहांत येवप शक्य जातलें, अस्तुरेच्या सबळीकरणाचो तो एक मार्ग.
पयले फावट लाडली बहना येवजण अस्तुरी सक्षमीकरणा खातीर हाडपी त्या तेंपावयले मध्य प्रदेशाचे मुख्यमंत्री शिवराजसिंह चौहान. ते आयज केंद्रीय मंत्री आसात, प्रधानमंत्री नरेंद्र मोदी हांकां तांची राजकारणांतली तांक होल्मल्ली आसुंये. अपेसांतल्यान जैता मेरेन पावपी श्री. चौहान हाणी लाडली बहना उपरांत लाडली लक्ष्मीय हाडली. ती गोंयचे लाडली लक्ष्मी येवजणेवरी. म्हारगाय अती वाडटना अस्तुरेक (होम मेकर) घर सांबाळपाचे कशे त्रास जातात ताच्या अभ्यासांतल्यान गोंयांत 2012 वर्सा गृह आधार आयली. 2007 वर्सा सत्तेपासून पयस गेल्ल्या भाजपाक 2012 वर्सा 50 टक्के आमदारसंख्ये मेरेन पावोवपाक गृह आधारा बराबरीन येवजिल्ली लाडली लक्ष्मी पावली. आयज लाडली बहना देसांतल्या 70 टक्क्यांवर राज्यांत पावल्या. खंय ती अन्नपूर्णा, खंय ती गृहलक्ष्मी, शुभलक्ष्मी, लाडकी लक्ष्मी, विद्यालक्ष्मी, महालक्ष्मी, भाग्यलक्ष्मी जाल्या. लक्ष्मी येवजणेची ही साबार रुपां. ते येवजणेतल्यान स्त्रीशक्ती 33 टक्क्यां मेरेन विधानसभा, राज्यसभा, लोकसभे मेरेन पावपाचे वाटेर आसा.
लक्ष्मीक देवी मानलें तरी, तीय निमणे मनीस. मनशानच घडयल्ली. मनशान आपल्या कश्टांतल्यान घडयल्लें तें अर्थकारण. जावं तो दादलो वा बायल, कोण घडयता तांकां? मनीसच न्हय? ती एकली राजकारण सांबाळपाक, बदलपाक शकता? ती फकत एक गेमचेंजर. थळावें राजकारण, मतदारसंख्या, लोकसंख्या, जाती धर्माच्या मतदारांच्या मानसिकतेचो अभ्यास केल्या उपरांतूच ती जल्मता. ते खातीर अरिश्टां, संकश्टां, आडमेळ्यांतल्यान तिका, ताका वाट काडची पडटा. तिची उदरगत जातना तिका मुळा सावन ना करपाच्या येत्नाक जैत मेळना तेन्ना तिचेर अत्याचार करून, बदनामी करुन तिका सोंपोवप ही ताची मोख आसता. तशें करतना समाजमन इबाडचें न्हय हाची जतनाय घेवची पडटा. जर ती घेतली नाजाल्यार मनीसच मनशाक वडीर काडटा, कायदेय जातात.
केंद्रीय मंत्री श्री. चौहान, आदले संरक्षणमंत्री मनोहर पर्रीकार स्वतंत्र विचारांचे, अभ्यास करपी, शिकिल्ले. संघ परिवाराचे शिस्तींत वाडिल्ले. एक लाडू सगल्यांनी वाटून खावया, संघशक्ती, देशभक्ती हें शिक्षण तांकां त्या शिस्तींतल्यान मेळ्ळें. निमणे मनीसधर्म ते शिस्तीचो मध्यबिंदू, मागीर तो अरिश्टावेळार आसूं वा जैता वेळार. जेन्ना तो, ती एकलो वा एकवटीत आसता तेन्ना दोन उतरांचो रकादय मोलादीक आसता. लक्ष्मी वांगडा त्या दोन उतरांक भांगरावरी मोल येता. राजकारणांत उतरां आपणें आपल्याच भावां भयणीं आड वापरिल्लीं केन्ना केन्ना म्हारगय पडटात तें महाराश्ट्रांत हालींच जाल्ले विधानसभा वेंचणुकेंत दिसलें. ताचो लाव दोन वर्सा सत्तेंत आशिल्ल्या सरकाराक मेळ्ळो. राजकारणात वेळार प्रदेशाध्यक्ष, म्हणयारे बदलप म्हत्वाचें ठरता. जैत आनी हार कोणाक चुकना, अपेसांतल्यान वयर सरपाचें सपन पळोवप, तें उगतेंपणान सांगप हेंच लक्ष्मीव्रत. तें सांगतना, विचार मांडटना उतरां कशींय सुटचीना मनभेद दिसचेना कुडीन, मनान आनी मुखामळार हें पळोवपाचे आजच्या तेंपा वयलें आव्हान. तें फुडारांतले शांतीकायेच्या विचारांतल्यान वचपीच मोडून काडूंक शकतात. कारवायेंतल्यान.
वेंचणूक जिखपा खातीर केल्ली येवजण जेन्ना गेमचेंजर जाता तेन्ना ती चालीक लावप जितलें गरजेचें तितलेंच गरजवंतांच्या दारांत लक्ष्मी पावोवप म्हत्वाचें. भयणींक लखपती दीदी जावपाक मार्गदर्शन करतना ती स्वयंपूर्ण जाल्या, ती घरा भायर सरल्या. आतां तिका राखण दिवप, तिणें केल्ल्या खाणा जेवणांक मार्केटाची वाट दाखोवप, माची मेळोवन दिवपाचें आव्हान आसा.
लाडली बहना सुवर्णकन्या, राजकन्या कित्याक जावची ना? सुरवेक सावन महाराश्ट्रावरी राज्य भयणींक आवाज, शिक्षणाची दिका दिवपी राज्य. महात्मा ज्योतीबा फुले, संविधानाचे शिल्पकार बाबासाहेब आंबेडकार, महर्षी धोंडो केशव कर्वे हांची जल्म, कर्मभूंय. ते कर्मभूंयेंतल्या राजपाटणाची पुनर्निर्मणी करपाक सगल्या राज्यांतल्या भास, भेस संस्कृतायेक उद्येजकांनी आधार दिला. तातुंतले एके अभ्यास करपी, विचारवंत वज्रकणयेक राज्यसभेर धाडपाचो वावर नवें सरकार वेगळ्या विचारांतल्यान करतलें हातूंत दुबाव ना. विचारांची तांक नाशिल्ल्यांक सांसणाचे धांवडावपाचें कर्मय जावचें, कळाव कित्याक?
गोंयांत गृह आधाराचे पयशे एकठांय करुन मेकअपाचीं दुकानां घरांत सुरु करपी लक्ष्मी घडल्यो, दायजय राखलें, नकली भांगरय अती जालां. कोणाक दवरप, कितें सांबाळप हाचें वेवस्थापन जावपाक जाय. म्हारगाय उणी करुन, उत्सवांतय उत्कृश्ठताय हाडून. तीच लक्ष्मी.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
