भांगरभूंय | प्रतिनिधी
भांगरभूंय । प्रतिनिधी
म्हापशेंः गॅस सिलिंडराचे दरवाडी आड प्रदेश बायल काँग्रेस वतीन शुक्राराक म्हापश्यांच्या सप्तकी बाजारा वेळार निदर्शनां केलीं. तांणी ह्या वेळार चूल पेटोवन भजीं तळून भाजपा सरकाराचो निशेध केलो.बायल काँग्रेस अध्यक्ष बीना नायक हिच्या फुडारपणा खाला हीं निदर्शना केलीं. ह्या वेळार प्रतिक्षा खलप, प्रगती नागवेकार, उत्तर गोंय काँग्रेस जिल्होध्यक्ष वीरेंद्र शिरोडकार, अमरनाथ पणजीकार, विजय भिके आनी हेर कार्यकर्ते हाजीर आशिल्ले.
म्हारगाय वाडोवन भाजप सरकार बरे दीस कशें हाडटलें, असो प्रश्न विचारून ह्या वेळार पंतप्रधान नरेंद्र मोदी आनी भाजप सरकारा आड घोशणा दिल्यो. सरकारान गॅस दरवाड बेगोबेग फाटीं घेवपाची मागणी काँग्रेस पक्षान केल्या. काँग्रेस कार्यकर्तांच्या हातांत गॅस सिलिंडराचे कटआवट आनी बॅनर आशिल्ले. म्हापशें मार्केटांत फेरी मारून काँग्रेस वावुरप्यांनी लोकां मदीं म्हारगाये आड जाग्रुताय केली.
विशेश म्हणल्यार काँग्रेसाच्या बायल वावुरप्यांनी एके हातगाडयेर चिऱ्यांची चूल पेटोवन ताचेर भजी तळ्ळीं. हे हातगाडये कडेन एक रिकामो गॅस सिलिंडर दवोरल्लो. पंतप्रधान मोदी हांचे अच्चे दिन हें फकत दिसाचें सपन जालां. ह्या भाजपा सरकाराक लागून लोकांक वायट दीस पळोवपाची वेळ आयला. साबार लोक म्हारगायेन बेजारल्यात. इंधनूच न्हय जाल्यार कड्डनाचे दर वाडल्यात. ह्या भाजपा सरकाराक साबार लोकांचें कांयच पडिल्लें ना अशी टिका बीना नायक हिणे केली.
विधासभा वेंचणुके वेळार भाजपा पक्षान लोकांक तीन फुकट गॅस सिलिंडर दिवपाचें उतर दिल्लें. हें सिलिंडर खंय आसात. हे सिलिंडर ना ते नात उरफाटें गॅस सिलिंडरां वयलें अनुदान सरकारान कित्याक बंद केलें. काँग्रेस पक्ष सत्तेर आसतना गॅस सिलिंडर 410 रुपया आशिल्लो. भाजपान तो 1117 रुपयांचेर पावयलो. हे दरवाडीक लागून साबार लोकांचे बजेट इबाडलां अशें तिणे सांगलें.
काँग्रेस सत्तेर आसतना गॅस सिलिंडर दरवाड जाल्ली तेन्ना केंद्रीय मंत्री स्मृती इराणी रस्त्यार येवन आंदोलन आनी निदर्शना करताली. सध्या म्हारगाय तेंगशेर पावल्या तेन्ना स्मृतीक विस्मृतींत गेल्या काय. ती आतां कित्याक एक उतर उलयना अशें बीना नायकान विचारलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
