भांगरभूंय | प्रतिनिधी
भांगरभूंय । प्रतिनिधी
मुरगांवः वास्को शारांत वेगवेगळ्या सुवातांनी रस्ते खणपाचें परत सुरू जालां. हाका लागून सरकारी मालमत्तेचें लुकसाण जावपाक लागलां. हुतात्मा चौकाचे कडेन आशिल्लो रस्तो रातयां खणिल्ल्यान थंय रस्त्या पोंदच्यान व्हेल्ली उदका पायपलायन फुटून लाखांनी लिटर उदक रस्त्या वयल्यान व्हांवंन वचपाचो प्रकार घडलो.
पोरूं अदानी समूहाचे जमनी पोंदच्यान गॅस लायन घालपा खातीर पुलीस कॉलनीं सावन रस्तो खणपाचें काम केल्लें. हाका लागून उदका पाायपलायन फुटून कांय दीस वास्कोकारांक पियेवपा खातीर उदक मेळपाक त्रास जाल्लें. आतां गॅस लायन घालपाचें काम परत सुरू केलां. ते करपी कंत्राटदारान वीज खातें, बांदकाम खाते, भारत संचार निगम, मुरगांव पालिका, तशेंच संबंदीत अधिकाऱ्यांक विश्वासांत घेनास्तना रस्तो खणपाचें काम केल्ल्यान आयतारा राती हुतात्मा चौकांत बांदकाम खात्याची उदकाची मुखेल पायपलायन फुटली. ताका लागून वास्कोंतल्या कांय वाठारांत लोकांच्या नळांक उदक येवपाक शकले ना. पायपलायन फुटल्ल्यान उदकाची नासाडी जाली.
पोरूं वास्को शारांत डॉ लुईस गोम्स रस्त्या पोंदच्यान अदानीची गॅस लायन घालपा खातीर रस्तो खणटना वीज खात्याची मुख्य वीज केबल तुटल्ल्यान सडा, बोगदा, जेटी, बायणा आनी वास्को शारांत 48 वरां परस चड वेळ वीज पुरवण बंद पडिल्ली. एफ एल गोम्स रस्तो खणून टिळक मैदाचे सामकारच्या रस्त्याचें लुकसाण केल्लें. अदानी समूहान गॅस लायन घालपाचें काम करतना आता् मेरेन सरकाराचें कोट्यांनी रुपयाचें लुकसाण केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
