भांगरभूंय | प्रतिनिधी
मडगांवः घरगुती आनी वेवसायिक एलपीजी गॅस सिलिंडरांचे दर वाडल्यात. 7 मार्चा पयलीं गिरायकांनी सिलिंडर बुक केल्लो आसलो तरी आयच्यान वा ताचे उपरांत मेळपी बिलाचेर गोंया खातीर नवो दर 927 रुपया आसतलो. अशें सांगून सिलिंडर विकतें घेतना सदांच वितरका कडल्यान बिल मागचें अशें गोवा कॅन हांणी उलो मारला.
दर वाडिल्ल्यान राज्यांतल्या आनी देशांतल्या एलपीजी गिरायकांक अर्थीक भार घेवचो पडटलो. 7 मार्चा पसून घरगुती एलपीजी सिलिंडरांचे दर खूब वाडयल्यात. आतां गिरायकांक 14.2 किल घरगुती सिलिंडरा खातीर 927 रुपया फारीक करचे पडटले.
हाचे पयलीं राज्यांत घरगुती एलपीजीचो दर 867 रुपया आशिल्लो. देखून आतां गिरायकांक दर सिलिंडराक 60 रुपया चड फारीक करचे पडटले. हे फांटभूंयेर गोवा कॅन हांणी सादूर रावपा खातीर एक पत्रक जारी केला. ते प्रमाण 7 मार्चा सावन सिलिंडरांचे दर वाडल्यात आनी गिरायकांनी 7 मार्चा पयलीं बुकींग केल्लें आसलें तरी नव्या दरां प्रमाण तांकां बिलां दितले.
डिलिव्हरी करतना सिलिंडराचें वजन तपासात आनी सील योग्य रितीन बंद आसा हाची खात्री करात. गॅस एजन्सीन होम डिलिव्हरी न्हयकारली वा चड पयशे घेता जाल्यार गिरायक [email protected] ह्या ईमेलाचेर कागाळ दाखल करूंक शकता. गॅस कंपनी आनी वितरका विशीं चड जाणून घेवपा खातीर, pmuy.gov.in/mylpg.html संकेतथळाक भेट दिवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
