भांगरभूंय | प्रतिनिधी
समाजांतल्या वास्तवतेचें दर्शन घडोवपी आनी समाजाक एक देखदिणो संदेश दिवपी तियात्र म्हणल्यार ‘गॅराक न्होय वॉर्राक मेलो’, जाचो लेखक जावन आसा फ्रान्सीस दी तुयें.
आवय- बापूय जशें आपणें त्रास, कश्ट काडले ते भुरग्यांक काडचे पडचें न्हय म्हण तांकां जाय तें सगळें दितात. हाचो परिणाम म्हूण कांय भुरगीं वायट मार्गार पावतात आनी भाव आपले भयणीक जिवेशीं मारता. उपरांत पुराय घराबोच कोसळून वता.
आयची परिस्थिती लक्षांत दवरून फ्रान्सीस दी तुयें हांणी हो तियात्र बरोवन माचयेर सादर केला. आवय- बापूय आपणे जशे त्रास काडल्यात तशे त्रास भुरग्यांक दिवपाक सोदनात. ह्या कारणाक लागून भुरगीं आपल्याक जाय तशें करतात आनी तांकां समजणी येता म्हणल्यार खूब वेळ जाल्लो आसता. भुरगीं बायक घेवन भोंवतात आनी अपघात जातात. शिकपाचे पिरायेर भुरगीं कसिनोत वतात. ड्रग्स घेतात. आवय- बापूय भुरग्यांक जे त्रास, कश्ट आपणें काडल्यात ते तांणी तांकां दाखोवचे आनी तांकां जाय ते तेन्नाच्या तेन्ना दिवचें न्हय. आपलो आनी आपल्या भुरग्यांचो फुडार बरो करचो.
दरेका पड्ड्या फाटल्यान कांतारां आयल्यात. जशे दुवेट, चवको आनी सोलो. तशेंच सायड शो आशिल्ले. ह्या सगळ्या कांतारां परस चड आवडिल्लें कांतार म्हणल्यार, ओलगा वाझान ओपिनीयन पोलाचेर गायिल्लें कातार. जेक सिकेर हांणी गोंयां खातीर केल्लो वावर आनी खूब म्हायती कांतारांत आसली. फ्रांसीस रिबेलो (ब्रुनो), प्रिन्सी आलेमांव (रीमा) आनी रोनीवर वालीस (फ्रांसीस) हांणी वास्तववादी भुमिका केल्यात. उल्हास तारी हांणी म्हालगड्याची भुमिका बेसबरी केल्या. आपल्या अणभवांतल्यान जिणेचें गिन्यान शिकोवन तरणे पिळगेक सादूर करपाचो तो यत्न करता.
फ्रांसीस दी तूयें हांचे खाशेलपण म्हणल्यार पॉलीटिकल कांतारां. तियात्राचें कथानक हें प्रेक्षकांक देख दिवपा सारकें आशिल्लें. आयचे पिळगेन हो तियात्र निश्चीतूच पळोवचो.
सिल्वीया आल्मेदा
सरकारी महाविद्यालय, केपें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
