भांगरभूंय | प्रतिनिधी
हैदराबाद : आमकां खंयचेय खबर नाशिल्ले आनी पयसुल्ले लेगीत सुवातेर वचपाचें आसल्यार आमी गूगल मॅपाची मजत घेवन ती सुवात सोदून काडटातूच. पूण गूगल मॅपूच स्वता चुकीची म्हायती दिवपाक लागल्यार कितें जाता हाचो अणभव पांच अभियंत्यांनी घेतलो. पांच अभियंते ट्रेकाक वचपाक भायर सरले. हे खातीर तांणी गूगल मॅपाची मजत घेतली. गूगल मॅपांन तांकां चुकीची वाट दाखयिल्ल्यान ते चुकून दाट रानांत पावले आनी थंयच आडकले.
एका अभियंत्यान ही म्हायती आपल्या आवयक दिली. ते उपरांत आवयन गृहमंत्र्याक हे विशीं म्हायती दिली. म्हायती मेळटकच पुलिसांनी ते सुवातेर वचून पांच अभियंत्यांक सुरक्षीत सुवातेर हाडले. हितेश सुरेश पेनमुसु, हिमतेज वारा प्रसाद वाल स्वामी, लिहित चेतन्य मेका, सुशील रमेश भंडारू आनी विकियत नागेश्वर राव चिलियाला अशीं त्या पांच अभियंत्यांचीं नांवां आसात.
हे अभियंते आंध्र प्रदेशांतल्या हैदराबाद आनी तेलंगनाचे रावपी आसात. नर्मदा जिल्ह्यांतल्या जाखानी लागसारच्या रानांतल्या स्टॅच्यू ऑफ युनिटी वाठारांत ट्रेकिंग करपाचो अणभव घेवपाक ते आयिल्ले. गूगल मॅपाचेर सोद घेतले उपरांत तांकां तुंगाई दोंगुल्लेचो वाठार मेळ्ळो. मागीर ट्रेकिंग प्रवास सुरू जालो. जाखानी गांवांतल्या भांगडा फालिया लागसार सकाळीं पांच वरांचे सुमाराक तांणी आपल्यो मोटारसायकली दवरल्यो. आनी गूगल मॅपाचे मजतनी ट्रेकिंगाक सुरवात केली. दनपारां 2:30 वरांच्या सुमाराक वाट चुकल्या हें तांकां कळ्ळें. गूगल मॅपांन तांकां चुकीची वाट दाखयिल्ल्यान अडचणीत पडल्यात हें कळटकच तांणी वाट सोदपाचो यत्न केलो. वाट सोदप कठीण आसा हे तांकां कळटकच एका अभियंत्यान आपल्या आवय कडेन संपर्क केलो. आवयन गृहमंत्र्या कडेन संपर्क सादलो आनी उपरांत पुलिसांनी वचून तांकां सोडयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
