भांगरभूंय | प्रतिनिधी
वाळपयः शिक्षणीक वर्साचे सुरवेक गुळेली सत्तरीच्या सरकारी माध्यमीक विद्यालयांत संवसारीक पर्यावरण दीस मनयलो.
ह्या वेळार माचयेर मुखेल सोयरे म्हूण शाळेचे मुख्याध्यापक सुरज नायक, ज्येश्ठ शिक्षक दिलीप पालेकार, अजीत राणे, शिक्षिका शितल लाड, अपर्णा सावयकार, संयोजक प्रेमानंद च्यारी आनी शारिरीक शिक्षक अनुध्य पोकळे हाजीर आशिल्ले.
कल्पिता गावडे आनी सांगात्यांनी पर्यावरण गीत सादर केलें. मुखेल सोयऱ्यांनी आनी विद्यार्थ्यांनी लायिल्ल्या झाडांच्या रोप्यां मुखा दिवली पेटयली.
प्रेमानंद च्यारी हांणी पर्यावरण दीस मनोवपा फाटलो उद्देश स्पश्ट केलो. विद्यार्थी बबन पाटकेरो हांणी पर्यावरण आनी ताच्या घटकां विशीं आपले विचार मांडले. शिक्षिका शितल लाड हांणी पर्यावरण, ताचें जावपी लुकसाण आनी ताचो आपल्याचेर जावपी परिणाम हे विशीं म्हायती दिली. सैमाचें संवर्धन प्रक्रिये खातीर चालीक लायिल्ल्यो उपाय येवजण्यो, ताचेर नागरीक म्हूम आपली भुमिका कितें आसची हे संबंदांत मुख्याध्यापक सुरज नायक हांणी मार्गदर्शन केलें. प्रयोगशाळा सहाय्यक अक्षता हळदणकार हांणी उपकार मानले.
पर्यावरण दीस सर्तीचे निकाल
पर्यावरण दीस जागृताय म्हूण आपले कडेन आशिल्ले सामुग्रीचो वापर करून घोंटेर आनी फ्लॉवरपॉट तयार करपाच्यो सर्ती घेतिल्ल्यो. तातूंत गौरांग ओपकार (पयलो), मैथिली गावडे (दुसरें) आनी रश्मी नायक (तिसरें) हांकां इनामां फावो जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
