भांगरभूंय | प्रतिनिधी
काणकोण: चाररस्तो खाट्यार सावन सुरू जाल्लो गुळें मेरेनचो सुमार पांचशें मिटर लांबायेचो नवो रस्तो घातक जाला, आनी ह्या रस्त्यान प्रवास करपी दुचाकी चालकांक हो रस्तो म्हणल्यार मरणाचो सांपळो जाला.
चाररस्तो खाट्यार सावन गुळें मेरेन वचपी ह्या पोरण्या रस्त्याच्या दोनूय वटांनी सुमार दोन दोन मिटर रस्त्याचें रुंदीकरण केलां, आनी ह्या रस्त्याचें डांबरीकरण लेगीत केलां. पूण पांचशें मिटर लांबायेचो हो रस्तो दुचाकी चालकांक घातक थारला.
मूळ रस्त्या पसून सुमार दोन वेत खोल हो नवो रस्तो बांदला आनी पयसुल्ल्यान येवपी चारचाकी आनी हेर व्हड वाहनांक रस्तो वयर सकयल आसा हाची कल्पना येना. गतीन येवपी व्हड वाहनां हेर वाहनांक ओव्हरटेक करतात तेन्ना दुचाकी चालकांक आपली दुचाकी रस्त्याचे भायर घेवची पडटा तेन्ना दोन वेत सकयल आशिल्ल्या रस्त्यार दुचाकी देंवयल्यार थंय अपघात जावपाची भिरांत उक्तायतात.
मजगतीं, बेंदुड्डें ते काणकोण मनोहर पर्रीकार बायपास आनी मनोहर पर्रीकार बायपास ते पोळें मेरेनचो चारपदरी रस्त्याच्या कामा खातीर 1370 कोटी रुपयांचो निधी केंद्र सरकाराच्या रस्तो विभागान मंजूर केला. तातूंत ह्या नव्यान बांदिल्ल्या रस्त्याचोय आस्पाव येत आशिल्ल्यान, हालींच नव्यान बांदिल्लो हो रस्तो निरुपेगी थारपाची शक्यताय आसून ह्या रस्त्याच्या कामा खातीर गोंय सरकारान मंजूर केल्ल्या कोट्यांनी रुपयांचो निधी मात फुकट वचपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
