भांगरभूंय | प्रतिनिधी
नोव्हेंबराची 8 तारीख. वर्स 2016. रातचीं 8 वरां. टीव्हीचेर प्रधानमंत्री नरेंद्र मोदी झळकले आनी कांय खिणांत 500 आनी 1000 रुपयांच्यो नोटी चलनांतल्यान रद्द केल्यात अशी घोशणा तांणी केली. ताका लागून आतंकवाद्यांक मेळपी रसद (निधी) कापतली. दहशतवाद बंद जातलो, वेपारी, उद्देजकांनी सांठोवन दवरिल्लो काळो पयसो धडाधड भायर सरतलो, अशें जाहीर जाल्लें. तशें जालां काय ना, तें जाणकारांक खबर आसतलेंच. पूण, नोटी बदलून घेवपी लोकांचे मात हाल हाल जालें. कांय जाणांक ते जाणवले नात वा जाणवूनय देशहिता खातीर तांणी ते सोंसले. 8 नोव्हेंबर 2016 दिसा 2000 रुपयांची नोट चलनांत आयली. आतां आयज 23 मे सावन ती (चडांत चड 20 हजार रुपया) बँकेंत घालपाक मेळटली वा बदलून घेवपाक मेळटली. बदलून घेवपाक स्लीप, वळखपत्राची गरज ना. काळ्या पयशाक आळाबंद हाडपाक दोन नोटी रद्द करून ही नवी नोट हाडिल्ली, ती आतां भ्रश्टाचार, काळो पयसो, नोटींची सांठेबाजी अशा कारणाक लागून चलनांतल्या काडल्या.
रिझर्व्ह बँकेचे गव्हर्नर शक्तीकांत दास हांणी काल 2000 चे नोटी विशीं म्हायती दिली. ही नोट रद्द जावंक ना, फक्त चलनांत आसची ना. तिचो वापर 50 टक्के उणो जाला. दोन हजारांच्या नोटींच्या रुपांत 6,73, 000 कोटी रुपया देशांत घोळटाले, ते हालींच्या वर्सांनी 3, 62, 000 कोटींचेर पाविल्ले. दोन नोटी रद्द केल्ल्यान पोकळी निर्माण जाल्ली, ती भरून काडपाक ही नोट बाजारांत हाडिल्ली. भारतीय चलन वेवस्थापन पद्दत खूबच बळिश्ट आसा. जर लोकांक ह्यो नोटी बदलतना त्रास जाले जाल्यार ते बाबतींत रिझर्व्ह बँक खूबच संवेदनशील आसतली, अशी शिटकावणी दास हांणी दिल्या. बँकांनी लोकांक त्रास जावचे नात, हें पळोवचें. चलन वेवस्थापनाचो भाग म्हूण हो नोट फाटीं घेवपाचो निर्णय घेतला, अशेंय तांणी स्पश्ट केलें.
भारतांत 12 जानेवारी 1946 दिसा गव्हर्नर जनरल सर आर्किबाल्ड वेव्हेल हांणी उंचेल्यो नोटी बाद करपाचो अध्यादेश तयार केल्लो. 26 जानेवारीक 500, 1000 आनी 10 हजारांच्यो नोटी रद्द केल्ल्यो. त्या वेळारुय काळो पयसो भायर काडपाक हो निर्णय घेतिल्लो. इश्ट देशांक वेपारी म्हाल निर्गत करून लाखांनी रुपया जोडटात आनी सरकाराक कांय दिनात, अशें फुडारी म्हणटाले. मजा म्हणल्यार 2- 3 फावट नोटाबंदी जावन पसून थारावीक लोकांची फटिंगपणा बंद जावंक ना, काळो पयसो तयार जायत आसा आनी भ्रश्टाचारुय थांबूंक ना. चडशा लोकां कडेन 2000 रुपयांच्यो नोटी नात. वेपारी, उद्देजकां कडेन घडये आसत. एटीएमांनी ही गुलाबी नोट पळयल्यार वर्सां जातलीं. ती बंद केली अश्यो वावड्यो उडिल्ल्यो. ती उडोवप्यांचेर खर टिकाय जाल्ली. मात, आतां ही वावडी खरी थारल्या.
गोंयांतल्या बँकांचेर व्हड जापसालदारकी आसा. पूण, अजून चार म्हयने आशिल्ल्यान 2016 तल्या सारको त्रास, मनस्ताप कोणाक जावचो ना. गोंय सरकारानूय सगळ्या बँकांक आनी सरकारी खात्यांक ही गुलाबी नोट घेवपाचे आदेश दिल्यात. मात, कांय वेपारी संस्थांनी ती घेवची न्हय, अशें लेखी परिपत्रक आपल्या भांडारां खातीर काडलां. ही नोट चलनांतल्यान बाद जाली काय सगल्यांत व्हडली नोट थारतली ती 500 रुपयांची. घडये 1000 ची नोट परतून येत!! उंचेल्या मुल्यांच्यो नोटी काडपाच्यो नासल्यार रिझर्व्ह बँकेन देडशें, तीनशे रुपयांच्यो नव्यो नोटी काडच्यो. ताचेर गांधीजींचें चित्र घालपाचें काय गणपतीचें, ताचेर वाद – संवाद करुं येता. कारण खूब जाणांक गांधीजींचें उस्तुरें वता. मुस्लीम राष्ट्र इंडोनेशियेचे नोटीचेर गणेशमुर्ती आसा. अरविंद केजरीवाल हांणी मदीं लक्ष्मी आनी गणपतीचें चित्र आशिल्ल्यो नोटी काडच्यो अशें म्हणिल्लें. पूण, कित्याक कोण जाणां, गांधीजींक विरोध करप्यांक पसून ही कल्पना आवडूंक नासली. 2000 चे नोटी भितर इलेक्ट्राॅनिक्स चिप्स आसा. तिचे वरवीं ती नोट खंय आसा तें कळटा, अशें कांय अभ्यासू टीव्ही पत्रकारांनी जाहीर केल्लें. पूण, चिप्स काय अजून सांपडूंक ना, ती नोटूच आतां 30 सप्टेंबराच्यान शेणपाची आसा. कोण म्हणटा, नोटाबंदी करपाचो सरकाराचो निर्णय चुकलो, थोडे म्हणटात, ती करून देशाक खूब फायदो जालो. सामान्य मनशाक हाचें पडून गेल्लें ना. कारण ताणें केन्ना ती नोट हाताळ्ळीच ना. वायट इतलेंच दिसता, आमच्या चलनांतलो गुलाबी रंग शेणटलो. कायमचो??-
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
