भांगरभूंय | प्रतिनिधी
फाल्यां आयतारा 21 जुलयाक गुरूपुनव परब सगले कडेन मनयतात. पिळग्यान पिळग्यो गुरुचें स्थान समाजांत सर्वोच्च आसा. गुरुच्या अर्थपूर्ण शिकवणेंतल्यान शुन्यांतल्यान विश्व निर्माण करपाची प्रेरणा ताच्या विद्यार्थ्यांक, शिश्यांक मेळटा.
भारतीय संस्कृतायेंत गुरू ह्या उतराक खूब म्हत्व आसा. ‘गु’ म्हणल्यार अज्ञान, ‘रु’ म्हणजे हरण करणारो. जो अज्ञान ना करता तो गुरू. आषाढ म्हयन्यांतले पुनवेक गुरुपुनव वा गुरुपौर्णिमा म्हणटात.
आई माझा गुरू, आई कल्पतरू
सौख्याचा सागरु आई माझी
अशी एक कविता आसा. दरेकल्याची आई हीच ताची पयली गुरू. कुटुंबाच्या पोटाची खळगी भरपाक बापूय चड वेळ घरा भायर आसता. त्या वेळार भुरग्याचो चडसो वेळ आईवांगडा वता. म्हणून आवय हें भुरग्याचें आराध्य दैवत. ताका योग्य तो आकार दिवपी व्हडली शिल्पकार म्हणल्यार आमची आई.
दुसरे गुरू म्हणल्यार शाळेंतले शिक्षक. आमकां शिक्षीत करतात, गिन्यान दितात ते गुरू. अज्ञान पयस करता तो गुरू. गुरु हो सुर्यमाळेंतलो सगल्यांत व्हडलो गिरो. संगीत, अध्यात्म, शिक्षण, विज्ञान मळाचेर गुरू ही संकल्पना आसा. गुरुपौर्णिमा, गुरु दुवादस, गुरू पुज्यामृत हें गुरू ह्या उतरा कडेन संबंदीत आसा.
गुरूपुनव बालवाडी, शाळा, हायस्कूल, हायरसेकंडरींनी व्हड दबाज्यान मनयतात. प्रत्येक विद्यार्थी आपल्या गुरुजनांक कुकूम लावन आरती दाखयता. ताका गुलाबाचें सोबीत फुल भेटयता. तांच्या पांयाचेर तकली दवरून आशिर्वाद घेता. थोडीं भुरगीं गुरुची यथासांग पूजा करतात. तांचो मान, सन्मान राखतात. गुरुक देवाचें दुसरें रुप मानतात.
गुरुर्ब्रह्मा गुरुर्विष्णु गुरुर्देवो महेश्वरः।
गुरुः साक्षात् परब्रह्म तस्मै श्रीगुरुवे नमः॥
गुरुक परब्रह्म अशें मानलां. गुरु म्हणल्यार यथार्थ गिन्यानाचो दर्या. गुरू आमकां काळखांतल्यान उजवाडा कडेन व्हरता. उजवाडाची वाट दाखयता.गुरू देवा परस खूब म्हान. गुरू म्हणल्यार सत्य, शिवं, सुंदरतायेचें शुभ प्रतीक. पिळग्यान पिळग्यो गुरुचें स्थान समाजांत सर्वोच्च आसा. गुरुच्या अर्थपूर्ण शिकवणेंतल्यान शुन्यांतल्यान विश्व निर्माण करपाची प्रेरणा ताच्या विद्यार्थ्यांक, शिश्यांक मेळटा.
अज्ञानरुपी अहंकार, मद, मस्ती ना करप, शिश्याच्या जिवीतांत ज्ञानाची ज्योत पेटोवप, अशीं जाय तीं कामां करपाचें पुण्याचें काम गुरुजन करतात, हातूंत म्हाका तरी दुबाव ना. गुरू देवा कडेन वचपाचो बरो मार्ग दाखयता. पूर्ण गिन्यानाचो चंद्र दाखोवन ज्ञानाचो प्रकाश निर्माण करता.
गुरू हो सुखाचो सागर. गुरू हो मोगाचें आगर. आमकां ज्ञानाच्या जिवीताची वाट दाखोवपी गुरुजनांक कोटी कोटी नमस्कार. तांच्या हातांतल्यान ज्ञानाची ज्योत अखंड पेटत उरूं हीच प्रार्थना.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
