भांगरभूंय | प्रतिनिधी
आयज सुर्यमंडळांतलो सगळ्यांत व्हडलो गिरो ‘गुरू’, सूर्य आनी पृथ्वी बरोबर, एके सरळ रेशेंत येतलो. तो आयज सुर्याचे एकदम विरूद्ध दिकेन आसता म्हूण, पाश्चात्य लोक ते घडणुकेक Opposition of Jupiter आनी आमी कोंकणी लोक ‘विपक्षी गुरू’ अशें म्हण्टात.
पुराय वर्सा भितर ह्याच काळा मजगतीं, गुरू पृथ्वीक शक्य तितलो लागीं येता (म्हणुनूच तो चड लिकलिकीत दिसता). लागीं म्हळ्यार, तसो तो पयसूच आसता, पूण थोडे विकृत बुद्दीचे लोक नाका आशिल्ल्यो गजाली सांगून, भेश्टावन भावार्थ्यांक बरें तरेन गुटलायतात. म्हण्टकच खंयच्या गजालींचेर विश्वास दवरप आनी कोणाक चुट्टी लावप तें शिकिल्ल्या समाजान चिंतचें. हरशीं, सूर्य सोडलो जाल्यार, खंयचीच खगोलशास्त्रीय वस्तू मनशांचेर थेट परीणाम करीना, इतलें सांगपा पुरतें विज्ञान विकसीत जालां.(कोणूय कोसळून बी पडटा, ती वेगळी गजाल आं…)
आयज गुरू आनी पृथ्वी हांचें मदलें अंतर अंदमासान 4 ‘सुर्यक’ इतलें आसा. 1 सुर्यक म्हळ्यार 1 Astronomical Unit (1 AU = 15,00,00,000 Kms). गुरू, चडांत चड आमचे परस 9.5 सुर्यक इतलो पयस पावूंक शकता. आतां हें अंतर प्रत्यक्षांत कितलें व्हडलें आसता, तें सांगपाक मात म्हजे कडेन वेगळें माप ना. ह्या दिसांनी गुरू पुराय रात (सुर्यास्त ते दुसरो सुर्योदय जाय मेरेन) आमकां दिसतलो. हरशीं ताचीं जायतीं खाशेलपणां आसात. दुर्बिणींतल्यान पळयतकच, ताचो तो तांबडोच ठिपको (The Great Red Spot), म्हळ्यार अती- प्रखर वादळ उमळशीक सामकी वाडयता. ते भायर, वांगडा दिसतात ते ताचे 4 मोटे चंद्र. ते विशीं तर हांव उलयच ना.
(आंतरराश्ट्रीय खगोलशास्त्र दिसा निमतान, सांखळे पुराय सप्तकभर, सांजवेळार आस्वादकांक अवकाश निरीक्षण करपाक दुर्बीण चालू आसतली. तज्ञा वांगडा मसलत करुन, थोड्या घडयल्ल्या कोंकणी शब्दांचो बरपांत प्रयोग जाला. त्या संबंदीत कसल्योय सुचोवण्यो आसल्यार मुद्दम कळोवचें.)
गौतम जल्मी
9764364269
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
